Er du jurist og ønskjer å arbeide med film og opphavsrett?

Kultur- og likestillingsdepartementet (KUD) søker ein rådgivar/seniorrådgivar til seksjonen som har ansvar for film- og dataspelpolitikk, opphavsrett og kulturell og kreativ næring. Generelle forvaltningsrettslege spørsmål i departementet høyrer òg inn under seksjonen.

Seksjonen (MK2) har etatsstyringsansvar for Norsk filminstitutt (NFI). Felta våre er prega av store endringar innan teknologi, marknad og brukaråtferd, og reguleringa blir i stor grad påverka av internasjonale regelverk.

Arbeidsoppgåver

Vi søker deg som vil arbeide med opphavsrett og juridiske saker på filmområdet. Hovudoppgåva vil vere å utarbeide grunnlag for avgjerder i departementet, særleg om opphavsrett og juridiske spørsmål som gjeld film- og dataspelpolitikken, til dømes ved klagesaker og i forskriftsarbeid. Du må vere budd på å stille kompetansen din til disposisjon for andre seksjonar og avdelingar i departementet. Stillinga inneber samarbeid med andre departement og etatar.

Kvalifikasjonar

Du må ha:

• fullført master i rettsvitskap eller juridisk embetseksamen med godt resultat

• relevant arbeidserfaring

• kunnskap om og interesse for opphavsrett og forvaltningsrett

• interesse for filmpolitiske spørsmål

• svært god skriftleg og munnleg framstillingsevne på norsk og engelsk

  Det er ein fordel om du har:

• kjennskap til lov- og forskriftsarbeid

• kjennskap til EØS-arbeid

• erfaring frå offentleg forvaltning, gjerne frå eit departement

• kjennskap til reglane om statsstøtte

Personlege eigenskapar:

Vi legg vekt på personlege eigenskapar og søker deg som er fleksibel og kan samarbeide på tvers av fagområde. Vi søker deg som

• er analytisk, løysingsorientert og effektiv

• har evne og vilje til å arbeide både sjølvstendig og saman med andre

• er samfunnsorientert

 Den som blir tilsett i stillinga, må kunne autoriserast for tilgang til informasjon som er gradert som BEGRENSET etter sikkerhetsloven.

Vi tilbyr

• lønn frå kr 600 000 til kr 710 000 brutto per år som rådgivar, eller frå kr 660 000 til kr 870 000 brutto per år som seniorrådgivar. (for spesielt kvalifiserte søkarar kan høgare lønn vurderast)

• fleksibel arbeidstid, med sommar- og vintertid

• høve til å trene i arbeidstida, tilgang til treningsrom og treningstilbod

• medlemskap i Statens pensjonskasse (SPK) med gode vilkår for pensjon, bustadlån og forsikring

• introduksjonsprogram for nytilsette og gode høve til kompetanseutvikling gjennom KUD-skolen og Departementsakademiet

• eit kunnskapsrikt, inkluderande og uformelt arbeidsmiljø

Vi held til midt i Oslo sentrum og skal våren 2026 flytte inn i det nye Regjeringskvartalet som er under oppføring.

Kvardagen i departementsfellesskapet er prega av varierte og utfordrande arbeidsoppgåver. Vi har eit omfattande og viktig samfunnsoppdrag, og hos oss får du høve til å vere med på å utvikle den statlege politikken og forvaltninga av våre politikkområde.

Kultur- og likestillingsdepartementet er del av eit departementsfellesskap som er miljøsertifisert, og vi jobbar aktivt og systematisk med berekraftsansvaret i sektorane våre.

Inkluderande arbeidsliv og mangfald

Vi meiner at mangfald er ein styrke. Vi ønskjer medarbeidarar med ulik kompetanse og livserfaring og ulike fagkombinasjonar og perspektiv slik at vi kan løyse oppgåvene våre endå betre.

Kultur- og likestillingsdepartementet har som mål å tilsetje fleire personar frå underrepresenterte grupper. Les meir om krava for positiv særbehandling på Arbeidsgiverportalen, se her: https://arbeidsgiver.dfo.no/strategisk-hr/inkluderingsarbeid/bli-bedre-pa-rekruttering/hvordan-skrive-stillingsannonser-som-inkluderer/positiv-saerbehandling-nar-man-soker-jobb-i-staten?size=n_20_n

Vi vil leggje til rette for medarbeidarar som har særskilde behov. Aktuelle tiltak kan til dømes vere å skaffe tekniske hjelpemiddel, tilpasse møblar eller endre rutinar, arbeidsoppgåver og arbeidstid.

Offentleg søkarliste og kontakt

Dei som søker, må vere merksame på at opplysningar om dei kan bli offentleggjorde sjølv om søkarane ber om ikkje å bli oppførte på den offentlege søkarlista. Departementet vil svare på krav om unntak frå den offentlege søkarlista før ho blir offentleggjord.

Vil du vite meir om stillinga, kan du ta kontakt med avdelingsdirektør Constance Ursin på telefon +47 95 70 76 66. Har du spørsmål til rekrutteringsprosessen, kan du ta kontakt med HR-rådgivar Christine Tellnes på telefon +47 92 80 83 48 eller e-post christine-jensen.tellnes@kud.dep.no.

Om avdelinga og seksjonen

Medie- og kunstavdelinga har ansvar for å utvikle den nasjonale politikken på felta ytringsfridom, medium, pengespel, stiftingar, opphavsrett, kulturell og kreativ næring, film, dataspel, musikk, scenekunst og kunstnarpolitikk. Avdelinga forvaltar lover og regelverk og gir løyvingar og tilskot til statlege og ikkje-statlege organ og institusjonar på desse felta.

Seksjonen (MK 2) har ansvar for opphavsrett, kulturell og kreativ næring, film og dataspel. Seksjonen har òg ansvar for etatsstyringa av Norsk filminstitutt og eigarstyring av Filmparken AS.

Kultur- og likestillingsdepartementet har ansvar for den statlege politikken og forvaltninga på områda kultur, likestilling og diskriminering, opphavsrett, medium, idrett, frivillig verksemd og pengespel og lotteri. Departementet har om lag 160 tilsette, fordelte på 5 avdelingar og 1 kommunikasjonseining. Meir informasjon om departementet finn du på www.regjeringa.no.