Vil du bli journalist – her får du opplæring med lønn

Nynorsk avissenter søkjer etter deg som vil bli journalist og skrive på nynorsk.

Vi tilbyr plass for fem praktikantar i kull 23. Opplæring og praksis i journalistikk og nynorsk som mediespråk for nett, avis og sosiale medium. Praktikantkurset startar 19. august 2024 med fire månader i Firda Media i Førde, deretter to månader journalistpraksis i sjølvvald avis i januar og februar 2025. Lønn i heile opplæringstida. Etter 22 kull har vi lært opp 97 nynorskpraktikantar sidan starten i 2013, og DU kan bli praktikant nummer 100.

No ser vi etter nye praktikantar.

Over halvparten av dei som har vore praktikantar arbeider som journalist i dag. Nynorsk avissenter samarbeider med NRK Nynorsk mediesenter i Førde, som driv tilsvarande opplæring for nett, radio, fjernsyn og sosiale medium. Dei lyser ut det 41. praktikantkurset med same søknadsfrist, 15. april. Vi held til i nye lokale i Nynorskhuset i Førde.

Vi tilbyr

• Eit halvt år effektiv og intensiv opplæring i avisjournalistikk
• Fire månader praksis i Firda Media og to månader i sjølvvald avisredaksjon
• Førelesingar i språk, journalistisk metode, intervjuteknikk, presseetikk, kjeldekritikk og undersøkande journalistikk
• Innføring i video, foto, strøyming, frontredigering, sosiale medium og datastøtta journalistikk
• Variert trening i tekstproduksjon og arbeid på nettdesk
• Tett oppfølging frå erfarne journalistar og lærarar
• Attest frå Nynorsk avissenter og praksisavis
• Hjelp til å skaffe bustad i Førde

Du har

• Lyst til å skrive nynorsk og vil bli journalist
• Samfunnsinteresse og -engasjement
• Stå-på-vilje, likar utfordringar og høgt tempo
• Evne til å samarbeide og dele kunnskap med andre
• Førarkort klasse B

Vi ønskjer søkjarar frå heile landet og tek inn søkjarar med ulik bakgrunn og utdanning. Hugs attestar og vitnemål når du søkjer. Les meir på heimesida vår.

Legg ved ein søknad som fortel litt om deg sjølv, og kvifor du vil bli nynorskskrivande journalist.