Er du oppteken av helse- og omsorgstenester og kommunal planlegging?

Er du oppteken av helse- og omsorgstenester og kommunal planlegging? Vi ser etter deg som kan gjere ein skilnad - både for kommunane og for innbyggjarane. Er du klar for å ta ansvar, tenke nytt og bidra til god samfunnsplanlegging og heilskapleg samfunnsutvikling? Då håpar vi du søkjer!

Helse-, sosial- og barnevernsavdelinga har ei ny fast stilling frå 1. april 2026. Avdelinga har ulike rådgjevings- og forvaltningsoppgåver, og fører tilsyn med barneverns-, helse-, omsorg- og sosialtenestene. Avdelinga har brei kontakt med kommunar, spesialisthelsetenesta og nasjonale styresmakter. Vi behandlar enkeltsaker og fører tilsyn med kommunar, helseføretak og institusjonar, gir råd og rettleiing og medverkar til gjennomføring av nasjonale mål. Fylkeslegen leier avdelinga, som har tilsette med kompetanse innan barnevern, sosial- og helsefag, rettsvitskap, pedagogikk, samfunnsfag og administrasjon. Avdelinga har tre seksjonar og kontorstader på Leikanger og i Bergen. Stillinga er knytt til seksjon kommunehelse og -omsorg med kontorstad på Leikanger eller i Bergen. Du må rekne med ein del reiseaktivitet, og bør difor ha førarkort.

Vi søkjer ein engasjert og kunnskapsrik rådgjevar som kan jobbe systematisk og strategisk retta mot kommunane og arbeidet deira med utvikling av helse- og omsorgstenestene og heilskapleg samfunnsplanlegging. Her vil du jobbe tverrfagleg, og  bidra til utviklinga av berekraftige og framtidsretta helse-  og omsorgstenester gjennom god planlegging.

Arbeidsoppgåver

• Du får ein spennande og variert arbeidskvardag, der du bidreg til god planlegging og utvikling av helse- og omsorgstenestene for å møte behova i framtida.
• Du vil støtte og rettleie kommunane i sine analyse- og planprosessar på helse- og omsorgsfeltet, i strategisk kompetanseplanlegging og bidra til heilskapleg samfunnsplanlegging.
• Du vil jobbe med regional samordning av statlege satsingar, innsatsområde og verkemiddel og bidra til at kommunane ser satsingane i samanheng i sitt planarbeid. 
• Du vil jobbe på tvers av fagområde, samarbeide med engasjerte kollegaer og eksterne aktørar og bidra til gjennomføring av statlege satsingar og utvikling i heile Vestland.
• Du vil også bidra i analysearbeid internt i embetet. 

Ønskjelege kvalifikasjonar

• Høgare utdanning innanfor helsefag, med eventuell relevant etter- og vidareutdanning. Høgare utdanning innan samfunnsfag kan også vere aktuelt.
• Plankompetanse og erfaring med planprosessar og utviklingsarbeid i kommunar. 
• Kompetanse om og erfaring frå kvalitets- og forbetringsarbeid i helse- og omsorgstenestene. 
• Relevant erfaring frå kommunale helse- og omsorgstenester.
• Gode kommunikasjonsevner på norsk, munnleg og skriftleg.       
• God digital kompetanse. 
• Innsikt i kommunal planlegging, folkehelsearbeid, kommunal økonomi og interkommunalt samarbeid.
• Erfaring med bruk av statistikk- og analysearbeid.
• Kunnskap om tverrfagleg og tverrsektorielt samarbeid.

Personlege eigenskapar

• Du må like å finne løysingar og kunne formidle kompliserte problemstillingar på ein god måte. 
• Du må ha evne til å arbeide sjølvstendig og strukturert, og samarbeide godt med andre.
• Vi legg stor vekt på gode samarbeidsevner, evne til systematisk arbeid, fleksibilitet og omstilling.

