Vil du jobbe for auka deltaking i arbeids- ogsamfunnsliv?

Kompetansen til menneska er ein av Noreg sine viktigaste ressursar. Derfor tar Kompetanse Noreg samfunnsoppdraget vårt på alvor; at alle skal kunne lære heile livet og sikre seg kompetansen vi som befolkning treng. Karriererettleiing er eit viktig verkemiddel for å kunne utføre samfunnsoppdraget, og eitt av våre mål er å sørge for at både unge og vaksne har tilgang til gratis, offentleg karriererettleiing av høg kvalitet. Digitalisering og kvalitetssikring er viktige verktøy for å nå dette målet.

Kompetanse Noreg har nasjonalt systemansvar for karriererettleiing. Seksjonen vår i Tromsø har mellom anna ansvar for å bygge opp og drifte ei digital karriererettleiingsteneste for heile landet og bidra i utviklinga av karriererettleiingsfeltet og kompetansepolitikken. Dette inneber mellom anna fagleg utvikling, organisering og drift av den digitale tenesta i samarbeid med utdanning.no, nettverksarbeid, utgreiingsoppgåver, kommunikasjon, utvikling av kunnskapsgrunnlaget og samarbeid med andre nordiske land. Seksjon for Karrieretenester er plassert i avdeling for Karriererettleiing, og vil frå våren 2020 bestå av om lag 14 dyktige medarbeidarar med kompetanse innanfor karriererettleiing, opplæringsfeltet og arbeidsliv. For å leie arbeidet ser vi nå etter ein utviklingsorientert seksjonsleiar som kan sørge for effektiv og profesjonell drift og vidareutvikling av seksjonen. Les meir om oss her: kompetansenorge.no

Den statlege arbeidsstyrken skal i størst mogleg grad spegle mangfaldet i samfunnet. Det er derfor eit personalpolitisk mål å få til ei balansert samansetjing av tilsette på tvers av alder og kjønn, og å rekruttere personar med innvandrarbakgrunn, nedsett funksjonsevne og personar som har stått utanfor arbeid og utdanning i ein lengre periode. Opplysningar om dette kan bli brukt til registerformål.

• leiing og fagleg oppfølging av arbeidet i seksjonen, inkludert ansvar for utvikling og drift av ei nasjonal digital karriererettleiingsteneste for heile landet
• personal-, økonomi- og budsjettansvar for seksjonen
• styring av seksjonen sine ressursar, medrekna oppgåvefordeling mellom medarbeidarar
• utforming av innspel til nasjonal politikk innanfor områda kompetansepolitikk og karriererettleiing
• deltaking i vekentlege avdelingsleiarmøte, andre leiarmøte og leiarsamlingar med kollegaer frå Bergen og Oslo
• synleggjere seksjonen på relevante arenaer og kommunisere med aktuelle avgjerdstakarar, partane i arbeidslivet og relevante fagpersonar
• samarbeide med fylkeskommunar og med utdanning.no, som frå nyttår vert ein del av Kompetanse Noreg sitt kontor i Tromsø

Gjennom engasjementet ditt og den løysingsorienterte haldninga di vil du bidra til at Kompetanse Noreg når måla sine, trekkjer til seg, beheld og utviklar dyktige medarbeidarar og har effektive arbeidsprosessar. Kompetanse Noreg har AV-utstyr av høg kvalitet for samarbeid på tvers av lokasjonar. Noko reiseverksemd må du likevel regne med.

• høgare relevant utdanning på minimum bachelor-nivå, eksempelvis innan samfunnsfag, humanistiske fag, HR, pedagogikk, administrasjon og leiing eller liknande*
• erfaring frå ein leiarrolle med eller utan personalansvar (t.d. seksjonsleiar, avdelingsleiar, prosjektleiar eller teamleiar)
• minst tre års relevant arbeidserfaring
• kjennskap til kompetansepolitikk og karriererettleiingsfeltet
• kjennskap til offentleg forvaltning og god rolleforståing
• god innsikt i bruk av digitale verktøy og løysingar
• særs gode skriftlege og munnlege norskferdigheiter og god formidlingsevne

* Realkompetanse kan i visse tilfelle erstatte formell utdanning.

Det er også ein fordel med:

• erfaring med å skrive t.d. notat, innspel eller høyringssvar innanfor ramma av offentleg forvalting
• god kjennskap til prosjektmetodikk
• erfaring med å leie utviklingsprosessar, t.d. tenesteutvikling, fagleg utvikling/kompetanseutvikling, innføring/utvikling av nye løysingar eller digitaliseringsprosessar
• nettverk i kompetansefeltet
• god framstillingsevne på engelsk

At ein er personleg egna til stillinga vil også verte vektlagt.

• du taklar godt høgt arbeidspress i periodar, og evner å arbeide strukturert sjølv under stressande situasjonar
• du er ein utviklingsorientert og handlekraftig leiar som vert motivert av å spille dei rundt deg gode
• du er god på å samarbeide og kommuniserer tydeleg
• du er ein trygg leiar som evner å jobbe sjølvstendig i leiarrolla
• du evner både å ta nye initiativ og å jobbe raskt for å ferdigstille pågåande oppgåver.
• du er ein motiverande, resultatorientert, modig og open leiar

• ei spennande leiarutfordring blant kompetente medarbeidarar frå ulike faglege bakgrunnar
• ein dynamisk arbeidsplass som står sentralt i utforminga av det nasjonale karriererettleiingstilbodet
• bryne deg på komplekse utfordringar som har ei reell påverking på nasjonale føringar for karriererettleiing
• arbeidsplass på trivelege, moderne kontor sentralt i Tromsø
• moglegheiter for eiga kompetanseutvikling

Dette kjem sjølvsagt i tillegg til?

• fast stilling som seksjonsleiar, lønna i lønnskode 1059 Underdirektør med eit lønnsspenn mellom kr. 704 900 og kr. 813 400 i Statens lønnsregulativ. For spesielt kvalifiserte søkarar, kan høgare lønn vurderast. Lønn blir avtalt etter ei samla vurdering av kvalifikasjonar.
• fleksitidsordning
• mobiltelefonordning
• medlemskap i Statens Pensjonskasse som gir gunstig pensjonsordning og moglegheit for bustadlån. Til dette vert det trekt to prosent av lønna til lovfesta innskot.

Tittel og navn: fungerande avdelingsleiar Ingjerd Espolin Gaarder

Telefon: 98 82 88 11

E-post: ingjerd.gaarder@kompetansenorge.no

Vi gjer oppmerksam på at opplysningar om søkaren kan bli offentleggjort sjølv om søkaren har bedt om ikkje å bli ført opp på søkarlista, jf. offentleglova § 25. Søkarane vil i tilfelle bli informerte om dette på førehand.