Førstekonsulent/rådgjevar

Skogsseksjonen er ein del av naturforvaltningsavdelinga i Klima- og miljødepartementet. Skogsseksjonen arbeider for å ta vare på naturmangfaldet i skog og ope lågland og kulturlandskap, og koordinerer arbeidet i avdelinga med truga natur. Seksjonen har i tillegg ansvar for departementet sitt arbeid med verneområdeforvaltning, Markalova, naturmangfaldlova, konsekvensutgreiingar og genmodifiserte organismar. Vidare har seksjonen ansvar for ulike budsjettpostar på statsbudsjettet som går til oppretting og forvaltning av verneområde, og til arbeid med truga natur. 

Vi er eit team med rundt ti medarbeidarar med eit sterkt samhald og ein hjelpsam kultur. Vi arbeider med spanande saker knytte til oppretting av naturreservat og andre verneområde, som gir deg eit unikt innblikk i arealforvaltninga. Gjennom ditt bidrag til statsbudsjettet vil du få god innsikt i budsjettprosessen, sentrale avgjerdsprosessar i regjeringa og samspel mellom regjering og Storting.

Arbeidsoppgåver:

Om stillinga:
Som førstekonsulent/rådgjevar vil du få ansvar for å utarbeide saksgrunnlag for ulike politiske avgjerder. Du vil særleg arbeide med saksgrunnlag for vedtak om skogvern og andre vernevedtak. Ansvarsområdet ditt vil omfatte koordinering av skogvernarbeidet og arbeidet i seksjonen med statsbudsjettet. I tillegg til dette vil du òg bidra med generell saksbehandling på andre område i avdelinga. Ein stor del av arbeidskvardagen din vil bestå av internt samarbeid med andre seksjonar i avdelinga og utstrekt samarbeid med andre departement, avhengig av saka.

Dine arbeidsoppgåver vil vere:

• Førebuing av vedtak om oppretting av verneområde
• Arbeid med statsbudsjettet innanfor seksjonen sitt ansvarsområde
• Generell saksbehandling
• Utstrekt samarbeid med naturvitarar, juristar og andre samfunnsvitarar

Kvalifikasjonskrav:

For å kvalifisere for stillinga må du ha: 

• Fullført relevant mastergrad innan samfunnsvitskap, fortrinnsvis innan samfunnsøkonomi. For nyutdanna må endeleg vitnemål liggje føre før tilsettingsvedtak blir fatta
• Mykje gode karakterar
• Svært gode formuleringsevner på norsk, både skriftleg og munnleg
• God samfunnsforståing og interesse for samspel mellom fag og politikk

I tillegg er det ønskjeleg at du har:

• Kjennskap til offentleg sektor og politiske prosessar
• Interesse for klima og miljøområdet 
   

Autorisasjon: Tilsette i Klima- og miljødepartementet må kunne autoriserast for tilgang til informasjon merka BEGRENSET etter sikkerhetsloven. Ønskjer du meir informasjon, kan du lesa meir på nsm.no. 

For å lukkast i stillinga må du ha:

• Ha god rolleforståing
• Vere sjølvstendig, strukturert og effektiv
• Ha gode samarbeidsevner og bidra positivt inn i arbeidsmiljøet i seksjonen
• Evne å setje seg raskt inn i nye område
• Vere analytisk og fagleg sterk

Personleg eignaheit vil bli tillagd stor vekt.

Utdanning og erfaring må dokumenterast med CV, vitnemål og attestar.

Kvifor skal du jobbe hos oss? 

Vi ønskjer deg velkomen inn i eit arbeidsfellesskap med dyktige og engasjerte kollegaer som er stolte av jobben sin. Hos oss får du gode moglegheiter for læring og utvikling. Du vil bidra til samfunnsmålet om eit grønt skifte og få eit unikt høve til å gi faglege råd til politisk leiing.

Klima- og miljødepartementet gir gode moglegheiter for fagleg utvikling, og vi er opptekne av at alle skal ha eit godt arbeidsmiljø. Vi tilbyr eit breitt spekter av sosiale, kulturelle og sportslege aktivitetar, mellom anna 1,5 time trening i arbeidstida kvar veke. Les meir om å jobba i KLD (https://www.regjeringen.no/no/dep/kld/stillinger/Jobbe-i-Klima--og-miljodepartementet/innsiktsartikler-jobbe-i-kld/mot-vare-medarbeidere/id2005908/).

