Utløpt

Kyrkjeverje

Arbeidsgiver: Hjelmeland kyrkjelege fellesråd
Stillingstittel: Kyrkjeverje
Frist: 07.03.2023
Ansettelsesform: Fast

Hjelmeland kommune ligg i hjarta av Ryfylke , og er med sine 1092 km2 den nest største kommunen i Rogaland. Det er kort veg med fastlandssamband til Stavanger og resten av regionen. I kommunen er det gode høve til allsidig friluftsliv og eit rikt kulturliv. Om lag 2600 innbyggjarar bur i kommunen, og det er 3 sokn med kvart sitt sokneråd. Kontorstad er i kommunesenteret Hjelmeland. I staben er det kyrkjeverje, prost, sokneprest, administrasjonssekretær, kantor, kyrkjelydspedagog, diakonimedarbeidar og fire kyrkjetenarar.

Vår kyrkjeverje ønskjer å gå av med pensjon, og me lyser difor ut
100 % stilling som kyrkjeverje/ dagleg leiar

Me søkjer etter ein person som kan gå inn i arbeidsfellesskapet som ein tydeleg leiar for dei tilsette i fellesrådet. Du må ha evne og vilje til å setja deg inn i det mangfoldige arbeidet som ligg til ei slik stilling i ein liten stab. Som kyrkjeverje er du ein nøkkelperson i utviklinga av Den norske kyrkja i lokalsamfunnet, i godt samarbeid med dei tilsette, sokneråda og kommunen.

Arbeidsoppgåver

Å vera kyrkjeverje er ein spennande jobb. Arbeidsoppgåvene er mange og varierte, så det blir aldri einsformig. Du er leiar for fellesrådet si verksemd, noko som inneber saksbehandling og sekretæroppgåver. I tillegg vil hovudoppgåvene vera innanfor følgjande felt:

Personalansvar for dei tilsette i fellesrådet
Økonomiansvar for fellesrådet sitt budsjett
Ansvar for drift og vedlikehald av 4 kyrkjer
Administrasjon av 9 gravplassar
Dagleg drift av kyrkjekontoret

Kvalifikasjonar, formelle og uformelle

Det er inga spesiell utdanning for å bli kyrkjeverje, men sidan dette er ei leiarstilling med totalansvar for verksemda, så er det ein stor fordel å ha relevant høgskuleutdanning innanfor personal/ HR, økonomi, teologi, offentleg forvaltning og administrasjon, eller anna relevant utdanning. Me vil og leggja vekt på om du har:

Kunnskap om kyrkjeleg organisering
Gode datakunnskapar
God skriftleg og munnleg framstillingsevne
Kunnskap om bokføring og praktisk økonomiarbeid

Personlege eigenskapar

I ei slik stilling er det like viktig kven du er som kor mykje du kan i utgangspunktet. Du bør ha eit sterkt engasjement for kyrkja sin plass og verdi i lokalsamfunnet. Me vil leggja stor vekt på at du har personlege eigenskapar som er nødvendige for ein leiar i kyrkja. Du må ha vilje og evne til å setja deg inn i gjeldande lov- og regelverk, nye arbeidsoppgåver, fagfelt og dataverktøy. Du må kunna arbeida sjølvstendig og strukturert.

Me tilbyr

Ein sjølvstendig, spennande, utfordrande og meiningsfull jobb i eit godt stabsfellesskap
Varierte arbeidsoppgåver og fleksibel arbeidstid
Gode kontorlokale, digitale verktøy og fagsystem
Tilbod om relevant opplæring og eksterne kurs
Løn etter avtale og pensjonsordning i KLP
Kollegaforum i prostiet og i bispedømmet

Kyrkjeverja må vera medlem i Den norske kyrkja, og vera lojal mot dei ordningar og vedtak som gjeld. Den som vert tilsett, må leggja fram politiattest av nyare dato. Administrasjonsspråket i Hjelmeland er nynorsk. Du må disponera eigen bil.

Arbeidsstad er Hjelmeland kyrkjekontor, Prestagarden 5, 4130 Hjelmeland