Er du oppteken av samspelet mellom staten og kommunesektoren?

Om stillinga

Vi har ledig ei fast stilling som utgreiingsleiar/fagdirektør i samordningsseksjonen i Kommunalavdelinga. Samordningsseksjonen sine ansvarsområde er mellom anna samordning av statlege tiltak overfor kommunane og fylkeskommunane, kommune- og fylkesstruktur, oppgåvefordelinga mellom forvaltningsnivåa og konsultasjonsordninga mellom regjeringa og kommunesektorens organisasjon (KS). Seksjonen har og hovudansvar for oppfølging av Generalistkommuneutvalet og Kommunekommisjonen.

Våre overordna mål er eit velfungerande demokrati, eit velfungerande lokalt sjølvstyre og berekraftige, nyskapande og omstillingsdyktige kommunar. Vi arbeider for gode juridiske og økonomiske rammevilkår for kommunesektoren.

Seksjonen har 12 medarbeidarar og er kjenneteikna av høgt kompetansenivå blant medarbeidarane, godt samarbeid og kunnskapsdeling. Vi ser etter ein ny medarbeidar som særleg skal jobbe med utgreiing og iverksetting av tiltak for å sikre eit sterkt og velfungerande kommunesystem. I tillegg vil du kunne bli kopla på andre oppgåver i seksjonen. I stillinga er det behov for samarbeid med andre både i og utanfor avdelinga, med andre departement og andre verksemder. Arbeidet er prega av leveransar til den politiske leiinga og kan til tider ha høgt tempo med mange arbeidsoppgåver og korte fristar.  Samstundes har vi òg oppgåver med lengre tidshorisont, så det er viktig at du trivst med ein variert og dynamisk arbeidskvardag. 

Arbeidsoppgåver

Oppgåvene i seksjonen er mange og varierte, og dei endrar seg ofte ved regjeringsskifte, prosjekt og utviklingsarbeid. Det er derfor nødvendig å kunne jobbe med ulike delar av oppgåveporteføljen til seksjonen, og med ansvarsområde som endrar seg over tid. 

Sentrale arbeidsoppgåver vil vere å

• utgreie og gjennomføre tiltak for å sikre ein sterk og velfungerande kommunesektor
• vurdere behovet for å hente inn forsking og utgreiingar
• samordne statens politikk overfor kommunesektoren, mellom anna vurdere om dei økonomiske og administrative konsekvensane for kommunesektoren av ulike statlege tiltak er tilstrekkeleg belyste
• gi faglege vurderingar og råd til den politiske leiinga, både skriftleg og munnleg
• delta i, og leie, interne og tverrdepartementale fag- og arbeidsgrupper
• utarbeide og halde faglege innlegg i ulike samanhengar, internt og eksternt, på norsk og engelsk

Vi søkjer deg som har 

Nødvendige kvalifikasjonar

• Mastergrad eller tilsvarande høgare utdanning i samfunnsvitskap, økonomi eller jus
• Minst åtte års relevant arbeidserfaring frå departement, sentral statsforvaltning og/eller kommunesektoren
• God kjennskap til kommunesystemet og dei utfordringane kommunesektoren står overfor
• God kjennskap til forholdet mellom staten og kommunesektoren
• Erfaring med å drive fram gode arbeidsprosessar
• God skriftleg og munnleg framstillingsevne på norsk og engelsk
   

Personlege eigenskapar

Vi ser etter ein person som samarbeider godt, og som trivst med å løyse oppgåver i tett dialog med andre, både internt og eksternt. Du har ein initiativrik og engasjert tilnærming til arbeidsoppgåver og faglege prosessar, og driv prosessar framover på ein strukturert og sjølvstendig måte.

Du har vidare

• god rolleforståing og bidreg til å skape tillit i dei situasjonane du står i
• gode analytiske evner, og er resultat‑ og løysingsorientert 
• evne til å sjå heilskap og samanhengar i komplekse problemstillingar
• evne til å levere godt under høgt tempo og korte tidsfristar

Vi vil legge stor vekt på om du er personleg eigna for stillinga.

Utdanning og erfaring må dokumenterast med CV, vitnemål og attestar.

