Vil du analysere utfordringar – og finne løysingar – for framtidas kunnskapssektor?

Om stillinga

Vi har ledig ei fast stilling i seksjon for analyse og kunnskapsgrunnlag. Hos oss får du høve til å utvikle og formidle analysar som gir innsikt i problemstillinger som vedkjem sektoren under Kunnskapsdepartementet - både no og i framtida. Stillinga krev ein kombinasjon av fagleg tyngde, analytisk sinnelag, kreativ tenking og initiativ.

Som tilsett hos oss er du med på å gi analysestøtte til fagavdelingane, leiargruppa og politisk leiing. Du vil få jobbe med komplekse utfordringar, utvikle innsikt og bidra til strategiske prosesser som påverkar avgjerder på alle områda der departementet har ansvar. Stillinga vil og bidra til å følge opp og vidareutvikle forskinga og statistikken for og om utdanning og forsking.

Arbeidsoppgåver

Arbeidsoppgåvene kan variere over tid, men du vil særlig bidra til å

• ta initiativ til og gjennomføre analysar for å belyse sektorutfordringer.
• finne fram til og formidle policyrelevansen av forsking og statistikk.
• samarbeide med fagavdelingane i utvikling av tiltak på dei områda der departementet arbeider.
• identifisere kunnskapsbehov og lyse ut oppdrag om meir kunnskap på utvalde tema.
• vurdere kvalitet, relevans og manglar i statistikk og kunnskapsgrunnlaget for fagavdelingane og politisk leiing.
• bidra til vurdering av forsking som verkemiddel for å nå sektorpolitiske mål.

Kvalifikasjonar og personlege eigenskapar

Du må

• ha relevant høgare utdanning på masternivå eller PhD.
• raskt kunne sette deg inn i og kritisk vurdere forsking og talmateriale.
• ha evne til å stille kritiske og utforskande spørsmål og strukturere tankar klart.
• vise interesse for politiske prosessar og forståing for rolla til embetsverket.
• ha gode samarbeidsevner og initiativ til å drive prosessar framover.
• ha god skriftleg og munnleg framstillingsevne.

Vi søker deg som kommuniserer tydeleg og er løysingsorientert. Du har høg arbeidskapasitet, sterk analytisk evne, integritet og god heilskapsforståing. Det er òg ein fordel, men ikkje eit krav, om du har kjennskap til kunnskapssektoren. Personlege eigenskapar som gjer søkaren eigna for stillinga, blir vektlagt.

For stilling som seniorrådgivar blir det kravd minimum fire års relevant arbeidserfaring og god kjennskap til fagfeltet. For stilling som rådgivar blir det som hovudregel stilt krav om minst to års relevant arbeidserfaring. 

For denne stillinga må du kunne autoriserast for nivå AVGRENSA i tråd med føresegnene til tryggingslova. Autorisasjon til AVGRENSA inneber ei vurdering av personens tryggingsmessige skikkethet. Meir informasjon om autorisasjon etter tryggingslova finst på nettsidene til Nasjonalt tryggingsorgan (NSM): Autorisasjon - Nasjonalt tryggingsorgan (nsm.no) (https://nsm.no/fagomrader/personellsikkerhet/sikkerhetsklarering/autorisasjon/)

Vi tilbyr

Vi tilbyr ein meiningsfull og utfordrande jobb i kryssingspunktet mellom fag og politikk, og høve til å bidra til samfunnsutviklinga. Stillinga legg godt til rette for fagleg og personleg utvikling, og du blir del av eit engasjert fagmiljø. Arbeidsmiljøet i departementet er ope og inkluderande, og vi verdset kompetansedeling og god tilbakemeldingskultur.

Som ny i KD er vi opptekne av at du får ei god innføring i oppgåvene, bygge nettverk og får forståing for heilskapen i arbeidet i departementet.

Som del av onboardingprogrammet vårt får du prøve deg fleire stader i departementet i løpet av dei første halvanna åra hos oss.

Vi tilbyr også

• fleksibel arbeidstid og betalt overtid
• breidt tilbod av faglege og sosiale tiltak og moglegheit for trenining i arbeidstida
• medlemskap i Statens pensjonskasse med gode låne,- forsikrings- og pensjonsordningar

Vi held til i moderne lokale med ope kontorlandskap i Kvadraturen i Oslo sentrum. Du kan lese meir om å jobbe i Kunnskapsdepartementet på regjeringa.no.

Lønn: Stillinga er lønna som rådgivar eller seniorrådgivar frå kr 
640 000 - 900 000 pr år. Stillings- og lønnsinnplassering heng saman med erfaring og kvalifikasjonar. For særleg kvalifiserte søkarar kan høgare lønn vurderast.

