Inaktiv

Er du ein leiar som jobbar tillitsbasert og kan bygge gode relasjonar til NAV sine samarbeidspartnarar?

Arbeidsgiver: NAV
Stillingstittel: Assisterande fylkesdirektør
Frist: 30.05.2024
Ansettelsesform: Fast

NAV fylkeskontor Vestland har det overordna ansvaret for gjennomføringa av arbeids- og velferdspolitikken i Vestland med styringsansvar for ni regionarog ei spesialeining. Fylkeskontoret er lokalisert i Bergen med 45 tilsette fordelt på fire avdelingar; avdeling partnarskap og kommunikasjon, avdeling fag og tenester, avdeling HR og organisasjon og avdeling økonomi og analyse. No ser vi etter ein engasjert og handlekraftig assisterande fylkesdirektør som vil samarbeide tett med fylkesdirektøren og leie ei nyoppretta avdeling med ansvar for partnarskap og kommunikasjon.

Oppfølging av partnarskap i NAV er ei stor og viktig oppgåve. Vi har 39 NAV-kontor i NAV Vestland, spreidd over store geografiske avstandar. Desse NAV-kontora skal levere både kommunale og statlege arbeids- og velferdstenester. Samarbeidet mellom stat og kommune er avgjerande for å sikre eit samordna og godt tilgjengeleg tenestetilbod. Partnarskapet blir utøvd på leiarnivå gjennom møte mellom kommunedirektør og fylkesleiinga i NAV ved fylkesdirektør og assisterande fylkesdirektør. I desse møta blir satsingsområde og prioriteringar for NAV-kontora drøfta.

Assisterande direktør vil og bli leiar for ei avdeling på fylkeseininga. Avdelinga inneheld miljøet for digital omstilling og fylket sine kommunikasjonsressursar.Stillinga rapporterer til fylkesdirektør og blir ein del av ei dyktig og engasjert leiargruppe i NAV Vestland.

Hos oss får du utfordrande arbeidsoppgåver i eit høgt tempo, og eit fagleg sterkt arbeidsmiljø. Vi kan love innhaldsrike og utviklande arbeidsdagar i ein organisasjon som aldri står stille. Det er viktig at du blir motivert av samfunnsoppdraget til NAV og kjenner deg att i verdiane våre; tydeleg, til stades og løysingsdyktig.

Arbeidsoppgåver

Representere NAV mot kommunane, samarbeidspartnarar ogvere ein aktiv samfunnsaktør
Representere fylkesleiinga i NAV og tre inn for fylkesdirektør ved behov
Ansvar for kvalitet og tenesteleveranse i NAV kontor, herunder oppfølging av kontora
Personal- og budsjettansvar for avdelinga
Drive forbetring, endring og omstilling
Bruke kompetansen din inn i leiargruppa, og bidra til å utvikle samarbeidet mellom avdelingane på fylkeskontoret
Skape resultat i tråd med samfunnsoppdraget
Ivareta og utvikle samarbeid både med interne og eksterne aktørar
Sikre kontinuerleg merksemd på måla om å få fleire i arbeid og aktivitet, og spesielt dempe utanforskapen

Du vil bli leiar for ei nyoppretta avdeling, så oppgåvene vil kunne endre seg noko i takt med behov.

Kvalifikasjonar

Fullført utdanning på minimum bachelornivå. Relevant utdanning og/eller leiarerfaring kan kompensere for utdanningskravet.
Erfaring som leiar med personal- og budsjettansvar
Erfaring frå omstillings- og utviklingsprosessar
God kjennskap til offentleg forvaltning og velferdstenestene
Forståing av leiing i staten og samfunnsoppdraget
God framstillingsevne, både skriftleg og munnleg

Det er ein fordel om du og har:

Tilleggsutdanning innan leiing
Forståing for digitalisering og utvikling av framtidsretta tenester
Forståing for medbestemming og samhandling med fagorganisasjonar
Kjennskap til LEAN som arbeidsmetodikk

Kva vi ser etter hos deg

I tråd med NAV sine verdiar er du "tydeleg, til stades og løysingsdyktig". Som leiar i NAV jobbar du tillitsbasert, er tydeleg og open med ein motiverande og inkluderande leiarstil. Under utøving av tillitsbasert leiing er det viktig å bygge tillit og ha evne til å sjå potensialet i dei tilsette og samarbeidspartnarar.

Evne til å bygge gode relasjonar er ein særleg sentral eigenskap i denne rolla. I tillegg ser vi etter ein leiar med gode samarbeidsevner og som kommuniserer tydeleg.

Du tenker strategisk og heilskapleg og trivst i skjeringspunktet mellom velferd, forvaltning og politikk. Du forstår offentleg forvaltning og bidreg til gode løysingar på komplekse problemstillingar. Som person har du handlekraft, er sterk på gjennomføring og er resultatorientert med evne til å sjå operative og praktiske konsekvensar. Du har også stor arbeidskapasitet.

Vi tilbyr

Hos oss får du jobbe med meiningsfylte og utfordrande arbeidsoppgåver innan eit høgt prioritert samfunnsområde
Du får eit godt arbeidsmiljø med aktive og engasjerte medarbeidarar som brenn for samfunnsoppdraget
Vi har trivelege og sentralt plasserte kontorlokale i Bergen sentrum
Vi tilbyr tilsetting i stillingskode 1060 avdelingsdirektør med lønsspenn frå kr. 895 500 til kr. 1102 200 per år (tilsvarande ltr. 81 - 89). For særleg kvalifiserte søkarar kan noko høgare løn vurderast.
God låneordning, forsikringar og pensjonsordning gjennom Statens pensjonskasse

Om arbeidsgiveren

NAV søkjer tilsette med hjarte for menneske og fagområda våre. Visjonen vår er å gje menneske moglegheiter, og dette gjer vi ved å utvikle Noregs beste arbeids- og velferdstenester.

NAV består av 22 000 kompetente og engasjerte medarbeidarar. Vi jobbar tverrfagleg i sterke fagmiljø. Hos oss skal arbeidsmiljøet pregast av involvering, openheit og tillit.

Mangfald er viktig i NAV. Mangfald bidreg til betre problemløysing, auka kreativitet, større fleksibilitet og styrker kulturen og arbeidsmiljøet på arbeidsplassen. Vi oppmodar difor kandidatar med ulik bakgrunn til å søke på stillingar hjå oss, særleg om du har hol i CV-en, innvandrarbakgrunn eller nedsett funksjonsevne.

Ønskjer du å bli unntatt frå offentleg søkjarliste, må du grunngje dette. Del gjerne vitnemålet ditt eller karakterutskriftene dine på vitnemålsportalen.no.

NAVstilling