Har du helse- eller sosialfagleg utdanning, og ønsker å jobbe ut mot kommunane?

Om stillinga

Er du sjukepleiar/vernepleiar/sosionom eller har anna helsefagleg eller sosialfagleg utdanning, og ønsker å jobbe hjå Statsforvaltaren ut mot kommunane?

Helse-, sosial- og barnevern opprettar ei ny fast stilling frå 1. april 2026. Avdelinga har ulike rådgjevings- og forvaltningsoppgåver, og fører tilsyn med barnevern-, helse-, omsorg- og sosialtenestene. Avdelinga har brei kontakt med kommunar, spesialisthelseteneste og nasjonale styresmakter. Vi behandlar enkeltsaker og fører tilsyn med kommunar, helseføretak og institusjonar, gir råd og rettleiing og medverkar til gjennomføring av nasjonale mål. Fylkeslegen leier avdelinga, som har tilsette med kompetanse innan barnevern, sosial- og helsefag, rettsvitskap, pedagogikk, samfunnsfag og administrasjon. Avdelinga har tre seksjonar og kontorstader på Leikanger og i Bergen. Stillinga er knytt til seksjon kommunehelse og omsorg med kontorstad på Leikanger.

Arbeidsoppgåver

Arbeidsoppgåvene er varierte og i stor grad tverrfaglege. Dei femner alt frå formidling av informasjon, rettleiing og medverknad til gjennomføring av ulike nasjonale satsingar. Mykje av arbeidet vil vere å behandle klager og tilsynssaker. Oppgåvene kan bli endra avhengig av behov og kompetanse i seksjonen. 

Kvalifikasjonar

• Bachelor som sjukepleiar/vernepleiar/sosionom eller bachelor i andre helsefag/ sosialfag.
• Vidareutdanning og/eller masterutdanning innan helse/sosialfag blir vektlagt. 
• Erfaring med sakshandsaming frå offentleg/kommunal forvalting er ønskeleg. 
• God skriftleg og munnleg framstillingsevne på bokmål og nynorsk. 
• Gjerne erfaring frå klinisk praksis som ikkje ligg altfor mange år tilbake i tid. 
• Kjennskap til tilskotsforvaltning, og innsikt i IKT/ velferdsteknologi vert vektlagt.

Personlege eigenskapar

• Du må like å finne løysingar og kunne formidle kompliserte problemstillingar på ein god måte. 
• Du må kunne arbeide systematisk og sjølvstendig innan dei fristane som er sett og vere innstilt på å samarbeide nært med kollegaer. 
• Vi legg vekt på gode samarbeidsevner, evne til systematisk arbeid, analytisk refleksjon, fleksibilitet og omstilling.

Som tilsett hos Statsforvaltaren får du

• interessante arbeidsoppgåver
• eit kompetent og tverrfagleg arbeidsmiljø
• ein arbeidsplass i utvikling
• medlemskap i Statens pensjonskasse med god pensjonsordning, gunstig bustadlån og forsikringsordning
• trening i arbeidstida
• delvis heimekontor 
• fleksibel arbeidstid
• løn i samsvar med vår lokale lønspolitikk

Vil du jobbe hos oss? | Statsforvaltaren i Vestland (https://www.statsforvalteren.no/nn/vestland/om-oss/vil-du-jobbe-hos-oss/)

Kontora våre i Leikanger og Førde ligg i kommunar som er omfatta av den nye ordninga for sletting av studiegjeld. Det vil seie at etter eitt år som yrkesaktiv kan du få sletta 25 000 kroner av studielånet ditt.

Vi ønskjer mangfald

Statsforvaltaren ønskjer mangfald, og vil leggje til rette for eit inkluderande arbeidsliv. Aktuell tilrettelegging kan for eksempel vere tekniske hjelpemiddel, tilpassing av møblar eller endringar av rutinar, arbeidsoppgåver og arbeidstid. 

Vi meiner at inkludering og mangfald er ein styrke. Vi ønskjer tilsette med ulik kompetanse, fagkombinasjonar, livserfaring og perspektiv for å bidra til endå betre oppgåveløysing.

Vi oppmodar alle kvalifiserte kandidatar til å søkje utan omsyn til alder, kjønn, nasjonal eller etnisk bakgrunn, funksjonsevne eller hol i CV-en. Vi oppmodar om å krysse av i jobbsøkjarportalen dersom du har nedsett funksjonsevne, hol i CV-en eller innvandrarbakgrunn. Dersom det er kvalifiserte søkjarar frå desse gruppene kallar vi inn minst ein søkjar i kvar av gruppene til intervju. 

Vilkår

Alle som søkjer stillinga må søkje digitalt gjennom rekrutteringsportalen Jobbnorge. Du må laste opp relevante vitnemål og attestar. Vitnemål og/eller karakterutskrifter hentar du frå vitnemålsportalen i Jobbnorge. Har du utdanning frå utlandet legg du ved godkjenning frå HK-dir (https://hkdir.no/utdanning-fra-utlandet). 

Når søknadsfristen er ute, vurderer vi søknaden din på bakgrunn av informasjonen du har sendt oss. Det er derfor viktig at du både i søknadsbrevet og CV-en, viser korleis kompetansen din fyller krava som er sett i utlysinga. 

Stillinga er lønna i stillingskode 1434 rådgjevar/1364 seniorrådgjevar, frå kr 610 000-770 000 brutto per år ut frå kvalifikasjonar og lokal lønnspolitikk. Stilling som seniorrådgjevar har strenge krav til kompetanse.  For særskilt kvalifiserte søkjarar kan vi vurdere høgare lønn. 

Dei første seks månadane er prøvetid. Du kan lese meir om det i statens personalhandbok (https://www.regjeringen.no/no/dokumenter/statens-personalhandbok/id3081747/).

Tenestemålet til embetet er nynorsk.

Offentleg søkjarliste blir utarbeidd etter søknadsfrist. Dersom du ønskjer å reservere deg frå oppføring må du grunngje dette. Du får varsel om reservasjon i rekrutteringsportalen dersom reservasjon ikkje blir teken til følgje.

Statsforvaltaren har eit heilskapsansvar for all statleg verksemd i fylket, og skal følgje opp vedtak, mål og retningslinjer frå stortinget og regjeringa. Vi skal dessutan fremje fylket sine interesser, og kan dermed ta initiativ både lokalt og overfor sentrale styringsmakter.


Statsforvaltaren kjenner kommunane, og er i kontakt med mange enkeltmenneske i ulike situasjonar og livsfasar.Vi jobbar heile tida for at omverda skal oppleve Statsforvaltaren som tilgjengeleg, nær og løysingsorientert.


Statsforvaltaren i Vestland er ein spennande arbeidsplass med seks avdelingar og kring 280 tilsette. Vi har delt lokalisering mellom Leikanger, Bergen og Førde – med hovudsete i Leikanger.