Søkjer digital kommunikasjonsrådgivar

I Kommunikasjonsseksjonen er det ledig ei fast stilling som kommunikasjonsrådgivar med særleg ansvar for sosiale medium og digital kommunikasjon. Me søkjer deg som er samfunnsinteressert og har solid digital kompetanse. Du trivst på reisefot og med høgt tempo.

Som medarbeidar i Kommunikasjonsseksjonen ved Statsministerens kontor blir du del av eit lag med sju erfarne kollegaer som blir leia av kommunikasjonssjefen.

Arbeidsoppgåvene i seksjonen består blant anna i å gi råd og leggje til rette for statsministerens og kontorets mediekontakt, planlegging av reiser og ulike aktivitetar. Me jobbar for å nå ut til publikum med relevant og viktig informasjon via regjeringa.no og sosiale medium og samarbeider tett med politikarane, departementa og andre aktørar i kommunikasjonsarbeidet.

Kvalifikasjonar:
Du må

• ha relevant høgare utdanning, med fullført grad på minimum bachelorgradnivå. Relevant erfaring kan i visse høve kompensere for kravet til utdanning.
• ha interesse og god forståing for politikk og samfunnsliv
• ha jobba både operativt og strategisk med sosiale medium i journalistikk og/eller kommunikasjonsarbeid
• ha god kunnskap om foto, film og redigering
• vere kreativ og opptatt av korleis teknologi kan nyttast for å betre kommunikasjonen
• ha god kjennskap til dei sosiale kanalane som blir nytta i dag, og tankar om korleis dei best kan brukast
• ha god kjennskap til utviklinga som skjer på nettet/i nettsamfunn
• kunne formulere deg godt, både munnleg og skriftleg, på bokmål, nynorsk og engelsk
• ha god kunnskap om offentleg sektor

Personlege eigenskapar:

Me søkjer ein person som er imøtekomande, løysingsorientert og som samarbeider godt. Du er pedagogisk og flink til å lære bort til andre. Stillinga krev at du har god rolleforståing, analytiske evner, god vurderingsevne og forstår politiske prosessar. Du tar initiativ, jobbar sjølvstendig og er strukturert. Du har stor arbeidskapasitet, set deg raskt inn i ulike saker og trivst med eit høgt arbeidstempo.

Stillinga har stillingskode 1436 rådgivar eller 1364 seniorrådgivar, avhengig av utdanning og erfaring. Lønn blir fastsett individuelt og vil liggje i spennet frå 550 000 til 750 000 kroner. For spesielt kvalifiserte kandidatar kan høgare lønn vere aktuelt. Stillinga er del av ei vaktordning med eit vakttillegg. Du må rekne med reiseverksemd, og morgon-, kvelds- og helgearbeid.

Den som blir tilsett må kunne sikkerheitsklarerast for STRENGT HEMMELEG.

Nærare opplysningar om stillinga kan du få ved å kontakte kommunikasjonssjef Anne Kristin Hjukse,
tlf. 99 21 46 10, eller avdelingsdirektør Åsta Skre, tlf. 22 24 40 22.

Statlege arbeidsplassar skal spegle mangfaldet i samfunnet og gjere nytte av kompetansen til den enkelte. Me oppfordrar difor kvalifiserte kandidatar til å søkje, uavhengig av for eksempel alder, kjønn, nasjonal eller etnisk bakgrunn. Me vil gjerne ha søknad frå deg som har stått utanfor arbeid eller utdanning i ein periode og som fyller kvalifikasjonskrava til stillinga.

Me oppfordrar alle som søkjer til å laste opp vitnemål frå Vitnemålsportalen og leggje ved søknaden, saman med kopi av relevante attestar.