Har du hjarte for museum og teft for vertskapsrolla?

Om stillinga

Vi har ledig eit 35% engasjement som museumsvert på Vågsberget i Måløy for perioden mai-september 2026 (5 månader). 

Som museumsvert på Vågsberget vil du vere museumsleiar sin "forlenga arm" og stadleg ansvarleg for den praktiske gjennomføringa av sesongtilbodet på museet. I vertskapsrolla er du vår ambassadør, og di viktigaste oppgåve vil vere å organisere den daglege drifta der vi skal følgje opp gruppebestillingar, planlegge for bemanning med ekstrahjelper, og sikre gjennomføring av små og store oppgåver som er del av museumskvardagen.

Ansvar og oppgåver i stillinga er knytt til: 

• Booking - kontakt med reiselivsoperatørar og oppfølging av gruppebestillingar
• Sommarvertar - lage og følge opp bemanningsplan og fordele oppgåver
• Drift av kafe og butikk
• Omvising og enkle formidlingsoppgåver
• Arrangement - rigg og rydd
• Kommunikasjon og marknadsføring i SoMe-kanalar

I jobben som museumsvert er det stor variasjon i arbeidsoppgåvene, og ingen dagar er like. Arbeidet er prega av sesongsvingingar, og det vil vere både rolege og intensive periodar/dagar. Det tyder at stillingsstorleik på 35% vil vere eit snitt for perioden. Arbeidstida vil i hovudsak vere lagt til dagtid - ut frå planlagd aktivitet på museet.  Men det vil også vere aktuelt med noko arbeid i helg og på kveld ved arrangement. 

Museumsleiar ved Kystmuseet i Sogn og Fjordane (Florø) er fagleg og stadleg leiar også for Vågsberget, og vil vere din næraste leiar. 

Vågsberget

På Vågsberget rett utanfor Måløy finn du ein av landets best bevarte handels- og gjesgjevarstader. Her formidlar vi historia om enorme rikdomar, stor naud og ein god handel.

Staden har røter heilt tilbake på 1600-talet, men dei fleste av dagens bygningar vart reist tidleg på 1800-talet. I den gamle driftsbygningen viser vi skiftande utstillingar, og har dessutan ein koseleg kafe, resepsjon og museumsbutikk. Det staslege våningshuset og krambua er ope for publikum som deltek i omvising. 

Vi held ope for alle på Vågsberget i skuleferien, men dei siste åra har vi også teke imot eit aukande tal turistgrupper allereie frå mai og ut september. 

Utanom sesongen er det populært å leige Vågsberget til fest og merkedagar. Med eit moderne kjøkken, stemningsfulle lokale og eit nydeleg uteområde, er dette ei flott ramme for feiring.

Les meir museet, formidlingstilbodet og opplevingane vi tilbyr på nettstaden vår (https://misf.no/de-heibergske-samlinger)

Kvalifikasjonar og eigenskapar

Vi søkjer deg som har:

• teft for vertskapsrolla og interesse for folk
• erfaring med å organisere personell 
• erfaring med å følgje opp kundebestillingar
• gode skriftlege og munnlege kommunikasjonsevner på norsk, engelsk og gjerne tysk
• gode IKT-kunnskapar
• førarkort kl. B og disponerer bil
   

For å trivast og fungere i denne stillinga, er det viktig at du:

• er trygg i vertskapsrolla
• er open og omgjengeleg
• har gode samarbeidsevner
• arbeider sjølvstendig, metodisk og systematisk
• er stødig og til å lite på
• trivst med utfordringar og variasjon i arbeidsoppgåver
   

Generell informasjon

Som tilsett i MiSF vil du vere del av eit dynamisk arbeidsmiljø med høg kompetanse og stort engasjement.

Vi nyttar nynorsk som administrasjonsspråk og i skriftleg kommunikasjon med eksterne.

Stillinga blir løna etter avtale, og har stillingskode 1115 jf. Landsoverenskomsten for museer og andre kulturinstitusjoner. 

Nærare opplysningar får du ved å vende deg til museumsleiar Annette Langedal Holme på tlf. 95 73 43 77.

Søknad med vedlegg registrerer du via lenka "Søk stillinga" på denne sida.

Ved spørsmål som gjeld elektronisk søknadsskjema tek du kontakt med Jobbnorge på tlf. 75 54 22 20 eller kundeservice@jobbnorge.no kvardagar mellom 08:00-16:00

Vi seier at kunnskap, erfaringar og opplevingar gjer oss rikare. På tolv ulike museum mellom fjord og fjell gjev vi ny innsikt i korleis verda hang saman for menneska i fjern og nær fortid. Og om korleis dette betyr noko for korleis verda heng saman for oss i dag.

Musea i Sogn og Fjordane driftar musea som årleg gjev nær 60 000 innbyggarar og tilreisande kunnskap og opplevingar innan kulturhistorie og kunst.

Samlingane våre spenner frå urban kunstscene til eldgamle bygningar og skikkar. Frå pulserande historiske kystsamfunn til malaren Nikolai Astrup sitt småbruk i Jølster. Frå lafta utedassar og eksport av kvernsteinar i vikingtida, til ein Ford Escort frå 1980-talet og rykande ferske kunstinstallasjonar. Fortid og samtid.

Vi har kring 60 fast tilsette medarbeidarar, og fleire mellombels tilsette i sesong. Museumsvertar, museumspedagogar, museumsleiarar, konservatorar og handverkarar med fleire, jobbar på dei ulike musea. Les meir på Musea i Sogn og Fjordane sin nettstad.