Vikariat – nynorskbruk i forvaltninga, språk i opplæringa og nasjonale minoritetsspråk

Språkrådet har ledig eit vikariat til og med desember 2026. Vi ser etter deg som ønskjer å arbeida for å nå dei språkpolitiske måla for nynorskbruk i statsforvaltninga, for opplæringa i skolen og for dei nasjonale minoritetsspråka kvensk, romani og romanes.

Arbeidsoppgåver

Hovudoppgåvene i stillinga er å

• rettleia kommunar, fylkeskommunar og statsorgan om reglane i lov om språk (språklova)

• arbeida for å følgja opp og sikra at dei språklege rettane til elevar i skolen blir oppfylte

• handsama saker etter språklova

• følgja opp klager på brot på reglane om nynorsk og bokmål i språklova

• vidareutvikla dei digitale tilsynsrutinane til Språkrådet i samarbeid med andre i Språkrådet

Andre arbeidsoppgåver kan bli lagde til stillinga.

Kvalifikasjonar

Du må ha

• utdanning minst på mastergradsnivå eller tilsvarande, gjerne med pedagogikk, språkfag eller juss i fagkrinsen

• god kjennskap til regelverket for nynorsk i opplæringa og i det offentlege

• kjennskap til stoda for dei nasjonale minoritetsspråka

• særs god kompetanse i bokmål og nynorsk

I særlege tilfelle kan realkompetanse vega opp for manglande formalkompetanse.

Personlege eigenskapar

Vi ser etter deg som

• har interesse for språkpolitikk og utdanningspolitikk

• har god samfunnsforståing og rolleforståing

• har gode samarbeidsevner og likar utetterretta arbeid

• kan arbeida sjølvstendig, strukturert og målretta

• trivst med høgt tempo og eit breitt sett av oppgåver

Vi tilbyr

• interessante faglege utfordringar i ein organisasjon med eit viktig samfunnsoppdrag

• eit hyggjeleg og sterkt fagmiljø med kunnskapsrike og engasjerte kollegaer

• fagleg utvikling

• moderne og trivelege kontorlokale sentralt i Oslo med innandørs sykkelparkering og kort veg til kollektivnettet i Oslo

• subsidiert kantine

• fleksibel arbeidstid

• høve til å arbeida på heimekontor (etter nærare avtale)

• høve til å trena i arbeidstida

• medlemskap i Statens pensjonskasse

Stillinga blir lønt som rådgivar i stillingskode 1434, kr 580 000 til kr 680 000, alt etter kvalifikasjonar og erfaring. For særleg kvalifiserte søkjarar kan vi vurdera høgare lønn.

Språkrådet meiner at inkludering og mangfald i arbeidslivet gjer at vi kan utføra samfunnsoppdraget vårt på ein god måte. Derfor ønskjer vi medarbeidarar med variert kompetanse og livserfaring og ulike fagkombinasjonar og perspektiv. Dersom det er kvalifiserte søkjarar med funksjonsnedsetjing, hol i CV-en eller innvandrarbakgrunn, skal vi kalla inn minst éin søkjar frå kvar av desse gruppene til intervju. For å bli vurdert som søkjar i desse gruppene, det vil seia å bli positivt særbehandla på denne måten, må søkjarane oppfylla visse krav. Les meir om krava på Arbeidsgivarportalen (https://arbeidsgiver.difi.no/positivsaerbehandling).

Vi vil leggja til rette for medarbeidarar som treng det. Aktuell tilrettelegging kan til dømes vera tekniske hjelpemiddel, tilpassing av møbel eller endring av rutinar og arbeidstid.

Vi oppmodar søkjarar om å kryssa av i jobbsøkjarportalen dersom dei har funksjonsnedsetjing, hol i CV-en eller innvandrarbakgrunn. Avkryssingane i jobbsøkjarportalen blir anonymisert statistikk som alle statlege verksemder rapporterer om i årsrapportane sine.

Fyll ut CV-felta i portalen (sjølv om du legg ved ein ferdig utfylt CV), og legg ved relevante vitnemål (frå Vitnemålsportalen). Dokumentasjon frå NOKUT/Direktoratet for høgare utdanning og kompetanse er påkravd for utdanning tatt i utlandet.

Vi gjer merksam på at opplysningar om søkjarane kan bli offentlege sjølv om søkjarane har bede om å ikkje bli førte opp på søkjarlista, jf. offentleglova § 25. Vi kjem til å kalla inn til intervju frå midten av august.

Nærmare opplysningar om stillinga får du av avdelingsdirektør Margrethe Kvarenes på telefon 94 89 47 89.

Språkrådet er statens forvaltningsorgan i språkspørsmål og følgjer opp den norske språkpolitikken på oppdrag frå Kultur- og likestillingsdepartementet. Språkrådet arbeider med å styrkje det norske språket og språkmangfaldet i Noreg og har ansvar for å følgje opp språka norsk (nynorsk og bokmål), norsk teiknspråk, kvensk, romanes og romani