Vi tilbyr

Vi ønskjer deg velkomen inn i eit arbeidsfellesskap med dyktige kollegaer som er stolte av jobben sin. Vi tilbyr

• kompetanseutvikling i eit sterkt fagmiljø
• fleksibel arbeidstid, betalt overtid og sommartid
• arbeidsplass sentralt i Oslo sentrum
• moglegheit for trening i arbeidstiden
• medlemskap i Statens pensjonskasse med gode låne- forsikrings- og pensjonsordningar
• eit aktivt sosialt miljø med mange tilbud til dei tilsette, eige bedriftsidrettslag og bedriftshelseteneste

Som ny i KDD får du heilt frå starten av oppgåver som utfordrar deg, og du får ein fadder som følgjer deg opp. Departementet har eit introduksjonsprogram der du blir kjend med nytilsette i dei andre avdelingane. For tilsette under 40 år er det ei eiga foreining, Ung i KDD. Nettverket skal bidra til å skapa ein arena der unge i departementet kan møtast jamleg til faglege og sosiale samankomstar. Ønskjer du å vita meir om korleis det er å jobba hos oss, kan du lesa meir her: Tilsette om KDD - Jobb i KDD (regjeringen.no). (https://www.regjeringen.no/no/dep/kdd/jobbeikmd/mot-vare-dyktige-medarbeidere/id3115880/)

Løn: Stillinga er løna som utgreiingsleiar/fagdirektør frå kr 820 000 - 1 050 000 pr. år. Stillings- og lønsinnplassering avheng av erfaring og kvalifikasjonar. Frå løna blir det trekt  2 % innskot til Statens pensjonskasse. 

Autorisasjon: Tilsette i Kommunal- og distriktsdepartementet må kunna autoriserast for tilgang til informasjon gradert BEGRENSET etter sikkerheitslova. Les meir om autorisasjon her (https://nettsteder.regjeringen.no/jobbikdd/rekrutteringsprosessen/).

Slik søkjer du

Send søknad elektronisk via lenkja «Søk stillinga» øvst på denne sida. Snarleg tiltredelse er ønskjeleg.

I rekrutteringsportalen må du:

• svare på dei innleiande spørsmåla (dei erstattar søknadsbrevet)
• fylle ut alle CV-felt (sjølv om du lastar opp eigen CV)

Me meiner at inkludering og mangfald er ein styrke. Me ønskjer medarbeidarar med ulike kompetansar, fagkombinasjonar, livserfaring og perspektiv for å bidra til endå betre oppgåveløysing. Me vil leggja til rette for medarbeidarar som har behov for det. Aktuell tilrettelegging kan til dømes vera tekniske hjelpemiddel, tilpassing av møblar eller endring av rutinar, arbeidsoppgåver og arbeidstid. 

Les meir om inkludering og mangfald her.  (https://arbeidsgiver.dfo.no/strategisk-hr/inkluderingsarbeid/bli-bedre-pa-rekruttering/hvordan-skrive-stillingsannonser-som-inkluderer/positiv-saerbehandling-nar-man-soker-jobb-i-staten)

KDD nyttar Semac bakgrunnssjekk i gjeldande rekrutteringsprosess. Bakgrunnssjekk blir utført etter samtykke frå kandidaten, og inneber mellom anna at vi verifiserer CV og annan søknadsdokumentasjon i samband med tilsetjinga. Tilsetjing føreset godkjend bakgrunnssjekk.

I samsvar med offentleglova §25 gjer vi merksam på at opplysningar om søkjaren kan bli offentleggjorde sjølv om søkjaren har bede om å ikkje bli ført opp på søkjarlista.

Kontaktperson: For nærmare opplysningar om stillinga, kontakt Mari Jacobsen, avdelingsdirektør, på +4790640026 eller mari.jacobsen@kdd.dep.no. For nærmare opplysningar om rekrutteringsprosessen, kontakt Annabel Tveit, rekrutteringsrådgiver, på +4797959303 eller annabel.tveit@dss.dep.no

Kommunal- og distriktsdepartementet (KDD) har om lag 250 tilsette og er sekretariat for kommunal- og distriktsministeren.
Departementet har ansvar for kommuneøkonomi og lokalforvaltning, regional- og distriktspolitikk, bustadpolitikk, plan- og bygningslova, kart- og geodatapolitikken, valgjennomføring og politikken overfor samar og nasjonale minoritetar. Departementet har fleire underliggande etatar og verksemder, som Direktoratet for byggkvalitet, Distriktssenteret, Husbanken, Husleigetvistutvalet, Internasjonalt reindriftssenter, Kartverket og Valdirektoratet.

 

 Kommunalavdelinga har ansvaret for å følgje opp kommunepolitikken til regjeringa. Ansvarsområda til avdelinga omfattar kommuneøkonomi, samordning av statlege tiltak overfor kommunane og fylkeskommunane, innovasjons- og forenklingsarbeidet retta mot kommunesektoren, kommunereforma, kommunalrett, kommune- og fylkesinndeling, administrasjon av val, partilova og partifinansieringa, konsultasjonar mellom staten og kommunesektoren, KOSTRA (KOmmune-STat-RApportering), Det tekniske berekningsutvalet, Valdirektoratet og Kommunalbanken AS.