Barnevernleiar

Vil du bli med på laget og bli vår nye barnevernleiar? 

Me treng ein engasjert leiar som brenn for fagfeltet og har stort engasjement for å gje barn og unge i kommunen ein god oppvekst. 

Barnevernet i Kvam har ny organisering med leiar, assisterande leiar og fagansvarlege for mottak, tiltak og omsorg. Det er sju saksbehandlarar, ein miljøarbeidar og ein sekretær i avdelinga. Barnevernet er samlokaliserte med PPT, familiesenter, helsestasjon og skulehelseteneste og fysioterapiteneste for barn og unge i nye lokale ved rådhuset i Norheimsund.  Barnevernleiar skal saman med dei andre leiarane i oppveksteininga, utvikla og skapa heilskapleg og kvalitativt gode tenester til barn, unge og deira familiar.  Målet for tenesta er å vera ei velfungerande teneste i tråd med lov og forskrift, der brukarane er nøgde og tilsette trivs og opplever fagleg utvikling og meistring. I tenesta er det er stort fokus på eit godt fagleg barnevern, tverrfagleg samarbeid, fagleg rettleiing og kontinuerleg forbetringsarbeid.

Kvam har avtale med Bergen kommune om barnevernvakt. 

Arbeidsoppgåver

• Drift av barneverntenesta etter lov om barneverntenester
• Fag, personal og økonomiansvar
• Bidra til god samhandlingskultur som sikrar barn og unge eit helskapleg tenestetilbod 
• Byggja kultur for samarbeid og å gjera kvarandre gode
• Tilretteleggja for at samarbeidspartar og andre har låg terksel for å ta kontakt med barneverntenesta
• Evaluera og vidareutvikla den nye organiseringa saman med dei tilsette
• Planleggja for rett bruk og deling av kompetanse
• Gje fagleg rettleiing til tilsette
• Fagleg mynde etter lov om barneverntenester
• Internkontroll og kvalitetsforbetringsarbeid
• Kvalitetssikring av rapportering og dokumentasjon

Kvalifikasjonar

• Bachelor eller master i barnevern eller sosialt arbeid, jurist eller anna relevant høgskule/universitetsutdanning
• Det er ynskjeleg med leiarutdanning og leiarerfaring
• Kompetanse/erfaring frå 1. linjetenesta i barnevernet
• Rettleiingskomptetanse er ynskjeleg 
• Godt kjennskap til det aktuelle lovverket

Personlege eigenskapar

• Er ein tydeleg, raus og motiverande leiar som kan ta avgjerder
• Har  evne til å inspirera, rettleia, tenkja nytt og jobba målretta med utfordringar
• Har ei strukturert og ryddig arbeidsform og byggjer kultur for samarbeid

Personlege eigenskapar blir tillagt stor vekt ved tilsetjing 

Vi tilbyr

• Inspirerande, utfordrande og varierte arbeidsoppgåver i ei utviklingsorientert og framtidsretta barnevernsteneste.
• Ei spennande leiarstilling i eit tverrfaglig leiarteam i Oppvekst
• Eit godt arbeidsmiljø med engasjerte kollegaer
• Lønn etter avtale
• Gode offentlege pensjons- og forsikringsvilkår 

Generell informasjon:
Den kommunale organisasjonen skal i størst mogleg grad spegla mangfaldet i befolkinga. Målet er difor å oppnå ei balansert samansetjing når det gjeld alder, kjønn og kulturell bakgrunn. Kvam herad ønskjer å inkludera og leggja til rette for personar med nedsett funksjonsevne. I Kvam herad er det offisielle styringsmålet nynorsk. Alle tilsette i alle kommunale organ pliktar å nytta nynorsk skriftspråk i tenesta. Me gjer merksam på at etter offentleglova § 25 kan opplysningar om søkjaren bli offentlege sjølv om søkjaren har oppmoda om ikkje å bli ført opp på søkjarlista. Dersom oppmodinga ikkje vert teke til følgje, vert søkjaren varsla om dette.