IKT-konsulent

Vi er med og leverer tenester til alle innbyggarane i Vestland fylkeskommune. Vi har meir enn 150 ulike IKT-system og ca. 6.500 brukarar spreidd på fleire titals lokasjonar i fylket!
Seksjon IKT har ansvar for lokal IKT-drift av dei fleste IKT-system som vert nytta i Vestland fylkeskommune, samt infrastruktur som knyter saman lokasjonane. Seksjon IKT skal ta i vare alle IKT-systema og all IKT-infrastruktur, og sikre at dette til ei kvar tid har riktig kapasitet, oppetid og teknisk sikring. I tillegg skal seksjon IKT understøtte brukarane og verksemda sitt behov. Seksjonen er organisert i fire faggrupper; service, tenesteleveranse, systemdrift og kjernedrift og har totalt 80 medarbeidare og 37 lærlingar.
Faggruppa service har ansvar for å sikre høg og profesjonell service og oppfølging på IKT-området gjennom tenesteavtale og gode sjølvhjelpsløysingar. Dei tilsette i faggruppa er i tett dialog med faggruppene tenesteleveranse, systemdrift og kjernedrift.
I faggruppa service er det ledig stilling som IKT-konsulent, med arbeidsstad Bergen.

Arbeidsoppgåver

• Utføre 1. linje og 2. linje support (Single Point of Contact) til sluttbrukare med mål om å løyse flest mogeleg saker ved første kontakt (via telefon, fjernstyring, e-post og web-skjema).
• Registrere, vidaresende og følge opp saker til eksterne leverandørar
• Proaktiv rolle til IKT-kvardagen og utvikling av service
• Bidra aktivt i den strategiske utviklinga av fagområda
• Delta proaktivt i aktuelle faglege fora som ulike fagteam og ev. prosjektgruppe

Oppgåver vil og vere brukaradministrasjon, ha lisensoversikt og bestille/tildele lisensar. Støtte IKT-konsulentar ute på våre lokasjonar. Alle våre saker blir registrert og følgt opp i vårt saksbehandlingssystem TOPdesk, som tilsette på service er med å administrere og utvikle.

Vi ønskjer at brukarane skal kunne løyse ting sjølv, derfor er ein del av arbeidet å lage brukarrettleiingar og anna nødvendig dokumentasjon. Dei som arbeider på service har ei viktig rolle med å avdekke gjentakande feil, og gjerne kome med forbetringsforslag.

Service har også ansvar for ITIL prosessane incident og service request og for å sikre at vi handterer førespurnader på best mogeleg måte for brukarane våre.

Kvalifikasjonar

• Fagbrev i IKT-fag eller høgare
• Erfaring frå arbeidsoppgåver nemnd ovanfor
• Erfaring med ITIL rammeverk og prosessane incident og service request tel positivt
• Erfaring med administrering av M365 og AD/Azure/Entra ID tel positivt

Personlege eigenskapar

• Særs serviceinnstilt med fokus på brukarbehov og brukartilfredsheit
• Positiv innstilling og flink i dialogen med menneske
• Proaktiv, løysingsorientert og opptatt av å få jobben gjort til rett tid
• Omgjengeleg med gode samarbeidseigenskapar, likar å jobbe i team
• Vilje til løpande fagleg oppdatering og fornying
• God norsk skriftleg og munnleg framstillingsevne

Serviceinnstilling er viktig for at våre brukare skal oppleve å bli ivaretatt. Dei som arbeider på service er også seksjon IKT sitt ansikt ut mot resten av organisasjonen. Vi ønskjer å møte menneske med respektfull kommunikasjon og god rådgjeving. Har du eit sterkt ønskje om å hjelpe brukarane, så trur vi også at du vil ta initiativ, finne løysingar og samarbeider godt med dine kollegar om vårt felles mål; fornøgde brukarar.

Våre verdiar er open, kompetent og modig. Vi håpar at du kan kjenna deg igjen i desse.

Vi tilbyr

• Stillingsnemning ingeniør/rådgjevar/spesialkonsulent/konsulent etter kvalifikasjonar og erfaring
• Løns- og arbeidsvilkår i samsvar med gjeldande avtalar i Vestland fylkeskommune
• Gode forsikring- og pensjonsordningar
• Fleksibel arbeidstid
• Faglege utfordringar og stimulerande arbeidsmiljø

Vi har eit stort IKT-miljø som vil gje deg faglege utfordringar. Tilsette i seksjon IKT har høg grad av trivsel på arbeidsplassen. Vi har ein eigen teams kanal der kven som helst kan ta initiativ til ein sosial aktivitet. Nokon har vore på paddel-tennis, andre har vore på spelekveld.

Vi har ein samling for heile avdelinga kvart år, i tillegg til ein samling pr fageining. Vi ønskjer og at våre tilsette skal utvikle seg innanfor arbeidet sitt; dette gjere vi gjennom intern opplæring eller eksterne kurs og seminar.

Andre opplysningar:
Administrasjonsmålet i fylkeskommunen er nynorsk.

Arbeidsstad Bergen.

Vestland fylkeskommune har ansvar for å utvikle Vestland fylke og å yte viktige tenester for samfunnet. Vi gir vidaregåande opplæring, tannhelsetenester og kollektivtransport til innbyggjarane i fylket. Vi har ansvar for vegsamband og legg til rette for næringsutvikling, fritidsopplevingar, kulturliv og inkludering. Klima og miljø er premiss for samfunnsutviklinga og som verdiskapingsfylke er Vestland ein nasjonal pådrivar for eit desentralisert Noreg.

Vi skal vere ein trygg og inkluderande arbeidsplass for alle, uavhengig av kjønn, alder, etnisk bakgrunn, religion, livssyn, funksjonsevne, seksuell orientering og kjønnsidentitet. Hos oss jobbar vi aktivt med mangfald, inkludering og likestilling. Mangfald bidrar til auka innovasjon, berekraft, effektivitet, læring og trivsel. Vi vil at dei som jobbar hos oss skal spegle samfunnet i Vestland.

Vi gjer merksam på at i følgje offentleglova § 25, 2. ledd, kan opplysningar om søkjaren bli offentleggjort sjølv om du har oppmoda om å ikkje bli ført på offentleg søkjarliste. Dersom du har bedt om unntak frå offentleg  søkjarliste vil du alltid bli varsla før søkjarlista blir offentleggjort. 

Alle nye tilsetjingar blir gjort med ei prøvetid på 6 månader. Administrasjonsmålet vårt er nynorsk.