Vi søker jurist med noko erfaring og interesse for finansmarknaden, IKT og betalingstjenester

Vi har for tida ledig ei spennande stilling som jurist (førstekonsulent/rådgivar/seniorrådgivar) i seksjonen for tilsyn med IT og betalingstenester.

Vi søker deg som har interesse for betalingstjenester, eit velfungerande betalingssystem, IKT-sikkerheit i samfunnet og som har lyst til å arbeide med regelverk, regelverksoppfølging, utgreiingar og tilsyn på område med sentral tydning for verkemåten til finansmarknadene og betalingssystema. Stillinga som førstekonsulent/rådgivar/seniorrådgivar gir gode moglegheiter for fagleg utvikling på eit område som er i stadig endring.

Finanstilsynet har ansvar for regelverk og fører tilsyn med at norske finansføretak har ei føremålstenleg og trygg verksemd når det gjeld bruk av informasjons- og kommunikasjonsteknologi (IKT) og tilbod av betalingstenester. Finanstilsynet skal òg følge opp at den finansielle infrastrukturen er trygg, slik som system for betalingar. Det skjer ei rask utvikling når det gjeld teknologiske løysingar i betalingssystemet og i finansføretaka sin bruk av IKT generelt, og den digitale sårbarheita aukar.

Seksjonen fører tilsyn med finansføretaka sin bruk av IKT og dei elektroniske betalingstenestene. Seksjonen representerer Finanstilsynet i møte med føretak under tilsyn, andre myndigheitsorgan og andre aktørar nasjonalt. Han arbeider med utgreiingar og svar på høyringar frå Finansdepartementet og andre myndigheitsorgan forutan utvikling av regelverk. Seksjonen leier beredskapsutvalet for finansiell infrastruktur og representerer Finanstilsynet i arbeid knytt til finansiell infrastruktur, samfunnskritiske funksjonar og beredskap. Seksjonen deltar òg i internasjonalt samarbeid når det gjeld IKT-tilsyn, betalingsområdet og regelverksutvikling. Seksjonen har i dag elleve tilsette med brei og variert erfaring frå finanssektoren, tilsyn og arbeid med IKT-sikkerheit.

Arbeidsoppgåver

Arbeidsoppgåvene omfattar mellom anna:

• juridisk bistand i seksjonen sitt arbeid, bl.a. deltaking i og juridisk bistand ved tilsyn og oppfølging av føretak som yter betalingstenester og finansføretaka sin bruk av IKT generelt
• forvaltning og utvikling av norsk regelverk når det gjeld bruk av informasjons- og kommunikasjonsteknologi (IKT) innan finanssektoren
• bidrag i forvaltninga og utviklinga av norsk regelverk når det gjeld betalingstenester innan finanssektoren
• samhandling med andre seksjonar i Finanstilsynet og deltaking i arbeidet med konsesjonsbehandling på IKT- og betalingstenestefaglege område. Deltaking i arbeidet med utgreiingar og svar på høyringar frå Finansdepartementet og andre myndigheitsorgan.
• deltaking i arbeidet med den årlege risiko- og sårbarheitsanalysen (ROS) om finansføretaka sin bruk av IKT
• kontakt med utanlandske tilsynsmyndigheiter, særleg knytt til utanlandske føretak si verksemd i Noreg, eventuelt òg deltaking i arbeidsgrupper i europeiske tilsynsorganisasjonar
• stillinga kan bli ilagt andre arbeidsoppgåver knytt til dette tilsynsområdet

Kvalifikasjonar

• cand.jur./master i rettsvitskap med gode resultat og med interesse for funksjonsmåten til finansmarknadene
• god kunnskap om finansnæringa vil være ein fordel
• kjennskap til eller erfaring med EØS-rett vil være ein fordel
• noko relevant bransjeerfaring frå bank eller finansføretak, advokatkontor/konsulentverksemd eller offentleg forvaltning
• god skriftleg og munnleg framstillingsevne på norsk og engelsk

Personlege eigenskapar

• Du er initiativrik, tek ansvar for eigne arbeidsprosessar og arbeider strukturert, målretta og nøyaktig.
• Du har gode analytiske ferdigheiter og god gjennomføringsevne.
• Du har gode samarbeidsevner og er komfortabel med teamarbeid.

Det vil bli lagt vekt på at du er personleg eigna og har motivasjon for stillinga.

Vi tilbyr

• spennande og varierte arbeidsoppgåver i eit godt arbeidsmiljø med høg fagkompetanse
• gode moglegheiter for eiga fagleg utvikling
• gode velferdsordningar og ein fleksibel personalpolitikk
• moglegheit for heimekontor, for tida inntil to dagar i veka
• medlemskap og moglegheit for lån i Statens pensjonskasse
• fleksibel arbeidstid og betalt overtid
• gode treningsfasilitetar og moglegheit for å trene i arbeidstida
• tiltreding og lønn etter avtale

Anna

• Etter utløpet av søknadsfristen vil det bli utarbeidd ei offentleg søkarliste, jf. offentleglova § 25.
• Søkarar må legge ved vitnemål med karakterar og relevante attestar.
• Søknaden kan skrivast på nynorsk eller bokmål.
• Stillingstittelen vil avhenge av kvalifikasjonar og erfaring.
• Vi utfører bakgrunnssjekk av vedkommande som blir tilsett i stillinga.
• Tilsette i Finanstilsynet må følge strenge etiske retningslinjer, sjå: https://www.finanstilsynet.no/jobbhos-oss/#Etiskeretningslinjer
• Finanstilsynet er opptatt av mangfald, og vi oppmodar derfor alle kvalifiserte kandidatar til å søke jobb hos oss, uansett alder, kjønn, funksjonsevne, etnisk bakgrunn eller hol i CV-en. Dersom det er mogleg, vil vi legge til rette for medarbeidarar som har behov for det. For positiv særbehandling, sjå: http://arbeidsgiver.difi.no/positivsaerbehandling
• For nærmare omtale av Finanstilsynet, sjå: www.finanstilsynet.no