Vil du jobbe med juridiske oppgåver innanfor petroleumspolitikken?

Olje- og gassavdelinga/petroleumsjuridisk seksjon har ledig ei fast stilling som førstekonsulent/rådgjevar. 

Olje - og gassavdelinga skal bidra til å gjennomføre petroleumspolitikken fastsett av Stortinget og regjeringa. Avdelinga skal utvikle petroleumspolitikken vidare for å legge til rette for at måla for petroleumsverksemda vert nådd.

Petroleumsjuridisk seksjon har ei sentral oppgåve i avdelinga gjennom å behandle alle relevante juridiske problemstillingar. I tillegg til å arbeide med petroleumsrelaterte tema, har seksjonen også ansvar for mineralverksemda på havbotnen. Seksjonen har i dag seks tilsette.

Også kandidatar som vert uteksaminert i år kan søke.

Petroleumsjuridisk seksjon har ansvaret for det petroleumsrettslege regelverket og konsesjonsverket, og er intern rådgjevar i alle juridiske spørsmål knytta til avdelinga sine oppgåver.

Vi arbeider mellom anna med saker om vidareutvikling av rammeverket for aktørane i næringa, tildeling av konsesjonar og løyve, feltutbyggingar og elektrifisering, røyrtransport og infrastrukturregulering, drift av felt og anlegg, sal av andelar og planar for nedstenging av felt og anlegg, samt forvaltning av Norges energi- og mineralressursar i norske havområde. I tillegg arbeider seksjonen med EU-/EØS-rettslege spørsmål og traktatar. Seksjonen er også kontaktpunkt mot regjeringsadvokaten i saker som gjeld olje- og gassavdelinga sitt ansvarsområde, og har ansvaret for kontakt med ekstern advokat.

Seksjonen er også engasjert i ulike internasjonale fora, samt i bilaterale sakar med andre land knytt til petroleumsverksemda og mineralverksemda på havbotnen.

Arbeidsoppgåvene vil kunne vere innan alle oppgåvene til seksjonen.

Nødvendige kvalifikasjonar

• Master i rettsvitskap med gode resultatar
• God skriftleg og munnleg evne på norsk og gode kunnskapar i engelsk

Ønskelege kvalifikasjonar 

• Interesse for energipolitikk og næringsliv
• Kjennskap til EU/EØS-rett
• Interesse for internasjonalt arbeid

Personlege eigenskapar

Vi søker deg som er nysgjerrig, analytisk, engasjert i samfunnet, resultatorientert og har gode evner til samarbeid.

Du er strukturert, sjølvstendig og hjelper til å skape eit godt arbeidsmiljø.

• Interessante og utfordrande oppgåver i eit dynamisk, tverrfagleg og triveleg arbeidsmiljø
• Spennande problemstillingar i skjeringspunktet mellom fag og politikk
• Lønnspenn frå kr. 474 000-535 200 i året
• I tillegg får du alle goda ved å vere tilsett i staten. Det vil mellom anna seie fleksitid, lønna overtid, sommartid og medlemskap i Statens pensjonskasse, noko som inneber tenestepensjonsordning og yrkesskade- og gruppelivsforsikring. Du får også moglegheit til å trene i arbeidstida.

Ta kontakt med avdelingsdirektør Dag Erlend Henriksen på tlf. 406 59 330 eller seniorrådgjevar Anette Vehus Smedsvig på tlf. 951 05 254 for meir informasjon om stillinga.

Positiv særbehandling

Dersom det er kvalifiserte søkarar med funksjonsnedsetjing, hol i CV eller innvandrarbakgrunn, skal vi innkalle minst ein søkar i kvar av desse gruppene til intervju. For å kunne bli positivt særbehandla på denne måten, må søkar oppfylle visse krav. Les meir om krava på Arbeidsgiverportalen.

Vi oppfordrar søkarar til å krysse av i jobbportalen dersom dei har funksjonsnedsetjing, hol i CV, eller innvandrarbakgrunn. Dette dannar grunnlag for anonymisert statistikk for alle statlege verksemder i sine årsrapportar.

Erklæring om mangfald

Vi meiner at inkludering og mangfald er ein styrke. Vi ønsker medarbeidarar med ulik kompetanse, fagkombinasjonar, livserfaring og perspektiv for å bidra til enda betre oppgåveløysing. Vi vil legge til rette for medarbeidarar som har behov for det. Det kan for eksempel vere tekniske hjelpemiddel, tilpassing av møblar eller endring av rutinar, arbeidsoppgåver og arbeidstid.