Personvernombod Haukeland universitetssjukehus

Vi søker ein dyktig og engasjert person til stillinga som personvernombod. Dette er ein spennande stilling for deg som ønsker å utvikle sjukehuset sitt arbeid på området. Som personvernombod vil du bidra til ei tryggare helseteneste, mellom anna ved å sikre at pasientane, brukarane, pårørande og medarbeidarar sitt vern av privatliv blir varetatt på ein god måte i sjukehuset sin omfattande behandling av personopplysningar.

Som personvernombud på Haukeland universitetssjukehus har du ei sjølvstendig og uavhengig stilling med direkte rapporteringsline til administrerande direktør. Organisatorisk vil du være ein del av Avdeling for e-helse, som har eit breitt fagmiljø innan mellom anna IKT, informasjonssikkerheit og beredskap. Du vil ha tett samarbeid med vår informasjonssikkerheitsleiar (CISO) og med personvernrådgjevarar ved Avdeling for forsking og innovasjon. Vidare vil du ha tett kontakt med fagdirektør.

Arbeidsoppgåver

Som personvernombod vil du i sterk grad bidra til at sjukehuset føl personvernregelverket, og til vidareutvikling av det systematiske arbeidet med personvern. Ein viktig del av dette arbeidet vil vere rådgiving og opplæring i personvern internt i sjukehuset. Som personvernombod vil du bidra i personvernkonsekvens vurderingar (DPIA), risikovurderingar og handtering av avvik der brot på personopplysingssikkerheita kan vere aktuelt. Du vil også vere kontaktpunkt for Datatilsynet og delta i oppfølging når våre registrerte ber om innsyn i logg, retting, sletting av opplysningar med vidare. Vidare vil du vere ein viktig ressurs til interne systemrevisjonar, leiinga sin gjennomgang og andre saker om personvern og informasjonssikkerheit som blir behandla i sjukehusleiinga og i styret for Helse Bergen HF. Som personvernombod på regionsjukehuset vil du også ha ein viktig rolle i Helse Vest sitt personvernutval, og bidra til godt samarbeid om personvern i alle verksemdene i Helse Vest; sjukehusa, apoteka og i Helse Vest IKT.

Kvalifikasjonar

• Høgare utdanning på masternivå innanfor jus er nødvendig, formell kompetanse innan personvern og/eller informasjonssikkerheit er ønskeleg
• Svært god kunnskap og kompetanse innan personvernlovgivinga, praktiseringa av den og av personvernombodet sine lovbestemte oppgåver
• God organisasjonsforståing og erfaring med komplekse prosessar

• Det er ein fordel at du:
  - liker og har erfaring fra å gje opplæring, råd og støtte kollegaer for å få til etterleving av personvernkrav
  - har erfaring frå praktisk arbeid med personvern, som m.a. personvernkonsekvensvurderingar, risikovurderingar og handtering av avvik knytt til brot på personopplysningssikkerheita
  - har erfaring frå eller interesse for arbeid med digitalisering og teknologi
  - har erfaring frå eller interesse for spesialisthelseteneste på sjukehus

• Du må kommunisere godt på norsk, både munnleg og skriftleg.

Personlege eigenskapar

For å lukkast i jobben må du kommunisere godt, både munnleg og skriftleg. Du byggjer relasjonar på tvers av nivå og einingar i sjukehuset, og er god til tverrfagleg samarbeid. Du formidlar personverntema til leiarar og medarbeidarar i sjukehuset, slik at vi forstår kva det går i, og du samarbeider med teknologar slik at vi får gode system for innebygd personvern i våre IKT-løysingar. Vi ser etter deg som har ei strategisk og risikobasert tilnærming til personvernspørsmål, og som skaffar deg oversyn over den omfattende og komplekse verksemda vi driv med i sjukehuset. Du er sjølvstendig og fleksibel, og du ser utfordringar som moglegheit til fagleg og personleg vekst.

Du har:

- evne til å arbeide planmessig og sjølvstendig
- evne til å gjennomføre oppgåver og prosjekt og få ballen heilt i mål
- evne til å balansere omsyn til personvern og omsyn til pasienttryggleik og øvrige rammevilkår i sjukehuset
- evne til å sjå andre sine perspektiv og akseptere deira standpunkt, og samstundes vere bestemt når det trengs

Vi tilbyr

• Som personvernombod på Haukeland universitetssjukehus vil du jobbe tett på pasientar, helsepersonell, forskarar, leiinga, leverandørar og innovatørar med ein teknologikompleksitet som overgår dei fleste bransjar
• Du vil inngå i eit godt arbeidsfellesskap i E-helse, i sjukehuset og regionalt med folk som er genuint opptatt av å levere gode helsetenester - no og i framtida
• Løn etter avtale, gode pensjons- og forsikringsordningar, og stor grad av fleksibilitet

Vi oppfordrar alle søkarar til å nytte Vitnemålsportalen for å laste opp verifiserte vitnemål og karakterutskrifter, der det er mogleg. Har du utdanning frå utlandet, legg ved godkjenning frå Direktoratet for høgare utdanning og kompetanse.

Helse Bergen, Haukeland universitetssjukehus, har nærare14.000 tilsette som har som mål å gi best mogleg helsehjelp til pasientane våre, og rett opplæring til pasientar og pårørande. Kvart år behandlar vi over 900.000 pasientar og bidreg i utdanninga av fleire tusen helsearbeidarar. Forsking og innovasjon er og viktige oppgåver i sjukehuset. Les meir på www.helse-bergen.no eller facebook.

Helse Vest skal så langt som råd avspegle mangfaldet i befolkninga.  Vi ønsker å rekruttere medarbeidarar uavhengig av kjønn med ulik kompetanse, fagkombinasjonar, livserfaring og perspektiv for å bidra i spesialisthelsetenesta.