Er du ein pådrivar som brenn for digitalisering?

Arbeidsgiver: Herøy kommune
Stillingstittel: Digitaliseringsleiar
Frist: 12.12.2023
Ansettelsesform: Fast

Vil du leie arbeidet med å digitalisere kommunen, slik at vi utviklar stadig betre tenester? Då er denne stillinga jobben for deg.

Digitaliseringa skal hjelpe oss med å fornye, forenkle og forbetre tenestene i alle sektorane våre. Vi ser etter ein pådrivar som er god til å få oversikt og har orden i sakene. Du er ein lagspelar som er nysgjerrig på kva behov dei mange tenestene våre har. Du er utolmodig nok til å sjå nye moglegheiter og tolmodig nok til å få med deg andre.

Du vil gjere jobben i samspel med heile organisasjonen og nabokommunane våre. Stillinga høyrer til kommunikasjonsavdelinga, ei av avdelingane i sektoren for verksemdstyring. Sektoren er navet i organisasjonen og staben til kommunedirektøren.

Med andre ord: Her er du midt i smørauget i ein stor og svært allsidig organisasjon. Vi jobbar dessutan tett med dei andre kommunane på søre Sunnmøre. Og vi hentar stadig gode idear frå kommunar over heile landet.

Arbeidsoppgåver

drive fram digitaliseringsarbeidet i kommunen
utvikle og leie digitaliseringsrådet vårt
representere oss i det interkommunale digitaliseringsrådet i regionen
vere vår leveranseansvarleg overfor Søre Sunnmøre SSIKT
følge opp systemeigarane i arbeidet med å gi tilsette rett kompetanse
bygge opp og forvalte dokumentasjonen på bruken av digitale verktøy

Arbeidsoppgåvene vil bli endra etter kvart som behova og organiseringa endrar seg.

Kvalifikasjonar

relevant høgare utdanning
svært god kunnskap om og interesse for digitalisering og IKT
erfaring med å leie prosjekt
kunnskap om offentleg forvaltning
svært god organisasjonsforståing

Språket vårt er nynorsk. Om du ikkje kan nynorsk så godt, vil vi hjelpe deg med å lære det.

Personlege eigenskapar

er sjølvstendig og samarbeider svært godt
tar initiativ og har god gjennomføringsevne
motiverer og inspirerer andre
er systematisk, analytisk og målretta
formidlar svært godt, både skriftleg og munnleg

Vi tilbyr

eit godt arbeidsmiljø
sjansen til å vere med på å løyse det viktige samfunnsoppdraget vårt
høve til å utvikle deg sjølv og stillinga
løn etter avtale
gode forsikrings- og pensjonsordningar gjennom KLP
fleksibel arbeidstid

Vi tilset etter dei vilkåra som går fram av både tariffavtalen og ulike lover og reglement.

Aktuelle kandidatar vil bli kalla inn til intervju. Søkarlista er offentleg.

Om arbeidsgiveren

Herøy kommune i Møre og Romsdal er perla ytst i storhavet på Sunnmøre. Det er ein og ein halv time reisetid til Ålesund og under ein time til Ørsta-Volda lufthamn. Herøy kommune har nesten 9000 innbyggjarar. Saman med kommunane Ulstein, Hareid, Sande, Vanylven, Ørsta og Volda utgjer vi om lag 50 000 innbyggjarar. Arbeidsmarknaden er stor og variert, og dei maritime næringane har lange tradisjonar. Regionen har også anna industri og offentlege arbeidsplassar som sjukehus og høgskular. Herøy kommune er særleg kjend for å skape verdiar frå hav og fiske. Ei båtlengd føre er kommunen sin visjon, og kjerneverdiane våre er respekt, tillit og samhandling. Med kort veg til fjell og fjøre, gjev dette eit naturleg grunnlag for aktivitetar både på sjø og land. Vi har eit breitt kultur-, fritid- og idrettstilbod med festivalar og arrangement for alle. Naturen og kysten vår er vakker, og Runde med det mektige fuglefjellet er den store stoltheita vår!

Sektor: Offentlig
Sted: 6090 Fosnavåg
Bransje: IT,; Offentlig administrasjon
Stillingsfunksjon: IT utvikling / Systemarkitekt,; Koordinering,; Ledelse
Arbeidsspråk: Norsk