Bli IKT-rådgivar i Vest politidistrikt! Vi søkjer ein løysingsorientert kollega til å utvikle innovative IT-løysingar.

Om stillinga

I Vest politidistrikt har vi ledig ei fast stilling som IKT-rådgivar  ved Seksjon for tryggleik, eigedom, logistikk og materiell (SELM). Stillinga skal bidra til god forvaltning av IT-løysingane i politidistriktet, innanfor nasjonale føringar og rammer.

Vi søkjer ein engasjert og løysingsorientert medarbeidar til ei viktig rolle i seksjonen. Du blir ein del av eit tverrfagleg miljø med fagleg dyktige og motiverte kollegaer som jobbar både strategisk og operativt innanfor ansvarsområda sine.

Stillinga har ei sentral rolle i å kople brukarane sine behov, teknologi og styring, og skal bidra til at IKT-løysingane støttar politidistriktet sine operative og administrative oppgåver. Rolla inneber tett samarbeid med fagmiljø i distriktet og relevante nasjonale IT-miljø.
 Arbeidet omfattar rådgiving innan IT-området, deltaking i produktutvikling, planlegging og gjennomføring av prosjekt, inkludert prosjektleiing, samt oppfølging og vidareutvikling av eksisterande løysingar i tråd med lokale behov. Stillinga vil ha ei sentral rolle i arbeidet med innføring og vidare bruk av Microsoft 365 i politidistriktet.

Vidare inngår oppfølging av nasjonale føringar og strategiar på IT-området, samt å bidra til god samhandling på tvers av fagmiljø både lokalt og nasjonalt. Stillinga har også eit overordna ansvar knytt til forvaltning og anskaffing av IKT-utstyr i distriktet.

Seksjon for tryggleik, eigedom, logistikk og materiell (SELM) er eit tverrfagleg team med åtte dedikerte medarbeidarar som løyser både strategiske og operative oppgåver. Som IKT-rådgivar vil du vere ein viktig bidragsytar i vidare utvikling av seksjonen og arbeide på tvers av fagområde for å sikre heilskaplege løysingar. SELM er organisert under stab for verksemdsstyring, som bistår politimeisteren i gjennomføring av sentrale verksemdsstyringsprosessar og sikrar at driftseiningane opererer i tråd med føringar og gjeldande regelverk.

Vi er på jobb for eit trygt Noreg. Som ein del av politiet sitt viktige samfunnsoppdrag skal vi førebyggje og kjempe mot kriminalitet, skape tryggleik og ta vare på rettstryggleiken. Vi meiner at mangfald bidreg til betre oppgåveløysing, og søkjer difor medarbeidarar med ulik bakgrunn, erfaring, perspektiv og kompetanse. Dersom du har behov for tilrettelegging i rekrutteringsprosessen eller arbeidshardagen, vil vi gjere vårt beste for å gi deg det du treng.

Dette ser vi etter hos ein ny medarbeidar

Vi stiller krav om relevant erfaring og god fagleg kompetanse innan IT-området, samt initiativ, arbeidskapasitet og evne til å arbeide sjølvstendig.
 

Stillinga krev at du samarbeider godt med ulike fagmiljø og har høg gjennomføringsevne. I vurderinga av kandidatar vil vi også leggje vekt på evna til å sjå heilskap og samanhengar mellom teknologi, brukarane sine behov og organisasjon. Det er viktig at du bidreg til gode prosessar og ser moglegheiter for forbetring innanfor eksisterande løysingar og rammer. Personleg eignaheit, inkludert evna til å bidra til eit inkluderande og respektfullt arbeidsmiljø, vil bli vektlagt.
 

Arbeidsoppgåver

• Følgje opp og bidra til implementering av etaten sin IT-strategi i politidistriktet
• Bidra til at IKT-løysingar støttar politidistriktet sine operative og administrative behov
• Ta vare på samhandling med sentrale og regionale IT-miljø, samt delta i relevante nasjonale forum
• Leie eller delta i prosjekt innan IT- og eigedomsområdet
• Vedlikehalde og oppgradere graderte informasjonssystem
• Ha ansvar for tilgangsstyring i tråd med gjeldande rutinar og tryggleikskrav
• Bistå i strategiske vurderingar knytte til IT-retning og anskaffingar, inkludert identifisere og formidle brukarane sine behov
• Ha eit overordna ansvar for bestilling og forvaltning av personleg IT-utstyr
• Sørgje for at gjeldande rutinar for bruk og handtering av IT-utstyr er kjende og blir følgde i organisasjonen
• Utarbeide og vedlikehalde lokale rutinar og styrande dokument innan fagområdet
• Gjennomføre internkontrollar og bidra til etterleving av gjeldande krav og føringar
• Bidra til gevinstrealisering og føremålstenleg bruk av IT-løysingar i distriktet
• Utføre andre oppgåver innan drift og forvaltning av IT-området

Kvalifikasjonar

Dette må du ha for å vere kvalifisert:

