Senterleiar ved Nasjonalt senter for nynorsk i opplæringa, åremålsstilling på 4 år.

Om stillinga

Nasjonalt senter for nynorsk i opplæringa, Nynorsksenteret, er eit ressurssenter for nynorsk i grunnopplæringa, med nasjonalt mandat. Senteret skal medverke til kompetanseutvikling og tilby støtte og rettleiing i arbeidet med motivasjon for og læring av nynorsk, både i område der nynorsk er opplæringsmål, og der nynorsk er sidemål. Målgruppene for senteret er primært lærarar, barnehagelærarar, skuleleiarar, lærarstudentar og lærarutdannarar.

Verksemda til Nynorsksenteret er basert på forskings-, forsøks- og utviklingsarbeid. Vi samarbeider både med lærarutdanningane og andre relevante fagmiljø ved universitet og høgskular over heile landet. Dei andre nasjonale sentera er også viktige samarbeidspartar. Senteret er med i mange nettverk, både lokalt, regionalt og nasjonalt.

Nynorsksenteret har eit nasjonalt mandat. Senteret er ei sjølvstendig eining ved Høgskulen i Volda under Avdeling for humanistiske fag og lærarutdanning (AHL), på same nivå som dei 5 faginstitutta ved avdelinga.

Senteret har i dag 13 tilsette.

Ved Nasjonalt senter for nynorsk i opplæringa er stillinga som senterleiar ledig frå 01.08.2026. Stillinga er ei åremålsstilling på 4 år.

Kvalifikasjonar

Nynorsksenteret ser etter ein inkluderande leiar med engasjement, gode samarbeidsevner og evne til strategisk tenking. Vi søkjer etter ein leiar med leiarerfaring, som kan drive internt utviklingsarbeid og vidareutvikle Nynorsksenteret som lærande organisasjon. Leiaren har personalansvar og budsjettansvar.

Den som vert tilsett, må ha pedagogisk kompetanse og god kjennskap til grunnopplæringa og gjeldande læreplanverk. Arbeidsrøynsle frå grunnopplæringa og/eller høgare utdanning er også eit krav. 

Det er ein fordel at leiaren har førstekompetanse på fagområda norsk språk eller litteratur eller norsk fagdidaktikk eller tilsvarande. Det er eit minstekrav at ein har master i eit av desse fagområda. Vi søkjer etter ein leiar som tek initiativ til forsking, og som kan vere med og drive fram søknadar om forskingsprosjekt som er aktuelle for senteret.

Det er forventa at leiaren av Nasjonalt senter for nynorsk i opplæringa skal delta i det offentlege ordskiftet rundt nynorsk i opplæringa. Leiaren må rekne med ein del reiseaktivitet.

Søkaren må ha gode norskkunnskapar, både skriftleg og munnleg. Arbeidsspråket ved senteret er nynorsk, og senterleiaren må vere ein stødig nynorskbrukar.

Dagleg arbeidsstad er Høgskulen i Volda. 

 

Vi tilbyr

Vi tilbyr ein spennande leiarjobb med varierte arbeidsoppgåver og høve til personleg utvikling. 

Nynorsksenteret har eit godt arbeidsmiljø både fagleg og sosialt.

Høgskulen i Volda har gode vilkår for forsking, og det finst fleire aktive forskargrupper som er relevante for dei som er opptekne av nynorsk i opplæringa. Senterleiaren kan avtale FoU-tid. 

Senterleiaren går inn som ein del av ei utvida leiargruppe for Avdeling for humanistiske fag og lærarutdanning.

Stillinga er lønt i statens lønsregulativ, lønsplan 17.500, stillingskode 1475 instituttleiar, årsløn kr. 770731. 

Generell informasjon

Ved HVO er vi opptatt av mangfald. Medarbeidarar med ulik livserfaring vil gjere oss i stand til å finne  gode løysingar på arbeidet vårt. Vi oppmodar difor alle til å søke stillinga utan omsyn til alder, kjønn, funksjonsevne eller etnisk bakgrunn. Du er også velkommen til å søke sjølv om du ikkje kan vise til ei samanhengande yrkeskarriere. Lokala er universelt utforma, og vi legg tilhøva til rette for personar med nedsett funksjonsevne.

Dersom du har nedsett funksjonsevne, innvandrarbakgrunn eller hol i CV kan du bli positivt særbehandla om du kryssar av for dette når du søker stillinga. Vi vil invitere minst éin kvalifisert søkar i kvar av desse gruppene til intervju. For å bli positivt særbehandla på denne måten, må du oppfylle visse krav. Les meir om dette på arbeidsgiverportalen (https://arbeidsgiver.difi.no/strategisk-hr-og-ledelse/inkluderingsdugnaden/hvordan-bli-en-mer-inkluderende-virksomhet).

Tilsetjing skjer på dei vilkåra som følgjer av lov om offentlege tenestemenn, regulativ, reglement og instruksar som til ei kvar tid gjeld for stillinga, mellom anna lovfesta innskot i Statens pensjonskasse.

Aktuelle kandidatar vert innkalla til intervju. Søkjarar som vert kalla inn til intervju, må ta med originalar av vitnemål og attestar for å dokumentere dei elektronisk innsende vedlegga.

Om søknaden

Alle som søker stillinga må søke digitalt gjennom rekrutteringsportalen Jobbnorge. Du må laste opp relevante vitnemål og attestar. Vi gjer merksam på at søknaden blir vurdert ut frå informasjon som ligg føre ved utløp av søknadsfristen. Det er viktig at du viser korleis din kompetanse fyller kriteria for stillinga

Offentleg søkarliste blir utarbeidd etter at søknadsfristen er ute. Dersom du ønsker å reservere deg frå oppføring på offentleg søkarliste, må dette grunngjevast i Jobbnorge. Du vil bli varsla om reservasjon ikkje blir tatt til følge.

Kontakt

Nærare opplysningar om stillinga får ein ved å kontakte dekan Silje Ims Lied, e-post: silje.ims.lied@hivolda.no, tlf. 70075294/ 46804958

 

Studiebygda Volda

Midt mellom fjord og fjell på spektakulære Sunnmøre finn du Høgskulen i Volda, med sine lange tradisjonar.

Les meir på www.hivolda.no (http://www.hivolda.no)

Video: https://www.youtube.com/watch?v=wSlL1WkuUXc

Høgskulen i Volda er høgskulen for humaniora og samfunnsvitskap i Møre og Romsdal. Vi er ein spennande kompetanseorganisasjon i vekst med om lag 4500 studentar og 380 tilsette. Vi gjev undervisning i ei rekkje fagområde, yrkesretta utdanningar og etter- og vidareutdanningar i nært samarbeid med samfunns- og næringsliv. Høgskulen i Volda driv mykje forsking og utviklingsarbeid og satsar på forskaropplæring og kompetanseoppbygging for dei tilsette i samarbeid med universitet i inn- og utland.