Styrar – Hunstad barnehage

Vil du leie ein mindre barnehage med stort ansvar, tett samarbeid og eit viktig samfunnsoppdrag?

Hunstad barnehage er ein av sjukehuset sine fire barnehagar og har plass til om lag 45 barn i alderen 1–6 år. Barna er fordelte på to avdelingar: Ulriken og Løvstakken. Barnehagen er kjenneteikna av eit oversiktleg miljø, nære relasjonar og høg fagleg bevisstheit i det daglege arbeidet.

No søker vi ein tydeleg, trygg og relasjonssterk styrer som vil leie og vidareutvikle barnehagen i tett samarbeid med tilsette, foreldre og organisasjonen elles.

Om Hunstad barnehage

I Hunstad barnehage legg vi til rette for eit inkluderande og stimulerande miljø der barna får utvikle seg i trygge og gode omgjevnadar. Prosjekt og aktivitetar blir tilpassa barnas alder, interesser og modning, og gir rom for både individuell utvikling og fellesskap på tvers av alder.

Vi arbeider målretta for at alle barn skal oppleve trygge relasjonar og eit godt psykososialt miljø. Våre viktigaste mål i kvardagen er å førebyggje utryggleik og å fremje helse, trivsel, leik og læring. Gjennom leik, samtalar og systematiske observasjonar sikrar vi at barna kjenner seg sett, høyrt og verdsett.

Fokusområde 2025–2026: Leik og leikemiljø

Leiken står sentralt i alt vi gjer. Gjennom leik utviklar barna språk, sosial kompetanse og kreativitet. For å fremje fellesskap og inkludering arbeider vi aktivt med å skape felles referansepunkt i leiken, mellom anna ved å bruke bøker, forteljingar og eventyr som utgangspunkt.

Dei vaksne har ei viktig rolle – både som deltakarar, støttespelarar og tilretteleggarar. Vi organiserer leikegrupper gjennom heile året for å sikre at alle barn får gode og meiningsfulle leikeopplevingar.

Arbeidsoppgåver

Som styrer har du det overordna ansvaret for:

• Pedagogisk leiing og kvalitetsutvikling av barnehagen
• Dagleg drift, økonomi- og budsjettansvar
• Personalansvar, arbeidsmiljø og kompetanseutvikling
• Systematisk og førebyggjande HMS- og arbeidsmiljøarbeid Samarbeid med foreldre, eksterne instansar og sjukehuset
• Samarbeid med tillitsvalde og verneombod
• Å bidra aktivt i styrergruppa og i samarbeid på tvers i organisasjonen
• Å sikre etterleving av gjeldande lovverk, rammeplanar, retningslinjer og tenesteveg – inkludert beredskap knytt til sjukehusdrift

Kvalifikasjonar

Vi søkjer deg som har:

• Relevant barnehagefagleg utdanning og rettleiarkompetanse
• Leiarutdanning, til dømes styrarutdanning frå NHH eller tilsvarande, erfaring kan vege opp for leiarutdanning
• Erfaring frå barnehagedrift og leiing
• God forståing for barnehagens samfunnsmandat og rolla som del av Helse Bergen
• God økonomi- og budsjettforståing
• Gode digitale ferdigheiter og tryggleik i bruk av relevante verktøy
• Kunnskap om førebyggande arbeidsmiljøarbeid
• Erfaring med samarbeid med tillitsvalde og verneombod

Personlege eigenskapar

Vi legg stor vekt på personleg eignaheit og søkjer ein leiar som:

• Er tydeleg, trygg og beslutningsdyktig – også i krevande situasjonar
• Har evne til å gi retning, drive utvikling og skape engasjement
• Er strukturert, har god arbeidskapasitet og evne til å prioritere
• Er relasjonssterk, lyttande og tilgjengeleg – med eit ope «dør-prinsipp»
• Motiverer og engasjerer medarbeidarar, og utfordrar til kompetanseheving
• Er endringsvillig, innovativ og har eit tydeleg forbetringsperspektiv
• Evnar å gi konstruktive tilbakemeldingar og viser relasjonelt mot
• Er varm, raus og respektfull, med humor og sosial kompetanse
• Har evne til å sjå heilskapen i organisasjonen og samarbeide godt på tvers
• Er open, reflektert og audmjuk i eige leiarrolle

Vi tilbyr

• Ei meiningsfull leiarstilling i ein barnehage med tett fagmiljø og oversiktleg struktur
• Engasjerte og kompetente medarbeidarar
• Tett samarbeid med andre styrarar i sjukehusbarnehagane
• Gode moglegheiter for fagleg og leiarfagleg utvikling
• Løn og vilkår i samsvar med gjeldande avtaleverk

Vi oppfordrar alle søkarar til å nytte Vitnemålsportalen for å laste opp verifiserte vitnemål og karakterutskrifter, der det er mogleg. Har du utdanning frå utlandet, legg ved godkjenning frå Direktoratet for høgare utdanning og kompetanse.

Helse Bergen, Haukeland universitetssjukehus, har nærare14.000 tilsette som har som mål å gi best mogleg helsehjelp til pasientane våre, og rett opplæring til pasientar og pårørande. Kvart år behandlar vi over 900.000 pasientar og bidreg i utdanninga av fleire tusen helsearbeidarar. Forsking og innovasjon er og viktige oppgåver i sjukehuset. Les meir på www.helse-bergen.no eller facebook.

Helse Vest skal så langt som råd avspegle mangfaldet i befolkninga.  Vi ønsker å rekruttere medarbeidarar uavhengig av kjønn med ulik kompetanse, fagkombinasjonar, livserfaring og perspektiv for å bidra i spesialisthelsetenesta.