Postdoktor knytt til Nasjonalt prosjekt for lærarrekruttering

Postdoktor knytt til Nasjonalt prosjekt for lærarrekruttering

Ved Høgskulen på Vestlandet, Fakultet for lærarutdanning, kultur og idrett er det ledig ei stilling som postdoktor knytt til Nasjonalt prosjekt for lærarrekruttering

Om stillinga:

Ved Høgskulen på Vestlandet (HVL), Fakultet for lærarutdanning, kultur og idrett (FLKI) er det ledig ei åremålsstilling som postdoktor knytt til Nasjonalt prosjekt for lærarrekruttering. 

Nasjonalt prosjekt for lærarrekruttering har som mål at fleire skal søkje lærarutdanning og starte i yrket. I tett samarbeid med UH-institusjonar, barnehage- og skuleeigarar, studentar og andre relevante aktørar, er målet å utvikle nasjonale og regionale tiltak for god rekruttering til lærarutdanningane og læraryrket. Prosjektet skal bidra til at framtidige søkarar til utdanningane og yrket har relevant kunnskap om kva det vil seie å vere lærar i barnehage og skular.

Høgskulen på Vestlandet har sidan 2019 leia det nasjonale rekrutteringsarbeidet med finansiering frå Kunnskapsdepartementet. Gjennom åra har det vore fokus på å få inn menn i læraryrket, mangfald i yrket og på rollemodellar. Viktige samarbeidspartnarar i prosjektet er UiT Noregs arktiske universitet, Høyskolen i Innlandet og Nord Universitet. Prosjektet ønskjer no å styrke det forskingsbaserte- og kunnskapsutviklande arbeidet, og det blir derfor lyst ut ei stilling som postdoktor.

Postdoktorstillinga er ei åremålsstilling med ei tidsramme på tre år i full stilling. Stillinga kan bli utvida til fire år om det blir lagt 25% pliktarbeid til stillinga ved HVL. 

Tilsetting i stilling som postdoktor har som hovudmål å kvalifisere for arbeid i faglege toppstillingar. 
Den som blir tilsett må utarbeide ein plan for dette kvalifiseringsarbeidet i samråd med forskingskoordinator for rekruttering til lærarutdanning. Det er ein føresetnad at den som blir tilsett, gjennomfører postdoktorprosjektet i løpet av tilsetjingsperioden.

Postdoktoren vil ha sin arbeidsstad/tilknyting til Fakultet for lærarutdanning, kultur og idrett. Tilsetjing i postdoktorstilling krev at ein har den daglege arbeidsplassen sin ved HVL ved campus Bergen, Sogndal eller Stord, og rettar seg etter dei retningslinjene som til kvar tid gjeld for stillinga.

Det er ønskeleg med tiltreding 01.08.2024.

Ansvars- og arbeidsområde:

Postdoktoren blir ein del av Nasjonalt prosjekt for lærarrekruttering, og skal forske på rekrutteringstiltak og -strategiar for lærarutdanningane med vekt på følgjande oppgåver:

• Utvikle eigne forskingsspørsmål og forskingsområde.
• Planlegge, koordinere og gjennomføre datainnsamling.
• Framstille og presentere forsking skriftleg og munnleg i vitskapelege tidsskrift og på konferansar.
• Analyse av søkjartal og rekrutteringsutfordringar.
• Samarbeide med nasjonale og regionale aktørar om å utvikle kunnskap om rekruttering til lærarutdanningane. 
• Bidra til utvikling av tiltak for å auke antalet studentar som vel lærarutdanningar.

Kvalifikasjonskrav:

Søkjaren må ha doktorgrad innan utdanningsvitskap, pedagogikk eller tilsvarande. Søkarar med doktorgrad frå andre fagområde som kan dokumentere god kjennskap til tematikken i utlysinga, t.d. gjennom fagleg vinkling på doktoravhandlinga, kan bli vurdert som kvalifiserte. Doktorgrad må vere oppnådd ved søknadsfristen.

Søkjaren må kunne kommunisere godt på norsk og engelsk, skriftleg og munnleg. 

Søkjaren må leggje ved ei prosjektskisse på inntil 5 sider (litteraturliste kjem i tillegg) med ein tydeleg plan for forskingsaktivitetane. Skissa skal også innehelde ein framdriftsplan for hovudaktivitetane i prosjektet - inkludert plan for publisering og spreiing av forskingsresultat.

Ønskja kvalifikasjonar:

• God kunnskap om både kvantitative og kvalitative forskingsmetodar.
• Erfaring med eksperimentell forsking.
• God kjennskap til lærarutdanningar og rekrutteringsutfordringar.
• Erfaring med å arbeide sjølvstendig og saman med nasjonale og internasjonale fagmiljø.
• Erfaring frå forsking innan rekruttering, fråfall og/eller motivasjon.

Personlege eigenskapar:

• God evne til sjølvstendig og systematisk arbeid.
• God samarbeidsevne.
• Evne til å ta initiativ og vise ansvar.
• God evne til munnleg og skriftleg kommunikasjon.
• Høgt etisk medvit i møte med informantar.

Ved bedømming vil hovudvekta bli lagt på søkjar sine kvalifikasjonar for tematikken i utlysinga, prosjektskissa, samt på kvaliteten i tidlegare forsking og innleverte vitskaplege arbeid.

