Vi søkjer ein økonom til seksjon for havbrukspolitikk og økonomi

Om Havbruksavdelinga

Havbruksnæringa er ei av Noregs viktigaste eksportnæringar, og betyr mykje for verdiskaping og aktivitet langs heile kysten. Havbruksavdelinga har i dag rundt 20 tilsette, og her får du jobbe med forvalting og utvikling av næringa. Hos oss får du brynt deg på avvegingar mellom næringsutvikling og miljøomsyn, og du vil arbeide i kryssingspunktet mellom fag og politikk. Tilsetjinga skal styrke avdelinga si kapasitet og kompetanse innan økonomi og forvalting. 

Seksjon for havbrukspolitikk og -økonomi skal utvikle ein næringspolitikk som legg til rette for å realisere havbruksnæringa sitt verdiskapingspotensial innanfor berekraftige rammer. Seksjonen har ansvar for løyvesystemet for havbruk, mellom anna tildeling av nye løyve og utvikling av rammeverk for havbruk til havs. 

Arbeidsoppgåver

Havbruksavdelinga søkjer ein person som mellom anna skal arbeide med forvaltningsmessige problemstillingar, som utvikling av økonomiske rammevilkår og gjennomføring av næringspolitikken på havbruksområdet. Du vil til dømes kunne bli sett til å arbeide med stortingsmeldingar og strategiar, budsjettarbeid, lovarbeid, forskrifter og høyringsnotat. I tillegg vil du hjelpe til med førebuing av saker, møte og reiser for den politiske leiinga i departementet, og du kan elles verte sett til eit stort spenn av oppgåver på heile avdelinga sitt område. 

Kvalifikasjonar og personlige eigenskapar

Utdanning på masternivå som samfunnsøkonom, siviløkonom eller samfunnsvitar med økonomi i fagkretsen, med gode resultat.  

Vi søker ein person med forvaltningskompetanse og god forståing av politiske beslutningsprosessar. Vi legg vekt på interesse for offentleg forvaltning og utgreeingsarbeid, og god evne til å utrykkje seg skriftleg og munnleg, gjerne òg på engelsk. Søkjarar kan gjerne ha kjennskap til fagområdet og relevant regelverk frå før og bør ha evne til å arbeide sjølvstendig og kome med nye idear. Du må ha evne til kritisk og analytisk tenking og god gjennomføringsevne. Du må kunne jobbe godt både sjølvstendig og i lag med andre. Personlege eigenskapar vil bli vektlagde.

For stilling som seniorrådgjevar krevst minst fire års relevant erfaring. For særskilt kvalifiserte søkjarar kan stilling som utgreiingsleiar eller fagdirektør vurderast. 

Vi tilbyr

• fast stilling som rådgjevar/seniorrådgjevar
• lønsplassering ut frå kvalifikasjonar og erfaring innan spennet 640 000 - 760 000 kr som rådgjevar og innan spennet 680 000 - 900 000 kr som seniorrådgjevar per år. Høgare lønn kan vurderast for særskilt kvalifiserte søkarar
• interessante, utfordrande og nyskapande arbeidsoppgåver i eit aktivt og engasjert arbeidsmiljø 
• kompetanseutvikling og fagleg oppdatering
• fleksibel arbeidstidsordning og betalt overtid
• høve til trening i arbeidstida
• god ordningar for lån, forsikring og pensjon gjennom Statens pensjonskasse (https://www.spk.no/)
• kontorstad i nye og moderne lokale i Regjeringskvartalet

Praktisk informasjon

Nærare opplysningar kan ein få ved å ta kontakt med avdelingsdirektør Kjersti Vartdal (tlf. 980 21 013).

Ein kan sende elektronisk søknad via lenka "Søk stillinga" på denne sida. Fullstendige opplysningar om relevant utdanning og arbeidserfaring må ein fylle inn i det elektroniske skjemaet, og vitnemål og attestar må leggjast ved. 

Søknadsfrist er 6. september 2026.

Anna

Me gjer merksam på at opplysningar om søkjaren kan bli offentlege sjølv om søkjaren har bedt om ikkje å bli oppført på søkjarlista, jf. offentleglova § 25 andre ledd. Søkjaren vil bli varsla dersom ønsket ikkje vert teke til følgje.

For søkjarar som opplyser at dei har nedsett funksjonsevne eller hol i CV-en, gjer vi merksam på at denne opplysninga kan bli brukt til statistikkføremål i samband med regjeringa si inkluderingsdugnad dersom vedkomande blir tilsett.