Har du lyst til å jobbe med frivilligpolitikken? Vi søkjer ein engasjert medarbeidar til eit eittårig engasjement

Om stillinga

Er du ein person med interesse for frivilligpolitikk, politiske prosessar og kunst og kultur for barn og unge? Kultur- og likestillingsdepartementet (KUD) har ledig eit eittårig engasjement som førstekonsulent/rådgivar i avdeling for sivilsamfunn og idrett (SI2). Seksjonen har blant anna hovudansvaret for sivilsamfunnsområdet, arbeidet med rammevilkår for frivilligheita, og for barne- og ungdomskultur og det frivillige kulturlivet. 

KUD er eit relativt lite departement med stor offentleg merksemd rundt sakene vi arbeider med. Hos oss får du ein variert og dynamisk arbeidskvardag med høg aktualitet og tett kontakt med både politiske prosessar og den frivillige sektoren. Som førstekonsulent/rådgivar blir du ein viktig del av eit tverrfagleg fagmiljø med engasjerte og kompetente kollegaer.

Arbeidsoppgåver

Vi søkjer deg som vil arbeide med et breitt spekter av oppgåver innanfor frivilligpolitikk og barne- og ungdomskultur. Stillinga inneber å utarbeide avgjerdsgrunnlag og å gje faglege råd til den politiske leiinga, og dessutan bidra i det løpande forvaltnings- og utviklingsarbeidet på feltet. Dette omfattar mellom anna:

• utarbeiding av saksgrunnlag, notat, analysar og faglege råd til politisk leiing
• tilskotsforvaltning og behandling av søknader
• bidrag til meldings- og strategiarbeid, utgreiingar og utkast til talar
• saksbehandling, enkelthenvendelser og vurdering av møteførespurnader
• dialog og samarbeid med underliggjande etatar og aktørar i kultursektoren

Du vil òg kunne få oppgåver for andre seksjonar i avdelinga og i KUD.

Kvalifikasjonar

Du må ha:

• høgare utdanning, med fullført grad på minimum bachelornivå - helst innan samfunnsvitskap, økonomi eller juss
• god forståing av samanhengen mellom politikk og forvaltning
• god evne til å uttrykkje deg klart og presist på norsk, både skriftleg og munnleg

Det er ein fordel om du har:

• relevant arbeidserfaring, gjerne frå offentleg forvalting
• kunnskap om frivillig sektor

Personlege eigenskapar:

Vi ser etter deg som:

• er positiv og tek initiativ
• samarbeider godt og gjerne deltar i faglege diskusjonar
• er analytisk, samfunnsorientert og løysingsorientert
• arbeider sjølvstendig
• er fleksibel og effektiv i arbeidsutføringa

Vi vil leggje vekt på om du er personleg eigna til stillinga og på kva motivasjon du har for stillinga og arbeidsområdet.

Den som blir tilsett i stillinga, må kunne autoriserast for tilgang til informasjon som er gradert som BEGRENSET etter sikkerhetsloven.

Vi tilbyr

• innplassering som førstekonsulent/rådgivar med ei brutto årslønn frå 570 000 til 710 000 kroner
• fleksibel arbeidstid, med sommar- og vintertid
• høve til å trene i arbeidstida, tilgang til treningsrom og treningstilbod
• medlemskap i Statens pensjonskasse (SPK) med gode vilkår for pensjon, bustadlån og forsikring
• introduksjonsprogram for nytilsette og gode høve til kompetanseutvikling gjennom KUD-skulen og Departementsakademiet
• eit kunnskapsrikt, inkluderande og uformelt arbeidsmiljø

Vi held til i fine lokaler i nytt regjeringskvartal. 

Kvardagen i departementsfellesskapet er prega av varierte og utfordrande arbeidsoppgåver. Vi har eit omfattande og viktig samfunnsoppdrag, og hos oss får du høve til å vere med på å utvikle den statlege politikken og forvaltninga av våre politikkområde.

Kultur- og likestillingsdepartementet er ein del av eit departementsfellesskap som er miljøsertifisert, og vi jobbar aktivt og systematisk med berekraftsansvaret i sektorane våre.

Inkluderande arbeidsliv og mangfald

Vi meiner at mangfald er ein styrke. Vi ønskjer medarbeidarar med ulik kompetanse og livserfaring og ulike fagkombinasjonar og perspektiv slik at vi kan løyse oppgåvene våre endå betre.

Kultur- og likestillingsdepartementet har som mål å tilsetje fleire personar frå underrepresenterte grupper. Les meir om krava for positiv særbehandling på Arbeidsgiverportalen (https://arbeidsgiver.dfo.no/strategisk-hr/inkluderingsarbeid/bli-bedre-pa-rekruttering/hvordan-skrive-stillingsannonser-som-inkluderer/positiv-saerbehandling-nar-man-soker-jobb-i-staten?size=n_20_n).

Vi vil leggje til rette for medarbeidarar som har særskilde behov. Aktuelle tiltak kan til dømes vere å skaffe tekniske hjelpemiddel, tilpasse møblar eller endre rutinar, arbeidsoppgåver og arbeidstid.

Offentleg søkarliste og kontakt

Dei som søker, må vere merksame på at opplysningar om dei kan bli offentleggjorde sjølv om søkarane ber om ikkje å bli oppførte på den offentlege søkarlista. Departementet vil svare på krav om unntak frå den offentlege søkarlista før ho blir offentleggjord.

Vil du vite meir om stillinga, kan du ta kontakt med avdelingsdirektør Tonje Johansson på telefon 22 24 80 71

Om avdelinga 

Avdelinga har ansvar for den statlege idrettspolitikken, barne- og ungdomskultur, frivillig kulturliv og det overordna ansvaret for koordinering og samordning av staten sitt forhold til frivillig sektor. Avdelinga har ansvar for forvaltinga av overskotet frå Norsk Tipping til idrettsformål, til samfunnsnyttige og humanitære organisasjonar, Den kulturelle skulesekken og Frifond.

I det overordna ansvaret for frivilligpolitikken ligg mellom anna ansvaret for meirverdiavgiftskompensasjon til frivillige organisasjonar, forsking på sivilsamfunn og frivillig sektor, frivilligregisteret og forenkling.