Klima- og miljødepartementet har nyleg flytta inn i det nye regjeringskvartalet, med aktivitetsbasert kontorplasskonsept i den nye, moderne A-blokka. Les meir her (https://www.regjeringen.no/no/tema/plan-bygg-og-eiendom/regjeringskvartalet/nar-flytter-departementene-inn-og-nar-er-nytt-regjeringskvartal-ferdig/id3032581/).

Løn:

Stillinga er lønt som førstekonsulent (årsløn frå kr 580 000 til 660 000) eller rådgjevar (årsløn frå kr 650 000 til 770 000). Stillings- og lønsinnplasseringa avheng av erfaring og kvalifikasjonar. Som hovudregel blir det kravd to års relevant erfaring for å bli rådgjevar. Stillinga passar både for nyutdanna og for søkjarar med relevant erfaring. Karakterar inngå som ein del av vurderingsgrunnlaget. For søkjarar med erfaring vil det i tillegg bli lagt vekt på relevans, omfang og kompleksitet i tidlegare arbeidsoppgåver. Det blir gjort ei samla vurdering av alle kvalifikasjonar. For søkjare med meir enn fem års relevant erfaring kan det vurderast å innplassere i stilling som seniorrådgjevar, med årsløn frå kr 690 00 til 910 000. 

Frå løna blir det trekt 2 % innskot til Statens pensjonskasse. Medlemskap gir fleire gode ordningar, inkludert livsvarig alderspensjon, AFP, økonomisk tryggleik ved sjukdom eller uførheit, støtte til etterlatne, forsikringsordningar og gunstige bustadlånsvilkår.

Vi er opptekne av mangfald og inkludering:

Vi vil rekruttere den best kvalifiserte kandidaten til stillinga og treng derfor eit breitt rekrutteringsgrunnlag. I Klima- og miljødepartementet har vi eit personalpolitisk mål om å vere ein arbeidsgivar som speglar mangfaldet i samfunnet og som tek i bruk potensialet i dei samla kompetansane til befolkninga. Det betyr at vi ønskjer velkommen søkjarar med ulik arbeids- og livserfaring som av ulike årsaker ikkje kan dokumentere ein samanhengande yrkeskarriere. Vi har gode moglegheiter for tilrettelegging. Kvalifiserte kandidatar blir oppmoda til å søkje.

Slik søkjer du:

Vi ber om at du lastar opp vitnemål/karakterutskrifter (som kan hentast direkte frå Vitnemålsportalen) og relevante attestar.

Vi tek vare på personopplysningane dine i samsvar med GDPR.

Ver merksam på at opplysningar om deg kan bli offentleggjorde sjølv om du har bede om å vere unnateken frå søkjarlista. Du blir i så fall orientert om dette på førehand.

Klima- og miljødepartementet  har hovudansvaret for å ta vare på heilskapen i klima- og miljøpolitikken til regjeringa. Departementet er etatsstyrar for Artsdatabanken, Enova, Meteorologisk institutt, Miljødirektoratet, Norsk kulturminnefond, Norsk Polarinstitutt, Riksantikvaren, Senter mot marin forsøpling og Svalbards miljøvernfond, og har om lag 260 tilsette.

Naturforvaltningsavdelinga har hovudansvaret for å utvikle politikk for vern og berekraftig bruk av naturmangfald og friluftsliv. Avdelinga arbeider mellom anna med områdevern (som barskogvern, nasjonalparkplanen og fylkesvise verneplanar), rovvilt- og annan viltforvaltning, førebygging og regulering av framande organismar, vassforvaltning, villaks- og innlandsfiskforvaltning, avgifter, arealforvaltning og konsekvensutgreiingar.

Avdelinga gjer òg vurderingar av miljøvernaspekt knytte til jord- og skogbruk, energi- og havbruksnæringane, samt miljørisikovurderingar knytte til bruk av genmodifiserte organismar, motorferdsel og naturoppsyn.