Statens fremste representant i Vestland

Om stillingen

Statsforvaltaren er Kongen og Regjeringa sin representant i fylket og har ansvar for å følgje opp vedtak, mål og retningslinjer frå Stortinget og Regjeringa. Statsforvaltaren skal òg samordne anna statleg forvaltning i fylket, og ta del i samarbeid og samhandling mellom stat, fylkeskommune og kommunar.

Som statsforvaltar i Vestland tek du vare på oppgåver som er viktige for innbyggjarar, kommunar og lokalsamfunn. Statsforvaltaren rettleier og støttar kommunane, og fører tilsyn og kontroll med sentrale samfunnsområde, mellom anna miljøvern, landbruk, samfunnstryggleik, helse, barnevern, oppvekst, utdanning og kommunal økonomi og forvaltning.

Statsforvaltaren leier ei verksemd med omfattande oppgåver og stor betydning i samfunnet. Som statsforvaltar i Vestland vil du leie ei veldriven verksemd med mange oppdragsgivarar og om lag 290 tilsette med høg kompetanse. Statsforvaltaren i Vestland har hovudsete i Leikanger, der statsforvaltaren som leiar av embetet har sitt daglege virke. Statsforvaltaren har òg kontor i Bergen og Førde, og leiaren av embetet må rekne med å reise i heile fylket.

Statsforvaltaren er administrativt underlagd Digitaliserings- og forvaltningsdepartementet, og utfører oppgåver for ei rekkje departement, direktorat og tilsyn.

Statsforvaltaren blir tilsett på åremål for seks år, med høve til fornying i ytterlegare seks år etter offentleg kunngjering og konkurranse.

Du får jobbe med

Du får ei sentral rolle i å peike ut retning, følgje opp framdrift og resultat hos Statsforvaltaren i Vestland.

Dette inneber mellom anna å

• setje i verk nasjonal politikk i fylket og gi god og relevant rettleiing til kommunane

• samordne statleg verksemd ut mot kommunane og fylkeskommunen

• bidra til rettstryggleiken i befolkninga

• vere eit bindeledd mellom stat og kommune ved å gi informasjon, ta initiativ og bidra til løysingar

• leie ei stor verksemd med kunnskapsarbeidarar og mange ulike ansvarsområde

Kvalifikasjonskrav

For å lykkast og trivast i denne rolla må du ha interesse for og god kunnskap om offentleg forvaltning. Du må ha solid leiarerfaring og vere ein tydeleg og raus leiar. Stillinga krev at du har høg arbeidskapasitet og evne til å prioritere.

Vi søkjer ein statsforvaltar med

• solid leiarerfaring på høgt nivå frå offentleg og/eller privat verksemd, eller frå organisasjonsarbeid

• ein motiverande leiarstil med interesse for utvikling av organisasjonen og medarbeidarane

• høgare utdanning på masternivå. Kandidatar med anna høgare utdanning og særleg relevant erfaring kan vurderast som kvalifiserte

• brei samfunnsinteresse, svært god rolleforståing og forståing for kva det inneber å vere statleg toppleiar

• erfaring frå og innsikt i offentleg forvaltning og politiske prosessar

• høg arbeidskapasitet og evne til å handtere pressa arbeidssituasjonar

• høg personleg integritet og ei tillitvekkjande og trygg kommunikasjon, både internt og eksternt

• svært god skriftleg og munnleg framstillingsevne

Utdanning og erfaring må dokumenterast med CV, vitnemål og attestar.

Den som blir tilsett, må kunne tryggleiksklarerast for STRENGT HEMMELEG. Les meir om tryggleiksklarering på nettsidene til Nasjonal tryggingsstyresmakt (https://nsm.no/fagomrader/personellsikkerhet/sikkerhetsklarering/).

Tilsetjing skjer under føresetnad av at du bur i Vestland ved tiltreding.

Vi tilbyr 

• ein jobb med eit viktig samfunnsoppdrag

• eit breitt ansvarsområde med stor betydning for samfunnsutviklinga

• utfordrande og samfunnsnyttige oppgåver

• ei toppleiarstilling i eit sterkt fagmiljø

• gode ordningar for forsikring og pensjon, med medlemskap i Statens pensjonskasse

• gode høve til fagleg og personleg utvikling

• løn etter avtale

Offentleg søkjarliste og kontakt

Interesserte kan før søknadsfristen ta konfidensiell kontakt med DSS ved Liv S. Bøe, tlf. 911 08 263 / e‑post liv-sissel.boe@dss.dep.no, eller Joakim Bakke, tlf. 906 56 276 / e‑post joakim.bakke@dss.dep.no. Om ønskjeleg kan òg departementsråd Christine Hamnen kontaktast på tlf. 976 66 299.

Etter at søknadsfristen er gått ut, vil det bli utarbeidd søkjarlister. Vi gjer merksam på at opplysningar om søkjarar kan bli offentleggjorde sjølv om søkjarar har bede om å ikkje bli førte opp på den offentlege søkjarlista. Dersom dette blir aktuelt, tek vi kontakt før offentleggjering.

Det er ønskjeleg å spegle mangfaldet i samfunnet, og vi oppmodar difor alle kvalifiserte kandidatar, uavhengig av bakgrunn og tilhøyrsle, til å søkje. Vi vil leggje til rette for medarbeidarar som har behov for det. Les meir på Arbeidsgjevarportalen (https://arbeidsgiver.difi.no/positivsaerbehandling).

DFD samarbeider med Semac om bakgrunnssjekk av aktuelle kandidatar. Bakgrunnssjekken blir utført etter samtykke frå deg som søkjar og inneber at vi verifiserer CV og anna søknadsdokumentasjon i samband med tilsetjinga.

Statsforvaltaren er staten sin representant i fylket og har ansvar for å følgje opp vedtak, mål og retningslinjer frå Stortinget og Regjeringa. Statsforvaltaren er òg eit viktig bindeledd mellom kommunane og sentrale styresmakter. 

Statsforvaltaren utfører ulike forvaltningsoppgåver på vegner av departementa. Statsforvaltaren fører òg tilsyn med kommunane, rettleier kommunane og er klageinstans for ulike kommunale vedtak. 

Statsforvaltaren har fagkunnskap på ei rekkje overordna samfunnsområde og har samstundes viktig lokalkunnskap. Statsforvaltaren skal syte for rettstryggleik for den einskilde innbyggjaren, verksemder og organisasjonar ved å sjå til at grunnleggjande prinsipp som likebehandling, likeverd, føreseieleg praksis, uavhengig forvaltning, habil saksbehandling og rettferd blir tekne vare på i forvaltninga.