Aspirantkurs - for å bli brannkonstabel på deltid

Nordhordland brann og redning (NHBR) treng fleire vikarar og deltidstilsette knytt til alle våre stasjonar, og søkjer derfor nye kandidatar til aspirantkurs.

Aspirantkurs er grunnleggjande og obligatorisk opplæring for deg som ynskjer å arbeide som brannkonstabel i deltidsstyrken vår.      

Etter fullført og bestått kurs blir du vikar som brannkonstabel, og kan søkje ledige stillingar i deltidsstyrken.

Kva vil det seie å være brannkonstabel i deltidsstyrken?

Å ha ei deltidsstilling som brannkonstabel i Nordhordland brann og redning, vil seie at du er i beredskap for å rykke ut ved brann, ulukker og andre akutte hendingar i nærmiljøet, i tillegg til at du har ein annan hovudjobb. 

Du har med deg eit samband i det daglege. Når du har vakt (ca. kvar 5. veke på kveld/helg/natt) og alarmen går, må du møte opp på brannstasjonen i løpet av kort tid. Når du ikkje har vakt, rykker du likevel ut på større hendingar der det er behov for ekstra mannskap.  

Som deltidskonstabel forpliktar du deg til å delta på i overkant av 40 øvingstimar i året, i tillegg til vaktstifte og andre naudsynte kurs.

For å være deltidstilsett brannkonstabel, må du bu i nærleik til ein av våre brannstasjonar/depot for å overhalde responstida.

Du treng ikkje spesifikk utdanning for å være med i deltidsstyrken, sidan du vil få relevant opplæring og kursing hjå oss. 

Det er viktig at du avklarar med din hovudarbeidsgjevar om biarbeid i brann og redning.

Krav til deltidsstillinga:

• Uttømmande politiattest etter brann og eksplosjonsvernlova §18 - vert etterspurt ved tildeling av kursplass.

• Godkjend og gyldig helseattest - vert etterspurt ved tildeling av kursplass.

• Førarkort klasse B.

• Bu innan 10 minutt køyretid til ein av brannstasjonane/depota våre.

• Bestå fysisk test - testen er ein del av opptaket.

• Være fysisk og psykisk skikka.

Om du har lengre køyreavstand enn 10 min. til ein av stasjonane, kan du likevel bli vurdert for kurset.

Kven er du?

Vi ser etter deg som ynskjer om å hjelpe andre, å utvikle deg personleg og være ein del av eit unikt samhald i eit lag. 

Som brannkonstabel i Nordhordland brann og redning er du med å rykke ut når naboen, det lokale næringsbygget eller andre i lokalsamfunnet treng deg. Du kan være med å bidra til å redde liv, verne om verdiar og skape tryggleik der du bur. 

Ynskjer du å gjere ein konkret og livsviktig forskjell i ditt lokalmiljø? For mange tilsette er det å være brannkonstabel på deltid, meir ein livsstil og lidenskap enn ein jobb. 

Personlege eigenskapar vert særleg vektlagt. 

Er det deg vi ser etter?

Som brannkonstabel tilbyr me:

• Ein meiningsfull arbeidskvardag kor du bidrar til tryggleik for sikkerheit i lokalsamfunnet.

• Godt arbeidsmiljø og gode engasjerte kollegaer.

• Oppfølging og rettleiing på aspirantkurs og som tilsett.

• God pensjonsordning i KLP.

• Tilsetjing i samsvar med gjeldande lov- og avtaleverk.

Prosess mot tilsetting som brannkonstabel deltid

Søknad om aspirantkurs

I søknaden skriv du kort om motivasjon for kvifor du søkjer, personlege eigenskapar, fysisk form og relevant erfaring/kompetanse/utdanning/kurs/sertifikat. 

Politiattest og helseattest skal ikkje leggjast ved denne søknaden, det vert etterspurt seinare.

Opptak til aspirantkurs: 

Aktuelle kandidatar til aspirantkurs vert kalla inn til opptak (ca. 2 timar) i starten av november, som blant anna innehalde intervju og fysisk test. Du får meir informasjon om opptaket når du vert kalla inn. 

Aspirantkurs:

Aspirantkurset er grunnleggjande og obligatorisk opplæring for deg som ynskjer å arbeide som brannkonstabel i deltidsstyrken vår. Kurset går over tre helger på totalt 60 timar, og gir grunnleggjande teoretisk og praktisk opplæring innan brann og redning. Meir informasjon om kurset kjem når du får tilbod om plass på kurset.

Helgene for aspirantkurset er:

                             12. - 14. Februar: fredag kl. 17 - 21, lørdag og søndag kl. 09 - 17

                             19. - 21. Februar: fredag kl. 17 - 21, lørdag og søndag kl. 09 - 17

                             12. - 14. Mars: fredag kl. 17 - 21, lørdag og søndag kl. 09 - 17

For å bestå og fullføre kurset, må du delta på ALLE kursdagane på aspirantkurset så det er naudsynt at ein planlegg dette i kalendaren når ein søkjer.

Brannkonstabel deltid:

Etter fullført og bestått aspirantkurs, fungerar du som vikar brannkonstabel deltid og kan søkje ledige stillingar i deltidsstyrken. 

NB! Yrket som brannkonstabel er erfaringsbasert, og vidare oppfølging og opplæring vert gjeve når ein er med i deltidsstyrken.

Me er Alver

Me får vere der frå aller fyrste stund, og vi får følgje deg gjennom livet!

Video: https://www.youtube.com/watch?v=_xHE9zF24G4&ab_channel=Alverkommune