• Relevant utdanning på bachelornivå. Fagbrev eller anna relevant utdanning kan i særlege tilfelle kompensere for manglande formell utdanning
• Minimum fem års relevant erfaring innan IT-området, gjerne frå drift og forvaltning av IT-løysingar
• Erfaring frå arbeid i større organisasjonar
• Erfaring med Microsoft 365 og samhandlingsløysingar som Teams, SharePoint eller tilsvarande
• God forståing for samspelet mellom teknologi, brukarane sine behov og verksemd
• Erfaring med oppfølging av IT-løysingar og/eller leveransar i samarbeid med ulike fagmiljø
• Erfaring med tilgangsstyring og handtering av brukarrettar
• God skriftleg og munnleg framstillingsevne på norsk
• Må kunne tryggleiksklarerast og autoriserast til nivå HEMMELEG, jf. tryggleikslova

Du må ha plettfri vandel og vere skikka for teneste i politiet, og politiattest (uttømmande og utvida) må hentast inn ved eventuell tilsetjing, jf. politilova § 18 og politiregisterlova § 41. Ved å søkje på ei stilling i politiet samtykkjer ein til at det vert gjort ei skikkaheitsvurdering, inkludert søk i register, i forkant av eit eventuelt intervju.

Det er òg ønskjeleg med:

• Erfaring frå offentleg sektor
• Erfaring med produktutvikling, prosjektarbeid og/eller prosjektleiing
• Kompetanse innan forvaltning av IT-utstyr og bestillingsprosessar
• Evne til å utarbeide og vedlikehalde rutinar og styrande dokument
• Kjennskap til internkontroll og etterleving av krav og føringar
• Erfaring med samarbeid mot sentrale IT-miljø eller leverandørar
• Erfaring frå brukarstøtte eller kundebehandling

Personlege eigenskapar

• Gode samarbeidsevner og evne til å byggje relasjonar på tvers av fagmiljø
• Evne til å arbeide sjølvstendig, ta initiativ og følgje opp oppgåver
• Evne til å sjå heilskap og samanhengar mellom teknologi, brukarane sine behov og organisasjon
• Strukturert og løysingsorientert tilnærming til oppgåver
• God gjennomføringsevne og evne til å prioritere i ein variert arbeidskvardag
• Tydeleg og trygg i kommunikasjonen, både munnleg og skriftleg

Som medarbeidar i politiet har du høg etisk medvit, du blir kjenneteikna av å vere modig og heilskapsorientert, du viser respekt og er tett på. Du kan lese meir om dei etiske retningslinjene og medarbeidarplattforma vår her (https://www.politiet.no/om-politiet/jobb-i-politiet/medarbeiderplattform/).

Dette kan vi tilby om du vel oss

• Ein utfordrande og spanande arbeidsplass for deg som vil vera med på å forma politiet i framtida 
• Stillinga blir løna som rådgivar (stillingskode SKO1434) frå 720 000,- brutto pr. år . Vidare lønnsutvikling vil skje i henhold til hovudtariffavtalane i staten. 
• Medlemskap i Statens pensjonskasse, med mellom anna gode pensjons- og forsikringsordningar. Les meir her.
• Gode arbeidsvilkår (sommar- og vintertid, fleksibel arbeidstid, trening i arbeidstida o.l.)

Mangfald i politiet

Dersom du har funksjonsnedsetting, innvandrarbakgrunn eller hol i CV-en, er det høve til å krysse av for dette i søknaden. Er du kvalifisert for stillinga, vil du bli vurdert for positiv særbehandling. Det inneber at minst éin søkjar frå kvar av desse gruppene blir innkalla til intervju.

Les meir om positiv særbehandling når ein søkjer jobb i staten her (https://arbeidsgiver.dfo.no/strategisk-hr/inkluderingsarbeid/bli-bedre-pa-rekruttering/hvordan-skrive-stillingsannonser-som-inkluderer/positiv-saerbehandling-nar-man-soker-jobb-i-staten ). 

Opplysningane du gir, blir brukt til å utarbeide anonymisert statistikk som alle statlege verksemder rapporterer i sine årsrapportar.

Video: https://www.youtube.com/watch?v=uUTjHmSB_Wc

Slik søkjer du

Du søkjer ved å fylle ut CV i Jobbnorge sitt CV-skjema og skrive eit kort søknadsbrev. I tillegg må du leggje ved relevante vitnemål og attestar. Relevante kandidatar vil bli kalla inn til intervju.

Opplysningar om deg kan bli offentleggjorde sjølv om du har bede om ikkje å bli ført opp på søkjarlista. Dersom oppmodinga ikkje blir teken til følgje, vil du bli varsla om dette.

Vest politidistrikt dekker 38 kommunar i Vestland fylke, med til saman 609 000 innbyggjarar. Distriktet følgjer ikkje fylkesgrensene helt - kommunane Fitjar, Bømlo, Stord, Etne og Sveio høyrer til Sør-Vest politidistrikt.

Politidistriktet har om lag 1300 tilsette med  politimeister Ane Kvaal som øvste leiar. Politimeisteren har sitt kontor i Bergen og der ligg også felles operasjonssentral.