Frå lønna går 2 % innskot til Statens pensjonskasse

Mangfald og inkludering

Kunnskapsdepartementet er opptatt av inkludering, likestilling og mangfald, og ønsker å vere ein arbeidsplass som speglar befolkninga. Vi ønsker medarbeidarar med ulik kompetanse, fagkombinasjonar, livserfaring og perspektiv for å bidra til endå betre oppgåveløysing. Vi oppmodar alle kvalifiserte kandidatar til å søke, uavhengig av alder, kjønn, seksuell orientering, funksjonsevne, hol i CV-en og etnisk bakgrunn. Kunnskapsdepartementet er ei IA-verksemd, og dette betyr mellom anna at vi vil sørge for tilrettelegging på arbeidsplassen dersom det er behov for det. Aktuell tilrettelegging kan for eksempel vere tekniske og fysiske hjelpemiddel eller endringar i rutinar, arbeidsoppgåver og arbeidstid. Alle kvalifiserte søkjarar vil bli vurderte.

Vi oppfordrar deg som har funksjonsnedsetting, hol i CV-en eller innvandrarbakgrunn til å krysse av i aktuell kategori. Avkryssingar i jobbsøkarportalen er grunnlag for anonymisert statistikk som alle statlege verksemder rapporterer om i årsrapportane.

Les meir om krava på Arbeidsgivarportalen (https://arbeidsgiver.dfo.no/nyhetsarkiv/endring-i-forskrift-i-statsansatteloven-gjor-det-enklere-inkludere?size=n_20_n).

Slik søker du

Vi er opptatt av kva du kan, erfaringane dine og kompetansen du har, og vil derfor stille deg nokre faglege spørsmål i staden for å be deg skrive ein søknadstekst. Når du trykkjer ‘søk stillinga', kjem du til rekrutteringsportalen og må logge deg inn. I portalen er det viktig at du:

• Svarar på spørsmåla du får innleiingsvis. Desse spørsmåla erstattar søknadsbrev/tekst.
• Fyller ut CV-felta i portalen (sjølv om du legg ved ein ferdig utfylt CV). Dette er nødvendig blant anna for å ivareta kravet om fullstendige søkarlister.
• Registrerer vitnemål, attestar m.m. i portalen. Vi ber om at du hentar ut ein digitalt signert PDF med utdanningsresultata dine frå Vitnemålsportalen og lastar den opp når du søker på stillinga. Har du utdanning frå utlandet, legg du ved ei godkjenning frå Direktoratet for høgare utdanning og kompetanse.

I samsvar med offentleglova § 25 gjer vi merksam på at namn kan bli offenteggjort sjølv om ein søkar har bede om å ikkje bli førdt opp på søkarlista. Søkaren vil i så fall bli orientert om dette på førehand.

Kontaktperson

For nærare opplysningar om stillinga kan du kontakte avdelingsdirektør Ferdinand Andreas Mohn, tlf., e-post:

Kunnskapsdepartementet har ansvar for barnehage, grunnskule, kulturskule, vidaregåande opplæring, fagskule, høgare utdanning, voksnes læring, kompetansepolitikk og forsking. Departementet har òg overordna styring, kontroll og tilsyn med ei rekkje underliggjande etatar og verksemder. Kunnskapsdepartementet har om lag 300 tilsette fordelte på seks avdelingar, kommunikasjonseining og staben til departementsråden.

Arbeidet til departementet byggjer på verdiane profesjonalitet, openheit og gjennomføring. Meir informasjon om departementet finst på www.regjeringa.no.
 

Avdeling for fellestenester og strategiske satsingsområde er ei administrasjonsavdeling med ansvar for drifta av departementet, utvikling av organisasjonen og koordinering av arbeidet med statsbudsjettet. I tillegg har avdelinga ansvar for dei strategiske satsingsområda digitalisering, kunnskapsgrunnlag, styring og samordning.

Det er fem seksjonar i avdelinga: seksjon for analyse og kunnskapsgrunnlag, seksjon for HR, seksjon for dokumentasjon, drift og rekneskap, seksjon for tenester og tryggleik og seksjon for
digitalisering, budsjett og styring.

Seksjon for analyse og kunnskapsgrunnlag har ansvar for utvikling og bruk av det kunnskapsgrunnlaget som politikkutviklinga i departementet og tenesteproduksjonen i sektoren skal bygge på. Seksjonen koordinerer arbeidet med forsking og statistikk på utdanningsfeltet.