Statens fremste representant i Nordland

Om stillinga

Embetet som statsforvaltar i Nordland er ledig frå 01.01.2025.

Statsforvaltaren er Kongen og Regjeringas representant i fylket og har ansvar for å følgje opp vedtak, mål og retningslinjer frå Stortinget og Regjeringa. Statsforvaltaren skal også samordne resten av den statlege forvaltninga i fylket og ta del i samarbeid og samhandling mellom staten, fylkeskommunen og kommunane. Som statsforvaltar i Nordland varetar du oppgåver som er viktige for folk, kommunar og lokalmiljøet. Statsforvaltaren skal følgje opp formidling, rettleiing, tilsyn og kontroll på sentrale samfunnsområde som blant anna miljøvern, landbruk, samfunnssikkerheit, helse, barnevern, oppvekst, utdanning og kommunal økonomi og forvaltning.

Statsforvaltaren leier ei stor verksemd med omfattande oppgåver og stor betydning i samfunnet. Som statsforvaltar i Nordland får du leie ca. 180 tilsette med høg kompetanse og ei forvaltningseining med mange oppdragsgivarar. Statsforvaltaren i Nordland har hovudsete i Bodø og har i tillegg kontor i Mosjøen, Storjord i Saltdal kommune, Vega, Trofors i Grane kommune og Sortland.

Statsforvaltaren er administrativt underlagd Digitaliserings- og forvaltningsdepartementet og utfører oppgåver for ei rekkje departement og direktorat. Lengda på åremålet er seks år, med moglegheit for fornying i éin ny seksårsperiode etter offentleg kunngjering og konkurranse.

Du får jobbe med

I denne stillinga får du ei sentral rolle i å peike ut retning for og følgje opp framdrift og resultat i statsforvaltninga i Nordland.

I dette inngår blant anna å

• setje i verk nasjonal politikk i fylket og sørgje for rettleiing til kommunane
• samordne statleg verksemd ut mot kommunane og fylkeskommunen
• bidra til rettssikkerheita til befolkninga
• vere eit bindeledd mellom stat og kommune ved å gi informasjon, ta initiativ og bidra til løysingar
• leie ei stor verksemd med kunnskapsarbeidarar og mange ulike ansvarsområde

Kvalifikasjonskrav

For å lykkast og trivast i denne rolla må du ha interesse for og god kunnskap om offentleg forvaltning. Du må ha leiarerfaring og vere ein tydeleg og raus leiar. Stillinga krev at du har evne til å prioritere og har høg arbeidskapasitet.

Vi søkjer ein statsforvaltar som

• har solid leiarerfaring på høgt nivå frå offentleg og/eller privat verksemd eller frå organisasjonsarbeid
• har ein motiverande leiarstil med interesse for utvikling av organisasjon og medarbeidarar
• har relevant høgare utdanning, gjerne på mastergradsnivå
• har svært god rolleforståing som statleg toppleiar og brei samfunnsinteresse
• har erfaring frå og innsikt i offentleg forvaltning og politiske prosessar
• har høg arbeidskapasitet og handterer pressa arbeidssituasjonar
• er samarbeidsorientert med ei tillitvekkjande og trygg kommunikasjonsform
• har svært god skriftleg og munnleg formuleringsevne

Utdanning og erfaring må dokumenterast md CV, vitnemål og attestar.

Vi tilbyr 

• ein jobb med tyngd og meining
• utfordrande og samfunnsnyttige oppgåver
• ein spennande jobb i eit sterkt fagmiljø
• gode ordningar for forsikring og pensjon, med medlemskap i Statens pensjonskasse
• gode moglegheiter for fagleg og personleg utvikling

Tiltreding 01.01.2025.

Lønn: Embetet er innplassert i leiarlønnssystemet i staten.
Innskot til Statens pensjonskasse blir trekt frå i samsvar med gjeldande regelverk.

Sikkerheitsklarering: Tilsetjing skjer under føresetnad av at søkjaren blir sikkerheitsklarert og autorisert på nivået STRENGT HEMMELEG. Les meir om tryggingsklarering på nettsidene til Nasjonalt tryggingsorgan (https://nsm.no/fagomrader/personellsikkerhet/).

Bustad: Tilsetjing skjer under føresetnad av at søkjaren bur i Nordland ved tiltreding.

Slik søkjer du

Send søknaden elektronisk via lenka «Søk stillinga» øvst på denne sida.

Eit godt arbeidsmiljø er prega av mangfald, og vi oppmodar alle kvalifiserte til å søkje - uansett alder, kjønn, funksjonsevne, etnisk bakgrunn, seksuell legning eller hòl i CV-en. Arbeidsforholda vil bli lagde til rette for medarbeidarar med nedsett funksjonsevne.

Dersom det er kvalifiserte søkjarar med funksjonsnedsetjing, hòl i CV-en eller innvandrarbakgrunn, skal vi kalle inn minst éin søkjar i kvar av desse gruppene til intervju. For å bli vurdert som søkjar i desse gruppene, det vil seie positivt særbehandla på denne måten, må søkjarane oppfylle visse krav.

Les meir om krava på Arbeidsgivarportalen (https://arbeidsgiver.dfo.no/).

Vi oppmodar søkjarar til å krysse av i jobbsøkjarportalen dersom dei har funksjonsnedsetjing, hòl i CV-en eller innvandrarbakgrunn. Avkryssingane i jobbsøkjarportalen dannar grunnlag for anonymisert statistikk som alle statlege verksemder rapporterer i årsrapportane sine.

Digitaliserings- og forvaltningsdepartementet[HS1]  samarbeider med Semac for bakgrunnssjekk av aktuelle kandidatar. Bakgrunnssjekken blir utført etter samtykke frå deg som søkjar og inneber at vi verifiserer CV og annan søknadsdokumentasjon i samband med tilsetjinga.

I samsvar med offentleglova 25 gjer vi merksam på at opplysningar om søkjaren kan bli offentleggjorde sjølv om søkjaren har bede om ikkje å bli ført opp på søkjarlista.

For nærmare opplysningar om stillinga kan du kontakte departementsråd Christine Hamnen på tlf. 976 66 299 eller ekspedisjonssjef Jan Olav Pettersen på tlf. 906 65 002.