Innkjøpsleiar

Har du lyst til å utvikla arbeidet med innkjøp i Time kommune? Me søker no ein løysings- og samarbeidsorientert innkjøpsleiar. Innkjøpsleiaren vil få ei viktig rolle med å leggja til rette for at kommunen sine midlar blir nytta best mogleg og bidra til at anskaffingssregelverket blir etterlevd. Rolla er både operativ og koordinerande, og inneber tett samarbeid med andre fagmiljø og verksemder i kommunen for å sikra kvalitet, kostnadseffektivitet og gode prosessar. Innkjøpsleiar vil òg ha ansvaret for kommunen sin innkjøpsstrategi.

Stabsområde Økonomi består av 13 medarbeidarar fordelte på avdelingane Budsjett og økonomistyring, Rekneskap og fagteamet Innkjøp. Innkjøp er ein støttefunksjon for heile organisasjonen og har ansvar for anskaffingsrådgiving, konkurranseutsetjing og kontraktsinngåingar. Fagteamet består av ein innkjøpsleiar med fag- og oppgåveansvar for ein medarbeidar, og handterer både bygg- og anleggsanskaffingar og ein brei portefølje av varer og tenester. Stabsområde Økonomi er i endring og omstilling, og stillinga gir moglegheiter for den rette kandidaten til å vera med å forma framtidas innkjøpsfunksjon i kommunen.

Som innkjøpsleiar rapporterer du til økonomisjef og er med i leiargruppa til tenesteområdet økonomi.

Arbeidsoppgåver

• Leia og vidareutvikla innkjøpsteamet, inkludert utvikling av rutinar, malar og kompetanse
• Planleggja, gjennomføra og følgja opp anbodskonkurransar og rammeavtalar innanfor eit breitt spekter av varer, tenester og bygg- og anleggsprosjekt
• Samarbeide med prosjektleiarar om anbod på bygg- og anleggsprosjekt
• Gje rettleiing, rådgjeving og opplæring i regelverket for anskaffingar (lov om offentlege anskaffingar med forskrift)
• Bidra til god kontraktsoppfølging og sikra etterleving av inngåtte avtalar
• Vera ein pådrivar for vidareutvikling og implementering av teknologiske løysingar innan innkjøpsområdet

Kvalifikasjonar

• Høgare utdanning innan juridiske fag, økonomi og administrasjon eller offentlege anskaffingar. Lang og relevant erfaring saman med bachelorutdanning, kan kompensera for manglande mastergrad.
• Erfaring frå arbeid med innkjøp og kjennskap til regelverket for offentlege anskaffingar
• Gode kunnskapar i bruk av digitale verktøy og interesse for informasjonsteknologi brukt som arbeids- og effektiviseringsverktøy
• Svært gode ferdigheiter i norsk, både munnleg og skriftleg, samt god evne til klar og presis kommunikasjon.
• Det er ønskjeleg med leiarerfaring og/eller formell leiarutdanning.
  

Du må laste opp relevante vitnemål og attestar. Vitnemål og/eller karakterutskrifter kan du henta frå Vitnemålsportalen. Har du utdanning frå utlandet må du leggja ved godkjenning frå Direktoratet for høgare utdanning og kompetanse (hkdir).

Personlege eigenskapar

• Gode samarbeidsevner, god til å rettleia andre og kunne bidra positivt i jobbfellesskapet
  
• Evne til å kunne arbeida sjølvstendig og ta initiativ til oppgåver som må prioriterast og gjennomførast
  
• Arbeide strukturert og halde oversikt i ein travel kvardag
• Engasjert, løysingsorientert og trivst med utfordringar og ansvar for eiga og fagteamet si utvikling
• Villig til å ta fatt på nye arbeidsoppgåver etter kvart som organisasjonen endrar seg
• Framstå klar og tydeleg
  

Vi tilbyr

• Ein spennande, variert og fagleg utfordrande arbeidsplass med eit godt arbeidsmiljø
• Stor påverknad på vidareutviklinga av kommunen sitt innkjøpsteam
• Gode utviklingsmoglegheiter
• Nært samarbeid med eit breitt fagmiljø i ein organisasjon i utvikling
• Lønn etter avtale og ei god pensjonsordning

"Me skal gjera kvarandre gode" er leveregelen for oss som jobbar i Time kommune. Me er opptatt av å utvikla og forbetra tenestene i lag med innbyggarane, besøkande og næringslivet slik at Time skal vera ein trygg og framtidsretta kommune. Kommunen har ca. 20 000 innbyggarar og ligg midt på Jæren, med Bryne som regionssenter og kollektivknutepunkt for buss og jernbane. Time er ein stor jordbrukskommune og har i tillegg eit variert næringsliv, med flest sysselsette innan industri, varehandel, hotell og restaurant. Det er 1340 årsverk i Time kommune, fordelt på om lag 1800 personar.

Time kommune er opptatt av mangfald og me oppmodar derfor alle som er kvalifiserte til å søka hos oss, uansett alder, kjønn, etnisitet, religion, funksjonsevne, seksuell orientering og kjønnsidentitet. Me gjer merksam på at opplysningar om søkaren kan verta offentleggjort, sjølv om ein har bede om å bli unntatt offentlegheit. Søkar vil verta varsla før offentleggjering.