Vil du utvikla software som gjer ein forskjell i industrien?

Om oss og produkta våre

Rocketfarm er eit norsk teknologiselskap som utviklar programvara som gjer robotpalletering mogleg. Produkta våre gjer det enkelt å ta i bruk robotar for palletering:

Pally – programvare for palletering som gjer det mogleg for ein robot å stable esker på pallar på ein påliteleg måte, utan behov for programmeringskompetanse for å setje opp eller køyre løysinga. Ho er fleksibel når produksjonen endrar seg, blir stadig betre gjennom oppdateringar og reduserer tungt og repetitivt arbeid for menneske.

MyRobot.cloud – ein skyplattform for å designe, simulere og administrere robotbaserte palleteringsløysingar. Plattformen gjer det mogleg å planleggje og verifisere ei løysing før ho blir teken i bruk ute i fabrikken.

Universal Robots var det første robotmerket vi støtta. I dag byggjer vi oss opp som eit standard programvarelag på tvers av fleire robotleverandørar – og denne veksten gjer at vi no treng fleire dyktige folk med på laget.

Rolla

Vi søkjer ein Robotics Software Engineer som vil bidra til å vidareutvikle programvara bak produkta våre når vi utvidar støtta til fleire robotmerke. Du vil jobbe med alt frå baneplanlegging og integrasjon mot robotar, til plattforma som bind løysingane saman.

Du vil få moglegheit til å jobbe med heile teknologistacken, men viktigast av alt: Du vil vere med på å ta gode arkitekturbeslutningar etter kvart som systemet veks. Du må like å stille dei vanskelege spørsmåla, sjå heilskapen og bidra til at løysingane våre held seg robuste og oversiktlege.

Kva vil du jobbe med?

• Utvikle og forbetre programvara som planlegg robotrørsler og styrer robotane vi støttar.

• Bidra til å integrere nye robotmerke i plattforma på ein god og skalerbar måte.

• Delta i arkitekturval – vurdere tekniske kompromiss, identifisere utfordringar tidleg og bidra til at systemet held seg enkelt og robust når det veks.

• Jobbe med både simulering og ekte hardware, der tryggleik alltid står sentralt.

Vi trur du passar godt dersom du:

• Har nokre års erfaring med utvikling av programvare i produksjon, gjerne innan robotikk eller større system.

• Tenker heilskapleg og forstår korleis ulike delar av eit system heng saman.

• Har forståing for robotikk og kan gjere gode vurderingar rundt robotarmar.

• Er komfortabel med Linux og containerbasert utvikling.

Det er ein fordel om du har erfaring med:

• C++ og Python.

• ROS / ROS2.

• Industrirobotar eller automatisering.

• Web frontend eller skyteknologi.

• Norsk språk (ikkje eit krav – vi jobbar på engelsk i det daglege).

Å jobbe hos oss

Vi er eit lite, teknisk sterkt team i Sogndal, midt i hjartet av Vestland – med fjordar, fjell og brear rett utanfor døra. Her får du moglegheita til å fordjupe deg i krevjande tekniske problemstillingar, samtidig som du kan vere på ein fjelltur eller ute på vatnet få minutt etter at du forlèt kontoret.

Dette er ei stilling der du jobbar frå kontoret vårt i Sogndal.