Vil du leie og vidareutvikle ei av Noregs viktigaste verksemder?

Finansdepartementet søkjer direktør til Skatteetaten.

Skattedirektøren har det overordna faglege og administrative ansvaret for ei verksemd med ei heilt sentral rolle i samfunnet. Gjennom arbeidet sitt bidreg Skatteetaten til å sikre finansieringsgrunnlaget for offentlege tenester og til at fellesskapet sine ressursar blir forvalta godt.

Som skattedirektør vil du ha ansvar for å leie og utvikle ein stor og kompleks kompetanseorganisasjon med breitt ansvar og omfattande kontaktflater mot innbyggjarar, næringsliv og offentlege aktørar. Du skal sikre tydelege prioriteringar og god ressursutnytting, og utvikle organisasjonen vidare i møte med nye krav og moglegheiter. Skatteetaten må være i kontinuerleg utvikling, driven av endringar i teknologi, regelverk, kriminalitets- og trusselbilde og forventningar frå samfunnet. Rolla inneber å balansere stabil drift av ei omfattande forvaltningsverksemd med vidare utvikling av digitale løysingar og tenester.

Vi søkjer ein strategisk og samlande leiar med solid erfaring frå store og komplekse kunnskapsorganisasjonar. Du har god rolleforståing og evne til å navigere i samspelet mellom fag, politikk og forvaltning. Som skattedirektør må du vere interessert i korleis nasjonale og internasjonale utviklingstrekk utfordrar evna etaten har for å utføre samfunnsoppdraget. I rollen kommuniserer du tydeleg og tillitsskapande, og evnar å samle organisasjonen om felles retning og prioriteringar i ei verksemd med breitt ansvarsområde og høgt forventningspress.

For å lukkast i rolla må du ha solid leiarerfaring og evne til å utvikle sterke leiargrupper og fagmiljø. Du har god forståing for korleis teknologi og digital utvikling påverkar offentleg sektor, og ser moglegheiter for vidare utvikling, betre tenester og betre kontroll med at rett skatt blir betalt. Relevant utdanning på masternivå er ein føresetnad. Vi ser etter ein leiar med høg integritet og eit sterkt engasjement for samfunnsoppdraget.

Stillinga er eit åremål på seks år med høve til fornying éin gong. Arbeidsstad er Oslo. Stillinga krev tryggleiksklarering etter sikkerhetslova. Lønn etter avtale.

Har du har spørsmål om stillinga, ta kontakt med Visindi ved Dyveke Hamza, tlf. 458 38 167, Magne Amundsen, tlf. 916 56 101, eller Marianne Bakken, tlf. 410 91 376, eller Finansdepartementet ved ekspedisjonssjef Tina Engelsrud, tlf. 930 28 074. Søknad med CV sendast snarast og seinast innan 15. april 2026.

Etter at søknadsfristen har gått ut, blir det utarbeidd søkjarlister. Vi gjer merksam på at opplysningar om søkjarar kan bli offentleggjorde sjølv om søkjarar har bede om å ikkje bli førte opp på den offentlege søkjarlista. Blir det aktuelt, tek vi kontakt før offentleggjering.

Det er ønskjeleg å spegle mangfaldet i samfunnet, og vi oppmodar difor alle kvalifiserte kandidatar til å søkje, utan omsyn til bakgrunn og tilhøyrsle. Vi vil leggje til rette for medarbeidarar som treng det. Les meir på Arbeidsgivarportalen.

Samfunnsoppdraget til Skatteetaten er å sikre eit finansielt hovudgrunnlag for offentleg verksemd. Skatteetaten har ansvaret for at skattar og avgifter blir fastsette og innbetalte på rett måte, og for eit oppdatert folkeregister.

Skatteetaten har litt over 7000 tilsette. Skatteetaten består av eit direktorat og fem divisjonar med landsdekkjande ansvar. Etaten har skattekontor fordelte over heile landet. Hovudarbeidsstad for skattedirektøren vil vere ved hovudkontoret i Oslo.

Finansdepartementet har det faglege, administrative og budsjettmessige ansvaret for Skatteetaten.