Prosjektleiar for E134 Haukeli

I Utbyggingsområde vest er det ledig stilling som prosjektleiar for bygging av strekninga Røldal - Seljestad i Vestland fylke med kontorstad i Ullensvang kommune. Prosjektorganisasjonen blir lagd under Statens vegvesen sin Utbyggingsdivisjon.

Prosjektet Røldal - Seljestad omfattar bygging av Røldalstunnelen med litt veg. Samla strekning er på ca 15,5 km, av dette nesten 13 km i tunnel. Prosjektet har godkjend reguleringsplan og i framlegg til ny NTP er det fullfinansiert i første periode fram til 2027.  

Prosjektet er eit tiltak på ruta E134 Haugesund - Drammen, og ein må rekne med organisatoriske endringar i takt med løyvingane til denne ruta.

Du vil få det overordna ansvaret for tiltaka som vert lagde til denne organisasjonen. Du vil få ansvaret for å byggje opp eit godt og fungerande fagmiljø for å kunne gjennomføre tiltaka. Prosjektleiaren har personalansvar, og du må ha evne til å leie dyktige fagfolk på ein tydeleg måte og syte for at dei utviklar seg. Du skal leie arbeidet med sikring av grensesnitt, ressursutnytting og synergiar på tvers i prosjektet.

Som leiar er det viktig at du

• kommuniserer og samhandlar godt, ser løysingar og kan vise handlekraft gjennom fagleg styrke
• engasjerer medarbeidarar og samarbeidspartnarar til å tenkje i framtidsscenario, og vurdere kva krav dette stiller til det som skal leverast til ei kvar tid
• samhandlar med eksterne organisasjonar og media på ein positiv måte for prosjektet
• er resultatorientert og oppteken av å nå prosjektet sine mål
• innbyr til tillit overfor entreprenørar og samarbeidspartar
• kan byggje ein god og velfungerande organisasjon rundt deg

Kven er du?

• Du har 5-års ingeniørutdanning frå universitetet. Omfattande og relevant erfaring med prosjektleiing eller aktuelle fagområde, kan kompensere for manglande formell utdanning utover 3-års utdanning frå universitet eller teknisk høgskule
• God fagleg tyngd frå gjennomføring av samferdsleprosjekt er ein fordel, men det er like viktig at du kan handtere ulike samarbeidspartar på ein god måte
• Du har kunnskap om regelverk innan relevante fagfelt og er godt kjend med handtering av å få arbeid utført etter kontrakt
• Du har god skriftleg og munnleg framstillingsevne
• Du er sjølvstendig, initiativrik og jobbar strukturert
• Du har førarkort klasse B
• Stillinga føreset godkjend sikkerheitsklarering eller at slik kan gjevast
• Du har tilsvarande leiarerfaring frå store prosjektorganisasjonar
• Du er godt kjent med byggherrerolla

Dersom du har teke heile eller deler av utdanninga di i utlandet, tilrår vi at den vert godkjend av NOKUT ( www.nokut.no).

Du vil bli tilsett i Statens vegvesen og med det blir ein del av eit engasjert og tungt fagmiljø som tenkjer nytt, deler kunnskap og jobbar tett saman. Gjennom denne stillinga vil du vere med å påverke samfunnsutviklinga og du får bidra til framtidsretta løysingar på fagfeltet ditt. Du får med dette ei viktig oppgåve med mykje ansvar, og vi treng medarbeidarar som ønskjer å utvikle seg i takt med nye utfordringar.

Vi tilbyr også:

• introduksjonsprogram og fadderordning
• fleksitid og gode ordningar for avspasering
• pensjonsordning og høve til å få lån i Statens pensjonskasse
• etatsskular og gode høve for fagleg påfyll
• bedriftshytter/bedriftsidrettslag

Løn blir avtala nærare i samsvar med lønnspolitikken vår.

Statens vegvesen meiner at inkludering og mangfald er ein styrke. Vi ynskjer medarbeidarar med ulike kompetansar, fagkombinasjonar, livserfaring og perspektiv, for å bidra til enda betre oppgåveløysing. Vi vil legge til rette for medarbeidarar som treng det.

Dersom det er kvalifiserte søkarar med funksjonsnedsetting, hol i CV-en, eller innvandrarbakgrunn, vil vi kalle inn minst éin søkar i kvar av desse gruppene til intervju. For å bli vurdert som søkar frå desse gruppene, må du oppfylle visse krav. Les meir om krava på Arbeidsgivarportalen.

Viss du høyrer til ei av desse gruppene, oppfordrar vi deg til å melde frå om dette ved å krysse av for det i jobbsøkarportalen. Avkryssinga dannar grunnlag for anonymisert statistikk, som alle statlege verksemder rapporterer i årsrapportane sine.

Vi gjer merksam på at søkjarlista kan verte offentleggjord, sjølv om du har bede om unntak frå denne. Du vil i så fall bli varsla.

Dersom du ønskjer meir utfyllande opplysningar om stillinga og arbeidsoppgåvene kan du kontakte  prosjektdirektør Kjartan Hove på mobil 90110586.