Mánájgárddeåhpadiddje

Mij åhtsåp tjiehpes ja vájmmelis sámegielak mánájgárddeåhpadiddjev 100% stuoves virggáj Viejega mánájgárden.

Barggodahkamusá

• Jasskis ja åvddånahtte birrasav hábbmit ájnegasj mánájda ja ålles mánájjuohkusij.
• Mánájt vuojnnet, doarjjot ja bagádit mánáj dárboj milta váj máná åvddåni iesjrádálasj ulmutjin.
• Tjalmostit mánáj ståhkamav ja ståhkambirrasijt åvddånahttet, sæbrrat ståhkamij ja mánájt bagádallat stågadijn.
• Mánáj gåvådusáv ja hábbmimmielav arvusmahttet moattelágásj dåjmaj baktu.
• Hiebadit, plánit, tjadádit, duodastahttet ja árvustallat ájnegasj mánájt ja mánájjuohkusav.
• Barggoguojmijt bagádallat, vaj aktan buorre ståhkåm- ja oahppambirrasav hábbmibihtit, gånnå buorre gasskavuoda ja jasskis ja buorre mánájgárddebirás la guovdátjin.

Máhtudahka ja oahppo

• Mánájgárddeåhpadiddjeoahppo jali ietjá guoskavasj allaskåvlå- jali universitiehttaoahppo mij mánájfágalasj ja pedagogihkalasj máhtudagáv vaddá.
• Buorre sámegielmáhtudahka, sihke njálmálattjat ja tjálalattjat.
• Vásádusá mánájgárddebargos la ávkken.
• Buorre digitála máhtudahka.
• Hárjjánibme vuojnnet juohkka ájnna mánáv ja mánáj dárbojt bærrájgåhtset
• Bulkkeduodastus gájbbeduvvá virggáj biedjama aktijvuodan.

Persåvnålasj máhtukvuoda

• Dujna l vájmulasj berustibme julevsáme mánájgárdev åvddånahtátjit.
• Dujna l berustibme sáme gielas, kultuvras ja árvojs.
• Dån vuojná árvov sámegielas ja sidá iesj stivrrit ja bagádallat mánáj giellaanov.
• Dån la sjuggelis ja vájmmelis fáhkaulmusj.
• Dån berusta mánáj ståhkamis ja sidá åvddånahttet buorre ståhkambirrasijt mánájda.
• Dån sidá jasskis ja buorre mánájgárddebirrasav hábbmit.
• Dån vuojná árvov oassálasstemis, buorre gasskavuodajs, kultuvrramáhtudagás ja avtastallamis.
• Dån la positijvva, hiebadahkes, miellusit rievddadusáj barga ja iehtjádij siegen.
• Dån la åskeldis ja tjiehppe plánajt tjadádittjat.
• Dån buvtá barggij ja barggijvega bargojt doarjjot ja bagádallat.
• Dån buoragit guládallá.
• Dån berusta åvddånahttemis ja tjoavddusijt gávnnamis, ma buoragit doajmmi mánájjuohkusij mij jur de la mánájgárden.

Mij fállap

• Sáme mánájgárdev gånnå åvddånahttem la guovdátjin.
• Vájmmelis barggoguojmijt gudi ulmmelattjat ja systiemalattjat barggi sámegielajn.
• Máhttelisvuodav vájkkudittjat ietjat barggodilev barggoguojmij siegen.
• Mánájgárdev mij tjalmos divna barggij fágalasj máhtudakåvddånahttemav.

Viejega OV:a birra

Viejega OV la mánájgárddevidnudahka mij dåjmat julevsáme mánájgárddefálaldagáv mánájda 0-6 jage gaskan. Mánájgárddejahkáj 2024 li mánájgárddáj plániduvvam 28 saje.

Viejega AS:a álgadiddje ja oasosæjgáda li 18 æjgáda gejn lidjin máná julevsáme mánájgárden mánájgárddejagen 2021/2022. Vidnudagá stivran la badjásasj háldadim- ja dåjmadimåvdåsvásstádus.

Mánájgárde ájggomus

Mánájgárde ájggomus la dåjmadit julevsáme mánájgárdev gånnå bæjválasj bargon dåjmaduvvá julevsáme filosofijja, árvo, luonndodádjadus, árbbemáhtudahka ja giella sáme pedagogihka baktu. Dán láhkáj sihtá mánájgárdde nannit mánájt sáme kultuvra ja giela baktu vaj máná oadtju nanos sáme identitiehtav.

Julevsámegiella l guovdátjin mánájgárde bæjválasj dåjman. Mánájgárdde galggá liehket avtagielak julevsáme ariedná, gånnå sámegiella l ræjddo ståhkamij, oahppamij ja guládallamij. Ulmme l bajedit produktijva julevsámegielak mánájt gudi bukti sámegielav joarkedit aj boahtte buolvajda.

Mánájgárdde galggá mánájda fállat jasskis birrasav. Mánájgárde vuodoárvvo l láhtjet dilev jasskavuohtaj ja jasskis avtastallamij. Mánájgárdde galggá aktisattjat mánáj sijdaj barggat vaj mánáj dárbbo huvos ja ståhkamis bærrájgåtseduvvi. Mánáj åvddånahttema diehti galggá mánájgárdde aj åvdedit oahppamav ja ávddamav.

Mánájgárdde galggá vuododuvvat risstalasj ja humanistalasj árvoj ja árbbedábij vuodoárvojda. Dási gullu ulmusjárvov ja luondov árvvon adnet, moalgedimfriddjavuohta, avtaárvulasjvuohta ja solidaritiehtta, guojmmegieresvuohta, ándagisluojttem ja árvo ma åvddån båhti iesjguhtik åskujn ja iellemvuojnojn, ja ma li ulmusjrievtesvuodajda tjanádum.

Mánájgárdde dåjmaduvvá mánájgárddelága milta, njuolgadustjállagij milta ma Åhpadusdirektoráhtas mierreduvvi, Sámedikke doarjjagájbbádusáj milta ja mánájgárde stivra mærrádusáj milta. Hábmera suohkana ævto mánájgárddedoajmmaj båhti åvddån dåhkkidimmærrádusá ja jahkásasj doarjjamærrádusáj baktu.

BARGGOGIELLA: JULEVSÁMEGIELLA