Spanande stilling for psykolog i ambulant tidleg intervensjon for unge med rusproblem

Spanande stilling for psykolog som ynskjer å jobbe med tidleg intervensjon og ambulante tenester retta mot ungdom og unge vaksne i tverrfagleg spesialisert rusbehandling.

Avdeling for rusmedisin (AFR), Haukeland universitetssjukehus, har ansvar for behandling og oppfølging av menneske med skadeleg bruk av rusmiddel og avhengigheit. AFR har fleire døgnseksjonar, forskingsseksjon, LAR, poliklinikkar, samt Seksjon Ambulant som den utlyste stillinga er tilknytt. AFR er i ein spanande utvikling knytt til både forsking og utvikling av differensierte tenester. Avdelinga har faste fag og forskingsdagar, og legg til rette for individuell vidareutdanning, samt felles kompetanseheving.  

Seksjon Ambulant jobbar med målsetjing om å sikre tidlegare oppstart av gode behandlingsløp, samt hjelpe menneske med rusmiddelavhengigheit som ikkje nyttiggjer seg ordinær poliklinisk behandling. Seksjon Ambulant står sentralt i AFR si satsing på fleksible og ambulante tenester. Per tid er det tilsett ein psykologspesialist og ein psykolog, ein overlege, ein erfaringskonsulent, tre sjukepleiarar, to vernepleiarar og ein sosionom. Dei ambulerande behandlarane i Seksjon Ambulant møter ruspasientar der dei har behov for det; gjerne i heimen eller på tur. Vi driv oppfølging av pasientar med eit vidt spekter av rusproblem; unge til eldre.

Seksjonen står midt i ein fagleg utvikling og skal byrje eit prosjekt retta mot unge opp til 25 år med byrjande rusproblem. Prosjektstillinga er knytt til dette, og medarbeidarane i prosjektet skal jobbe ut i frå prinsippa; eigentilvising, rask respons og fleksibel møtestad. I tillegg skal psykologen drive utgreiing og behandling med pasientar over tid, og bidra til å gjennomføre rustilsyn på Haukeland sjukehus. Psykologen som blir tilsett vil bidra til ei spanande fag- og tenesteutvikling, som inneber differensiering og klargjering av oppgåver og kliniske arbeidsmetodar for prosjektet, kompetansebygging og rettleiing av personale, kartlegging og utvikling av nye samarbeidsarenaer og - formar. Stillinga vil gi psykologen varierte arbeidsoppgåver og faglege utfordringar. Du vil vidare vere med å utforme det ambulante behandlingstilbodet for ungdom og unge vaksne i seksjonen. Stillinga fordrar ein person som er fleksibel og likar å møte pasientar utanfor poliklinikk, som ynskjer å jobbe med tenesteutvikling og som kan ta fagleg ansvar.  

Prosjektstillinga gjeld i fyrste omgang i eitt år, med moglegheit for fortsetjing. Tiltreding i stillinga er 1. september. Det er ynskjeleg med søkjarar med erfaring frå ambulant arbeid, og særleg frå arbeid med ungdom, unge vaksne og rusbehandling.  

Arbeidsoppgåver

• Ambulant og poliklinisk arbeid med utgreiing og behandling av ungdom og vaksne med rusproblematikk i prosjekt for tidleg intervensjon
• Samhandling og rettleiing av samarbeidspartnarar internt og eksternt mot somatisk einingar og psykisk helsevern, samt kommunale tenester   
• Bidra til fag- og tenesteutvikling i prosjektet og i seksjonen
• Bidra til å byggje psykologfagleg kompetanse i seksjonen med internundervising og rettleiing
• Undervising om rusproblematikk og relaterte psykologiske tema internt og eksternt
• Gjennomføring av rustilsyn på Haukeland universitetssjukehus

Kvalifikasjonar

• Norsk autorisasjon som psykolog
• Erfaring med klinisk arbeid med menneske med alvorlege ruslidingar og psykiske lidingar, med ambulant arbeid, samt med ungdom og unge vaksne vil telje positivt
• Vidareutdanning som psykologspesialist innan barne- og ungdomspsykologi eller rus- og avhengighetspsykologi er ynskjeleg
• Særs gode kunnskapar i norsk, både munnleg og skriftleg
• Førarkort for personbil
  

Personlege eigenskapar

• Du trivast med å arbeide i eit spesialisert tverrfagleg miljø
• Du er open og fleksibel, og meistrar høgt tempo og toler å stå i krevjande situasjonar
• Du har god fagleg vurderingsevne
• Du arbeider målretta, samvittighetsfullt og strukturert både sjølvstendig og i team
• Du likar å jobbe med pasientar over tid
• Du bidrar positivt til eit fagleg og kollegialt godt miljø
  

Vi tilbyr

• Lønn etter avtale
• Gode pensjons- og forsikringsordningar
• Triveleg arbeidsmiljø
• Høgt fagleg nivå
• Fagleg og personleg utvikling
• Ein arbeidsplass som er ei inkluderande arbeidsliv-bedrift (IA-bedrift)