Hytte-idyll i fantastisk natur

Sjarmerande og velhalden hytte med båt og naust ved Gjøsetvatnet, mellom Førde og Gaular. Hytta ligg vakkert til med praktfull utsikt mot det mektige fjellmassivet med Storehesten, Vetlehesten og Heilefjellet. Fritt og usjenert - utan andre hytter innanfor synsvidde. Svært gode solforhold. Her kan du sitje på terrassen og nyte frisk fjellluft, stilla i naturen og den imponerande utsikta mot det vakre landskapet.

• «Privat badeplass» i tjørnet rett ved hytta

• Robåt for fisketurar og rekreasjon på Gjøsetvatnet

• Godt utgangspunkt for fjellturar til Fauskevarden, Halbrendsnipa og Hestane

• 1 km frå den preparerte skiløypa frå Langeland til Gjøset

• Solcellepanel, gasskomfyr og straumaggregat

• 2 soverom med 6 sengeplassar

• Hytta blir selt med inventar, slik at du kan flytte rett inn

Velkommen til visning!

Klassisk fjellhytte

Hytta ved Gjøsetvatnet er ei klassisk norsk fjellhytte, med naturen som nærmaste nabo. Noverande eigar kjøpte eigedommen for 12 år sidan og har pussa opp bygningen både innandørs og utandørs. Det er også ført opp eit tilbygg (2017), som i dag blir brukt som lagerplass.

Eigedommen ligg ope til og har svært gode solforhold. Du kan nyte morgonsola på den sørvende terrassen og glede deg over solnedgangen på steinplattingen mot vest. På høgsommar er der sol til kl. 21.30.

Straum og vatn

Hytta har eit 12  volts solcelleanlegg med batteri for belysning, med fem lyspunkt i stove og kjøkken. I tillegg er der konverter som blir brukt for tilkopling til mobilladdar og radio mm.

Hytta har Kipor Sineaster aggregat som gir opptil 2000 W straum, veleigna både for lading av elverktøy og drift av sag. Både aggregat og  konverter følgjer med på kjøpet.

Det er pr. i dag ikkje lagt inn vatn i hytta. Vaskevatn blir henta frå ein bekk, ca. 50 meter frå hytta. Drikkevatn kan hentast frå Gjøsetvatnet. Det er mogleg å få innlagt vatn på bad og kjøkken ved å legge ein ca. 100 meter lang slange opp til  bekken.

Hytta har tradisjonelt utedo med strø. Det er potensiale for å setje inn eit moderne toalett i form av biodo, kjemisk do eller liknande i utebod/tilbygg som er oppført på baksida av hytta.

Inventar

Kjøkkenet har ein ganske ny gasskomfyr med fire plater og steikeomn (2018). Gassflasker med ny slange og regulator (2026) følgjer med på kjøpet.

Eigedommen blir selt med innreiing og utstyr som følgjer etter Avhendingslova. I tillegg vil kjøpar overta alt møblement i stove, kjøkken, bad og soverom.

Peisgrind og støvsugar vil også følgje med på kjøpet. Det kan vere mogleg å overta ytterlegare lausøyre, etter nærmare avtale om pris.

Fiske og bading

Eige naust og ein Øien 12 plastbåt følgjer med på kjøpet. For å kome ut i hovudvatnet, ror du gjennom ein idyllisk kanal med siv og blomstrande vannliljer. Båtmodellen er godkjent for montering av ein mindre påhengsmotor.

Det er fritt fiske etter aure i Gjøsetvatnet og i småelvane som renn inn i vatnet. Oterfiske med båt kan gi god fangst, men du får også steikeklar aure med stang.

Tjernet rett ved hytta har blitt brukt som «privat badeplass» for eigarane av hytta.

Fjelltur og skiløype

Hytta er eit godt utgangspunkt for turar både sommar og vinter. Det er gangavstand både til Fauskevarden og Halbrendsnipa i nord og Storehesten/Litlehesten i vest. Det er også lett tilgang til Gjøsetstølen og turstiane mot Fauskestølen/Yndestadstølen.

Hytta ligg berre 1 km frå det store løypenettet ut frå Langeland, med preparerte langrennsløyper heile vintersesongen.

Gjennomføring av sal

Noverande eigar kjøpte hytta i 2014 for ein marknadspris på 730.000 kr pluss avgifter, etter open anbodsrunde. Prisantydning er etter ei samla vurdering sett til 900.000 kr.

Vi ønskjer på førehand å vite om du kjem på vising og ber deg om å melde deg på via finn.no, eller direkte til seljar på SMS til 47 34 44 87. Om det ikkje er påmeldingar til vising, vert den avlyst.

Seljar vil sjølv ta ansvar for visning og bodrunde. Når kjøpar og seljar har blitt samde om pris og dato for overtaking, vil resten av salsprosessen skje gjennom meklarhuset Propr og Norsk eiendomsoppgjør AS. Dei profesjonelle aktørane utformar kjøpekontrakt, tar imot oppgjer, tinglyser pant og overfører eigarskap. Når alt er på plass, vil kjøpar få overlevert nøklar og pengane blir overført til seljar. Dette gir tryggheit både for banken, kjøpar og seljar.

Tomta er ei inngjerda naturtomt, med to grinder. Eigedommen omfattar også ei nausttomt ved Gjøsetvatnet. På denne tomta er det ført opp eit naust i samarbeid med hyttenabo, med plass til kvar sin båt.

Eigedommen ligg ope til, på ein liten bakketopp. Fritidsbustaden har delvis overbygt terrasse mot sør og steinplatting mot vest. Frå hytta er det praktfull utsikt mot Gjøsetvatnet, Fisketjørnet og det store fjellmassivet med Storehesten, Litlehesten og Heilefjellet.

Hytta har standard i forhold til byggjeår og noko slitasje på dører og vindauge. Eigedommen har hatt godt vedlikehald og framstår i relativt god stand.
Stove og kjøkken har blitt pussa opp av noverande eigar, samtidig som hytta har blitt malt utvendig.
Hytta vart utvida med eit tilbygg i 2017, som i dag fungerer som lagerplass.