Aktuelle søkjarar vil bli invitert til intervju med prosjekt-presentasjon.

Stillingskategorien postdoktor er regulert av Forskrift om ansettelsesvilkår for stillinger som postdoktor, stipendiat, vitenskapelig assistent og spesialistkandidat (https://lovdata.no/dokument/SF/forskrift/2006-01-31-102), fastsett av Kunnskapsdepartementet 31.1.2006 med heimel i Universitets- og høgskulelova. §1-4.

Korleis søkje på stillinga?

Send søknad og CV ved å klikke på knappen merka "Søk stillingen" på denne sida.

Søkjaren skal leggje fram framlegg til prosjektskisse for kvalifiseringsarbeidet basert på hovudprosjektet. Det er ein føresetnad at søkjaren vil kunne gjennomføre delprosjektet i løpet av tilsettingsperioden, og at skriftlege vitskaplege arbeid er sendt til vurdering i tidsskrift innan to år. Prosjektskissa skal vere på inntil 5 sider inkludert referansar, framdrifts- og publiseringsplan (Skriftstørrelse 12, Times New Roman og linjeavstand 1). Den kan skrivast på skandinaviske og engelske språk. 

Vi gjer merksam på at søknader vert vurdert ut frå den informasjon som er lagt inn i www.jobbnorge.no ved søknadsfristens utløp. Det er søkjar sitt ansvar å sørgje for at alle relevante vedlegg er lagt inn innan fristen, irekna;

• Prosjektskisse for kvalifiseringsarbeidet basert på hovudprosjektet (maks 5 sider).
• CV, Vitnemål og karakterutskrift for alle akademiske grader.
• Vitskaplege arbeid (inntil 5 stk).
• Fullstendig publikasjonsliste.

Dersom vitnemåla, karakterutskrifter eller annan dokumentasjon ikkje er på eit skandinavisk språk eller engelsk, må søkjar sjølv laste opp attesterte omsettingar. Om vedlegga overskrider 25 MB må dei komprimerast før opplasting eller leggjast ved som lenkje, total maksgrense for opplasting av vedlegg er 50 MB.

Søkjarar med utanlandsk utdanning må i tillegg dokumentere at utdanninga samsvarar med norsk bachelor-, master-eller ph.d.-grad.  Sjå www.hkdir.no for meir informasjon om vurdering av høgare utdanning.  (https://hkdir.no/utdanning-fra-utlandet/jeg-har-utdanning-fra-utlandet/sok-godkjenning-av-hoyere-utdanning-bachelor-master-ph-d)

HK-dir tilbyr automatisk godkjenning for enkelte gradar frå utvalde land. Dersom utdanninga til søkjaren er dekka av ordninga med automatisk godkjenning, vil det vera tilstrekkeleg å leggje ved dokumentasjon på dette. Du kan lese meir om ordninga med automatisk godkjenning her. (https://hkdir.no/utdanning-fra-utlandet/jeg-har-utdanning-fra-utlandet/sok-godkjenning-av-hoyere-utdanning-bachelor-master-ph-d/automatisk-godkjenning-et-raskere-alternativ)

Vi gjer merksam på at søknad om vurdering gjennom den ordinære godkjenningsordninga til HK-dir kan ta tid. Du bør difor sende søknad om godkjenning så raskt som mogeleg når du veit at du vil søkje på stillinga.  Dersom du ikkje har fått svar frå HK-dir innan søknadsfristen, legg du ved dokumentasjon frå HK-dir om at dei har motteke søknaden din. 

Søkjarar vert vurdert av ein bedømmingskomité. Bedømminga skjer på bakgrunn av dokumentert kompetanse og andre krav fastsett i utlysinga. På bakgrunn av komitéen si innstilling vert aktuelle søkjarar kalla inn til intervju. Søknadane blir sendt elektronisk til bedømmingskomitéen.

Søknader kan ikkje sendast på e-post til enkeltpersonar ved høgskulen.

Vi tilbyr:

• Gode pensjons-, forsikrings-, og låneordningar i Statens pensjonskasse.
• Spennande fagmiljø med moglegheit for kompetanseheving - og utvikling.
• Høve for trening i arbeidstida.

Stillinga som postdoktort vert lønna i stillingskode 1352.

Frå lønna vert det trekt 2 % innskudd til Statens pensjonskasse.

Den som vert tilsett, må rette seg etter dei retningslinjer som til ein kvar tid gjeld for stilling.

Generell informasjon:

Vi gjer merksam på at unntak frå den offentlege søkjarlista vert handsama etter reglane i Offentleglova. Søkjarar som har bede om slikt unntak, vert varsla dersom ønskje ikkje vert teke til følgje.

Den statlege arbeidsstyrken skal i størst mogleg grad spegle mangfaldet i befolkninga. Det er difor eit personalpolitisk mål å oppnå ein balansert alders- og kjønnssamansetning, rekruttere personar med minoritetsbakgrunn, personar med nedsett funksjonsevne og hol i CV.

Kontaktpersonar ved Høgskulen på Vestlandet:

Prodekan Vegard Fusche Moe, e-post: vegard.fusche.moe@hvl.no , tlf 57 67 60 37

Professor Eirik Sørnes Jenssen, e-post: eirik.jenssen@hvl.no, tlf: 57 67 60 16