Rådgivar – ekstern forskingsfinansiering

Vil du bidra til at fleire forskingsprosjekt vert realiserte og at forsking får gode rammer gjennom ekstern finansiering?

Vi søkjer ein strategisk og utviklingsorientert rådgivar som skal styrkje arbeidet med søknader til EU sitt rammeprogram Horisont Europa, Noregs forskingsråd og andre nasjonale og internasjonale finansieringskjelder. Stillinga gir ei unik moglegheit til å påverke korleis forsking og innovasjon vert utvikla og finansiert i ein av dei største helseinstitusjonane i landet.

Stillinga er organisatorisk plassert i FoU-avdelinga, Seksjon for forsking og innovasjon. Du vil inngå i eit kompetent og tverrfagleg team som arbeider med å leggje til rette for forsking og innovasjon, samstundes som du får ei sjølvstendig rolle med stor påverknadskraft i utviklinga av større forskingsprosjekt og satsingar.

Seksjon for forsking og innovasjon er ei stabsavdeling som yter rådgjeving og støtte til føretaksleiinga, klinikk- og avdelingsleiinga, i tillegg til forskarar. Seksjonen har ei sentral rolle i å leggje til rette for auka forskingsaktivitet og innovasjon. Som rådgivar vil bidra med å styrkje sjukehuset sitt arbeid med å hente ekstern finansiering og å leggje til rette for at større forskingsprosjekt får gode, realistiske og gjennomførbare rammer.

Arbeidsoppgåver

• Kartleggje moglegheiter, vilkår og rammer i utlysingar, og gi råd om innretning av prosjekt og søknader
• Gje råd til forskarar og fagmiljø i planlegging og utforming av søknader til mellom anna Horisont Europa, Noregs forskingsråd, stiftelsar og andre aktørar som lyser ut forskingsmidlar
• Hjelpe med søknader i tidlegfase ved å bidra til å identifisere behov for personell, drift og utstyr for å sikre gjennomførbare prosjekt.
• Kartleggje eksisterande ressursar og eigenandelar, og gi råd om finansiering i større satsingar
• Leggje til rette for strategisk oppgåve- og ressursfordeling mellom samarbeidspartnarar nasjonalt og internasjonalt
• Avklare og utarbeide budsjettgrunnlag for prosjekt i tett samspel med forskarar
• Kvalitetssikre budsjett i samspel med økonomiavdeling og andre prosjektdeltakarar
• Samhandle med administrative miljø hos partnarinstitusjonar for å sikre heilskaplege budsjettutforming
• Ha tett kontakt med finansieringskjelder og bidra i dialog med forskingsmiljøa
• Bidra til kunnskapsdeling og opplæring innan forskingsfinansiering i sjukehuset
• Andre oppgåver innan seksjonen sitt ansvarsområde

Kvalifikasjonar

• Relevant høgare utdanning på masternivå eller tilsvarande (kan vurdere unntak ved relevant erfaring)
• Erfaring frå forskingsadministrasjon og eller forskingsøkonomi er ønskeleg, inkludert kjennskap til utlysingar og søknadsprosessar
• Kjennskap til helseforsking og samhandlingsmønstera mellom sjukehus og universitets- og høgskulesektoren er ønskeleg
• Erfaring med større prosjekt eller satsingar er ein fordel
• God skriftleg og munnleg framstillingsevne på norsk og engelsk

Personlege eigenskapar

• Du arbeider sjølvstendig og nøyaktig
• Du arbeider strukturert og har god gjennomføringsevne, også i komplekse prosessar
• Du har god evne til å lytte, samarbeide og byggje relasjonar på tvers av fag og einingar
• Du har god munnleg og skriftleg formuleringsevne på norsk og engelsk
• Du har ei positiv haldning til å tileigne deg og dele kunnskap
• Du er eigna til å møte dei faglege og personlege krava som stillinga krevjer
  

Vi tilbyr

• Fast stilling med fleksibel arbeidstid
• Utfordrande og meiningsfylte oppgåver
• Fagleg utvikling
• Tverrfagleg og godt arbeidsmiljø
• Lønn etter avtale og god pensjonsordning
• Anna stillingstittel kan bli vurdert i særlege tilfelle

Vi oppfordrar alle søkarar til å nytte Vitnemålsportalen for å laste opp verifiserte vitnemål og karakterutskrifter, der det er mogleg. Har du utdanning frå utlandet, legg ved godkjenning frå Direktoratet for høgare utdanning og kompetanse.

Helse Bergen, Haukeland universitetssjukehus, har nærare14.000 tilsette som har som mål å gi best mogleg helsehjelp til pasientane våre, og rett opplæring til pasientar og pårørande. Kvart år behandlar vi over 900.000 pasientar og bidreg i utdanninga av fleire tusen helsearbeidarar. Forsking og innovasjon er og viktige oppgåver i sjukehuset. Les meir på www.helse-bergen.no eller facebook.

Helse Vest skal så langt som råd avspegle mangfaldet i befolkninga.  Vi ønsker å rekruttere medarbeidarar uavhengig av kjønn med ulik kompetanse, fagkombinasjonar, livserfaring og perspektiv for å bidra i spesialisthelsetenesta.