Vil du arbeida med språkrådgiving?

Språkrådet søkjer ein rådgivar/seniorrådgivar til arbeid med rettleiing i rettskrivinga for bokmål og nynorsk

Språkrådet har ledig fast stilling som rådgivar/seniorrådgivar i arbeidet vårt med allmenn rådgiving om god og korrekt norsk og med rettleiing i bruk og utvikling av språkmodellar.

Arbeidsoppgåver

Sentrale oppgåver i stillinga er å

• gi råd om god og korrekt språkbruk, særleg overfor dei som har plikter etter språklova
• gi språkråd til brukarar og utviklarar av språkteknologiske verktøy
• greia ut normeringsspørsmål
• formidla kunnskap om dei ulike arbeidsfelta som ligg til stillinga
• utarbeida og leia prosjekt som kan knytast til arbeidsoppgåvene ovanfor

Kvalifikasjonar

Den som søkjer stillinga, må kunna visa til

• høgare utdanning på mastergradsnivå i språkfag
• særs god kjennskap til norsk språk og rettskrivingsnormene for nynorsk og bokmål
• god evne til å arbeida strukturert og analytisk
• god forståing for Språkrådets samfunnsoppdrag og norsk språkpolitikk
  

Det er ein fordel med kunnskap om store språkmodellar, kjennskap til forvaltninga og god digital kompetanse.

Relevant arbeidserfaring kan vega opp for manglande formalkompetanse.

Personlege eigenskapar

Vi ser etter deg som arbeider sjølvstendig, strukturert og systematisk og kan setja deg raskt inn i komplekse problemstillingar. Du skriv særs godt norsk, har god rolleforståing og har gode samarbeidsevner.

Vi tilbyr

Hos oss får du

• interessante faglege utfordringar i ein organisasjon med eit viktig samfunnsoppdrag
• eit hyggjeleg og sterkt fagmiljø med kunnskapsrike og engasjerte kollegaer
• fagleg utvikling
• moderne og trivelege kontorlokale sentralt i Oslo med innandørs sykkelparkering og kort veg til kollektivnettet i Oslo
• subsidiert kantine
• fleksibel arbeidstid
• høve til å arbeida på heimekontor (etter nærare avtale)
• høve til å trena i arbeidstida
• medlemskap i Statens pensjonskasse

Stillinga blir plassert som rådgivar (stillingskode 1424) eller seniorrådgivar (stillingskode 1364) med årsløn frå 600 000 til 800 000 kroner, avhengig av kvalifikasjonar og erfaring. For særleg kvalifiserte søkjarar kan vi vurdere høgare løn. Ein søkjar må normalt ha minst fem års relevant erfaring for å bli vurdert som seniorrådgivar.

Språkrådet meiner at inkludering og mangfald i arbeidslivet gjer at vi kan utføra samfunnsoppdraget vårt på ein god måte. Derfor ønskjer vi medarbeidarar med variert kompetanse og livserfaring og ulike fagkombinasjonar og perspektiv. Dersom det er kvalifiserte søkjarar med funksjonsnedsetjing, hol i CV-en eller innvandrarbakgrunn, kallar vi inn minst éin søkjar frå kvar av desse gruppene til intervju. For å bli vurdert som søkjar i desse gruppene, det vil seia å bli positivt særbehandla på denne måten, må søkjarane oppfylla visse krav. Les meir om krava på Arbeidsgivarportalen (https://arbeidsgiver.difi.no/positivsaerbehandling).

Vi vil leggja til rette for medarbeidarar som treng det. Aktuell tilrettelegging kan til dømes vera tekniske hjelpemiddel, tilpassing av møbel eller endring av rutinar og arbeidstid.

Vi oppmodar søkjarar om å kryssa av i jobbsøkjarportalen dersom dei har funksjonsnedsetjing, hol i CV-en eller innvandrarbakgrunn. Avkryssingane i jobbsøkjarportalen blir anonymisert statistikk som alle statlege verksemder rapporterer om i årsrapportane sine.

Fyll ut CV-felta i portalen (sjølv om du legg ved ein ferdig utfylt CV), og legg ved relevante vitnemål (frå Vitnemålsportalen). Dokumentasjon frå NOKUT/Direktoratet for høgare utdanning og kompetanse er påkravd for utdanning tatt i utlandet.

Vi gjer merksam på at opplysningar om søkjarane kan bli offentlege sjølv om søkjarane har bede om å ikkje bli førte opp på søkjarlista, jf. offentleglova § 25. Vi kjem til å kalla inn til intervju frå midten av august.

For å sikra ei grundig og rettferdig vurdering av kandidatane brukar vi den arbeidspsykologiske testen People Test Person (PTP) i rekrutteringsprosessen. Testen vil bli gjennomført av ein ekstern samarbeidspartnar og vil berre bli brukt på kandidatar som går vidare frå førstegongsintervjuet.

Nærare opplysningar om stillinga får du av avdelingsdirektør Daniel Ims på telefon 95 76 51 52.