Medisinskfagleg ansvarleg for digitale helsetenester

Vil det vere meiningsfullt for deg å jobbe med løysingar som skal forbetre kvardagen for helsepersonell og pasientar gjennom bruk av digitale helsetenester? Har du ei stilling innan helse i dag, men ønskjer å jobbe med teknologi? Då kan du vere den vi ser etter! 

Helse Bergen, Haukeland universitetssjukehus vil auke tilbodet av gode digitale helsetenester. Målet er at pasientar i større grad skal kunne få behandling og oppfølging der dei er, at dei kan ta større del i eiga behandling og oppleve god meistring av sjukdom og skade. For å lukkast med dette må sjukehuset tilpasse måten vi tilbyr tenester på gjennom bruk av ny teknologi og nye metodar. Vi skal samstundes oppretthalde høg fagleg kvalitet og tryggleik i pasientbehandlinga. Utvikling og breidding av digitale helsetenester må skje i tett samarbeid med pasientar, pårørande, og fagfolka i sjukehuset.

Seksjon for e-helse har ei faggruppe for digitale helsetenester som skal styrkast med medisinskfagleg kompetanse. Gruppa jobbar tett på klinikarar og teknologi-leverandørar med utvikling av nye løysingar, og hjelper sjukehuset med å ta desse i bruk i pasientbehandling. Dei er kontaktpunkt mot regionale og nasjonale initiativ for digitale helsetenester og digital samhandling for å dele erfaringar og bidra ved utvikling og innføring av løysingar. Seksjon for e-helse er organisert i Forskings- og utviklingsavdelinga, og har stor kontaktflate i sjukehuset.

Seksjon for e-helse har ledig stilling i 50% som medisinskfagleg ansvarleg for digitale helsetenester.

Vi legg opp til at stillinga kan kombinerast med klinisk arbeid. 

Arbeidsoppgåver

Som medisinskfagleg ansvarleg for digitale helsetenester i Helse Bergen vil du:

• Ivareta det medisinskfaglege perspektivet i utviklinga av digitale helsetenester i Helse Bergen
• Delta aktivt i utviklinga av nye måtar å yte tenester - i tett samarbeid med fagmiljøa, utviklarar og teknologileverandørar
• Dele kunnskap om bruk av digitale helsetenester i pasientbehandling med fagmiljøa i sjukehuset
• Gje råd til leiarar og fagmiljø om korleis digitale helsetenester kan nyttast for god behandling og oppfølging av pasientar og brukarar
• Samarbeide tett med fagmiljø i dei andre helseføretaka i regionen og Helse Vest IKT om utvikling og bruk av digitale helsetenester
• Bidra i nasjonale, regionale og lokale samarbeidsfora for digitale helsetenester 

Kvalifikasjonar

• Lege med autorisasjon og fleire års erfaring frå pasientbehandling i sjukehus
• Kjennskap til, interesse for og erfaring med digitale løysingar i bruk i sjukehus
• Erfaring med bruk av digitale helsetenester i klinisk praksis er ein fordel
• Erfaring frå leiing, leiing av faggrupper og/eller forbetringsarbeid i sjukehus er ønskjeleg
• Erfaring frå forsking, evt. master- eller doktorgrad er ønskjeleg

Personlege eigenskapar

• Du har motivasjon og interesse for bruk av teknologi i pasientbehandling
• Du trivst med å sette retning og finne løysingar saman med andre
• Du har evne til å lytte og bidrar til eit godt fagleg miljø og arbeidsmiljø
• Gode munnlege og skiftlege kommunikasjonsferdigheiter
• Du er fleksibel og handterer høgt arbeidspress og tidsfristar
• Vi legg vekt på personlege eigenskapar

Vi tilbyr

•  Ein spennande og utfordrande jobb der det er kort veg frå idé til løysing
•  Eit aktivt, tverrfagleg og triveleg arbeidsmiljø
•  Eit meiningsfylt arbeid som gjev personleg utvikling
•  Løn etter avtale

Mangfaldserklæring
Føretaksgruppa i Helse Vest ønskjer å spegle mangfaldet i befolkninga i rekrutteringa vår. Vi oppmodar alle som er kvalifiserte til å søkje ledige stillingar uansett kjønn, alder, funksjonshemming og fleirkulturell bakgrunn. Det same gjeld dersom ein har hatt eit lengre opphald frå arbeidslivet. Føretaksgruppa i Helse Vest ønskjer å leggje til rette for inkluderande rekruttering.