Helsefagleg rådgivar innanfor flyktning- og migrasjonshelse
UDI
- Frist 16.12.2022
- Ansettelsesform Engasjement
Helsefagleg rådgivar innanfor flyktning- og migrasjonshelse
Trivst du med ein variert arbeidskvardag og vil bruke kompetansen din på eit viktig samfunnsoppdrag som har innverknad på livssituasjonen til enkeltmenneske? Då er stillinga som helsefagleg rådgivar ved UDIs regionkontor i Bergen noko for deg. Du blir ein del av eit dynamisk og tverrfagleg arbeidsmiljø med høg fagleg kompetanse og stort engasjement.
Regionkontor Vest i Bergen er ein del av mottaks- og returprosessen i UDI. Dette er prosessen for brukarar som har krav på eit mottakstilbod og ytingar knytte til dette. Vi er ein beredskapsorganisasjon, og migrasjonssvingingane har direkte innverknad på arbeidet vårt ved at vi har ansvaret for å opp- og nedskalere mottaksplassar etter behov. Som følgje av at det kjem fleire flyktningar og asylsøkjarar til landet, treng vi no å styrkje oss med to midlertidige stillingar innan flyktning- og migrasjonshelse ut 2023 med mogleg forlenging.
Om arbeidsoppgåvene:
Du blir ein del av eit tverrfagleg team som har ansvaret for UDIs arbeid for personar med spesielle behov i mottakssystemet på nasjonalt nivå. Oppgåvene til teamet er å sikre at menneske med særskilde behov blir tidleg identifiserte, at dei får vurdert kva behov dei har for helse- og omsorgstenester, og at det blir sett i gang nødvendige tiltak. Saman med teamet skal du avgjere eigna butilbod og tenester. Du skal òg gi tilråding om den vidare oppfølginga. Dette inneber å behandle søknader om ulike tiltak, rettleie mottakstilsette ved særskilde butilbod og andre UDI-tilsette om oppfølging av desse bebuarane. Du kjem til å samarbeide med kommunar, statsforvaltarar, IMDi og andre etatar, for eksempel spesialisthelsetenesta og politiet. Gjennom dette samarbeidet blir ei av oppgåvene dine å medverke til at mottaksbebuarane får oppfylt retten dei har til helsetenester.
I tillegg til å løyse oppgåver saman med teamet for særskilde saker kan du komme til å få ansvar for å følgje opp eit mottak og behandle ulike typar saker som regionkontoret har ansvar for. Som mottaksoppfølgjar og kontraktforvaltar vil du følgje opp avtalane UDI har inngått med leverandørar for drift av asylmottak, og kvalitetssikre at drifta er i tråd med krava vi stiller. Du skal rettleie tilsette i asylmottak om innhaldet i krav til drifta. Du skal òg behandle søknader om økonomiske ytingar for bebuarar i mottak. Du kjem til å samarbeide tett med leiarar og saksbehandlarar på regionkontoret og vere ein del av tverrfaglege team på tvers av regionane og UDI. Du må rekne med noko reising i samband med oppfølginga av asylmottak.
Mottak og retur har òg ansvaret for assistert retur og for arbeidet med å førebu busetjing i kommunar. Alle mottak utfører desse oppgåvene, og du vil også få retur- og busetjingsoppgåver ved behov.
Vi er opptekne av læring og kontinuerleg forbetring for å sørgje for god økonomiforvaltning, internkontroll og gode tenester til brukarane. Det er viktig for oss at du er med på å vidareutvikle tenestene våre.
Kvalifikasjoner
Du må ha
- minimum treårig helse- eller sosialfagleg høgskule- eller universitetsutdanning. Anna utdanning saman med solid og relevant arbeidserfaring kan kompensere for utdanningskravet
- god organisasjonsforståing av helsevesenet og helseforvaltninga på nasjonalt, regionalt og lokalt nivå
- god digital forståing, gjerne erfaring med Office 365
- svært god munnleg og skriftleg framstillingsevne på norsk
Det er ønskeleg med
- relevant arbeidserfaring, gjerne frå fylkeslege, kommunale helsetenester eller offentleg forvaltning
- kjennskap til utlendingsforvaltninga
- kjennskap til flyktning- og migrasjonshelse
- saksbehandlingskompetanse
- erfaring frå rettleiings- og formidlingsarbeid
- erfaring med oppfølging av kontraktar og tilsynsarbeid
Personlige egenskaper
- Du identifiserer deg med UDIs kjerneverdiar: menneskeverd, profesjonalitet og heilskap
- Du er analytisk, strukturert og god til å prioritere
- Du er sjølvstendig, løysingsorientert og evnar å sjå ting i samanheng
- Du er ein lagspelar med svært gode samarbeidsevner
- Du er flink til å byggje relasjonar
- Du er god på å formidle fag og komplekse problemstillingar på ein lettfatteleg måte.
- Du har stor arbeidskapasitet og trivst med mange arbeidsoppgåver parallelt.
Vi vil leggje stor vekt på at du er personleg eigna.
Vi tilbyr
- ei spennande rolle som inneber samarbeid på tvers av einingar i region- og mottaksavdelinga og eksternt med UDIs leverandørar og offentlege aktørar
- ei verksemd med eit av Noregs viktigaste samfunnsoppdrag, prega av høg fagleg kompetanse, stort engasjement og dyktige medarbeidarar
- fem veker ferie, fleksitidsordning og høve til å trene i arbeidstida
Stillinga er lønt som rådgivar/seniorrådgivar (1434/1364) i lønnsspennet mellom 500 000 og 680 000 kroner brutto per år, avhengig av kvalifikasjonar. For spesielt kvalifiserte kandidatar kan høgare lønn vurderast. Det blir trekt 2 % frå lønna til Statens pensjonskasse, som sikrar deg gode ordningar for pensjon, lån og forsikring.
I Utlendingsdirektoratet er vi opptekne av mangfald, og vi oppfordrar derfor alle kvalifiserte til å søkje hos oss, utan omsyn til alder, kjønn, funksjonshemming, hòl i CV-en og nasjonal eller etnisk bakgrunn. Vi tilpassar arbeidsplassen dersom du har behov for det.
Berre kandidatar som søkjer via Webcruiter, blir vurderte for stillinga. Du må fylle ut Webcruiters CV- og søknadsfelt sjølv om du vel å leggje ved søknad/CV i eige format i tillegg. Du må hente vedlegg frå vitnemålsportalen i søknadsprosessen i Webcruiter. Om du har utdanning frå utlandet, må du leggje ved godkjenning frå Nokut.
I samsvar med offentleglova kan namnet til ein søkjar bli offentleggjort sjølv om han/ho har bedt om ikkje å bli oppført på søkjarlista. Vedkommande vil i så fall bli varsla.
Om arbeidsgiveren
- Sektor: Offentlig
- Antall stillinger: 2
- Sted: Kaigaten 5, 5015 Bergen
- Bransje: Annet, Helse og omsorg, Juridiske tjenester
- Stillingsfunksjon: Helsepersonell, Rådgivning, Saksbehandler
Nøkkelord
Utlenindingsforvaltning, Migrasjon, Flyktninghelse, Migrasjonshelse, Rådgivning
- FINN-kode 283156930
- Sist endret