Som tilsett hos Statsforvaltaren får du

• interessante arbeidsoppgåver
• eit kompetent og tverrfagleg arbeidsmiljø
• ein arbeidsplass i utvikling
• medlemskap i Statens pensjonskasse med god pensjonsordning, gunstig bustadlån og forsikringsordning
• trening i arbeidstida
• delvis heimekontor 
• fleksibel arbeidstid
• løn i samsvar med vår lokale lønspolitikk

Vil du jobbe hos oss? | Statsforvaltaren i Vestland (https://www.statsforvalteren.no/nn/vestland/om-oss/vil-du-jobbe-hos-oss/)

Kontora våre i Leikanger og Førde ligg i kommunar som er omfatta av den nye ordninga for sletting av studiegjeld. Det vil seie at etter eitt år som yrkesaktiv kan du få sletta 25 000 kroner av studielånet ditt.

Vi ønskjer mangfald

Statsforvaltaren ønskjer mangfald, og vil leggje til rette for eit inkluderande arbeidsliv. Aktuell tilrettelegging kan for eksempel vere tekniske hjelpemiddel, tilpassing av møblar eller endringar av rutinar, arbeidsoppgåver og arbeidstid. 

Vi meiner at inkludering og mangfald er ein styrke. Vi ønskjer tilsette med ulik kompetanse, fagkombinasjonar, livserfaring og perspektiv for å bidra til endå betre oppgåveløysing.

Vi oppmodar alle kvalifiserte kandidatar til å søkje utan omsyn til alder, kjønn, nasjonal eller etnisk bakgrunn, funksjonsevne eller hol i CV-en. Vi oppmodar om å krysse av i jobbsøkjarportalen dersom du har nedsett funksjonsevne, hol i CV-en eller innvandrarbakgrunn. Dersom det er kvalifiserte søkjarar frå desse gruppene kallar vi inn minst ein søkjar i kvar av gruppene til intervju. 

Vilkår

Alle som søkjer stillinga må søkje digitalt gjennom rekrutteringsportalen Jobbnorge. Du må laste opp relevante vitnemål og attestar. Vitnemål og/eller karakterutskrifter hentar du frå vitnemålsportalen i Jobbnorge. Har du utdanning frå utlandet legg du ved godkjenning frå HK-dir (https://hkdir.no/utdanning-fra-utlandet). 

Når søknadsfristen er ute, vurderer vi søknaden din på bakgrunn av informasjonen du har sendt oss. Det er derfor viktig at du både i søknadsbrevet og CV-en, viser korleis kompetansen din fyller krava som er sett i utlysinga. 

Stillinga er lønna i stillingskode 1434 rådgjevar/1364 seniorrådgjevar, frå kr 610 000-770 000 brutto per år ut frå kvalifikasjonar og lokal lønnspolitikk. Stilling som seniorrådgjevar har strenge krav til kompetanse.  For særskilt kvalifiserte søkjarar kan vi vurdere høgare lønn. 

Dei første seks månadane er prøvetid. Du kan lese meir om det i statens personalhandbok (https://www.regjeringen.no/no/dokumenter/statens-personalhandbok/id3081747/).

Tenestemålet til embetet er nynorsk.

Offentleg søkjarliste blir utarbeidd etter søknadsfrist. Dersom du ønskjer å reservere deg frå oppføring må du grunngje dette. Du får varsel om reservasjon i rekrutteringsportalen dersom reservasjon ikkje blir teken til følgje.

Statsforvaltaren har eit heilskapsansvar for all statleg verksemd i fylket, og skal følgje opp vedtak, mål og retningslinjer frå stortinget og regjeringa. Vi skal dessutan fremje fylket sine interesser, og kan dermed ta initiativ både lokalt og overfor sentrale styringsmakter.


Statsforvaltaren kjenner kommunane, og er i kontakt med mange enkeltmenneske i ulike situasjonar og livsfasar.Vi jobbar heile tida for at omverda skal oppleve Statsforvaltaren som tilgjengeleg, nær og løysingsorientert.


Statsforvaltaren i Vestland er ein spennande arbeidsplass med seks avdelingar og kring 280 tilsette. Vi har delt lokalisering mellom Leikanger, Bergen og Førde – med hovudsete i Leikanger.