Vi søker Rektor/Dagleg leiar med stort engasjement og som brenner for å få til ein god skule

Om arbeidsgiveren

Tuddal er ei fjellbygd i Hjartdal kommune, i hjartet av Telemark og på solsida av den majestetiske Gaustatoppen. Bygda er ein populær turiststad med mange hytter, fleire campingplassar og eit historisk hotell. Til verdsarvbyane Rjukan og Notodden er det berre om lag 30 og 40 minuttar med bil frå Tuddal sentrum.

I Tuddal har me nærbutikk, byggevareutsal, snikkarverkstad, husflidshandel, kafé, fleire entreprenørar, eit tradisjonsrikt bygdetun og eige mikrobibliotek. Bygda har ein sterk dugnadskultur med fleire aktive lag og foreiningar.

For den som er glad i friluftsliv, kan me by på flotte turområde med mange fiskevatn og mange mil med preparerte skiløyper om vinteren.

Den tradisjonelle folkekunsten med musikk-, handverks- og forteljartradisjonar er ein viktig del av bygdas identitet. Det er som regel stor oppslutting rundt 17. maifeiringar, julearrangement og bygdedagar.

I Tuddal har det vore skule sidan 1883. Etableringa av Tuddal Montessoriskule er eit resultat av at foreldra i bygda ynskjer at det skal vere skule her i mange år til. Kommunen har vedteke å selje skulebygget til Tuddal Montessoriskule og vil leige lokala i 1. etasje av skulebygget der barnehagen driv i dag. Hjartdal kommune er positive til etablering av friskule i Tuddal, og tuddølane har vist stort engasjement for å sikre vidare skuledrift. Dei siste åra har oppvekstsenteret blitt berika med barn med ulik kulturell bakgrunn, og elevtalet er på nytt aukande. Eit trygt og godt skuletilbod vil bidra til at Tuddal vil vera ein god stad å vakse opp også for kommande generasjonar og få enda fleire til å busette seg her.

Styret har eit ynskje om at det tette samarbeidet med barnehagen blir vidareført for å sikre eit trygt og godt miljø for ungane våre, i tillegg bidra til eit større sosialt miljø på arbeidsplassen for dei vaksne.
Skulen ligg sentralt i bygda. I tillegg til skule- og barnehagedrift brukast gymsalen fleire kveldar i veka av idrettslaget til mellom anna brytetrening og spinning. Ved skulen er det både grusbane og ballbinge. Vinterstid blir den nyoppussa lysløypa bruka både til skitrening og skikarusellar, til leik og trivsel for skulen og barnehagen og av alle andre som vil ha seg ein skitur.
Tuddal Montessoriskule kjem til å få mellom 20 og 30 elevar frå 1. til 7. klasse, og i fyrste omgang vil skulen, i tillegg til rektor, ha 2,4 lærarårsverk. Skulen har fått godkjenning frå Utdanningsdirektoratet til oppstart hausten 2019.
Som ein liten skule vil me bruke dei gode føresetnadene dette gir til å ha fokus på den enkelte eleven, lokal kultur og tradisjon og bruk av naturen.

Kandidaten me ser etter må ha lyst til å vere med på å etablere og forme ein attraktiv skule med eit godt lag av medarbeidarar. Som rektor får du ansvar for alle tilsette og blir både pedagogisk leiar og dagleg leiar av ein ny liten bedrift. Noko undervising kan du også sjå fram til.