Kyrkjeverje / dagleg leiar

Stillinga som kyrkjeverje i Vestre Slidre kyrkjelege fellesråd er ledig frå februar 2026. Kyrkjeverja har ei sentral rolle i utviklinga av folkekyrkja i Vestre Slidre i samarbeid med prestetenesta.

Den norske kyrkje forvaltar ein rik kulturarv, og i Vestre Slidre er det fire kyrkjer, eit kapell og ein kyrkjeruin, alle innafor ein radius på åtte km frå kyrkjekontoret. Fellesrådet er óg gravplassmyndigheit i kommunen og har forvaltningsansvaret for fire gravplassar og andre bygg som høyrer til kyrkja.

Kyrkjeverja er den øvste administrative leiaren for kyrkjeleg fellesråd i Vestre Slidre, og skal hjelpe fellesrådet med å leie strategi - og utviklingsarbeid. Kyrkjeverja har óg ansvar for kyrkja sin administrasjon og økonomi med investeringar, drift og vedlikehald av eigedommar med eit årleg driftsbudsjett på ca. 4 mill. kroner. Stillinga inneber arbeidsgjevaransvar for ca. 7 tilsette (ca 3 årsverk), her rekna med kontorfullmektig, kantor, menigheitspedagog, kyrkjetenar, klokkarar og ringarar. I tillegg har stillinga HMS-ansvar for soknepresten i kommunen. Kyrkjekontoret ligg sentralt i Slidre.

Kyrkjeverja skal vera ein synleg representant for fellesrådet og bidra til dialog og samarbeid med både politiske og administrative offentlege myndigheiter; både kommunen, prosten, bispedømmerådet, Riksantikvaren og andre relevante instansar.

Vestre Slidre kyrkjelege fellesråd søkjer ein engasjert og utviklingsorientert kyrkjeverje/dagleg leiar som er trygg i leiarrolla og som har evna til å utvikle verksemda til fellesrådet. Den nye kyrkjeverja/daglege leiaren må ha solid sosial kompetanse og forståing for kva det inneber å leie ei verksemd med tilsette i ulike profesjonar, og å samarbeide med frivillige som bidreg med betydeleg innsats. Stillinga krev gode skriftlege ferdigheiter, samfunnsinteresse og solid arbeidskapasitet.

Arbeidsoppgåver

• Leie og utvikle verksemda og ansvarsområdet til fellesrådet, og på vegne av rådet
  
• Ivareta administrative og økonomiske oppgåver på vegne av sokna gjennom kyrkjeleg fellesråd
  
• Utarbeide mål og planar for verksemda til fellesrådet
  
• Ivareta arbeidsgjevaransvaret for dei som blir lønna over fellesrådsbudsjettet
  
• Budsjett, økonomi og rekneskapsarbeid
  
• Gravplassforvaltning
  
• Saksbehandling for fellesrådet og oppfølging av vedtak som blir fatta der
  
• Bidra til samhandling og fremme samarbeid mellom aktuelle kyrkjelege organ, samt representere i forhold til aktuelle offentlege myndigheiter
  
• Kyrkjeverja har eit særskilt ansvar for å ivareta kyrkjebygg- og gravplassforvaltning som ligg til fellesrådet, og vidare ivareta interesser for sokna i forhold til kommunen
  
• I ein liten stab vil det óg vere naturleg for kyrkjeverja å bidra i praktiske gjeremål saman med andre tilsette ved behov

Kvalifikasjoner

• Erfaring med personalleiing, økonomistyring, administrasjon og planarbeid
  
• Relevant utdanning på høgskulenivå med minimum bachelorgrad eller tilsvarande Særleg relevant realkompetanse kan vega opp for manglande formell utdanning
  
• Gode digitale ferdigheiter
  
• Gode evner til å arbeide med komplekse problemstillingar
  
• God formuleringsevne på norsk, både munnleg og skriftleg. Målforma er nynorsk.
  
• Medlem i Den norske kyrkje og at du kan identifisere deg med verdigrunnlaget til kyrkja og oppdraget «Meir himmel på jord».
  
• Søkjar må disponere eigen bil

Personlige egenskaper

• Gode samarbeidsevner med fokus på lagbygging
  
• Gode kommunikasjonsferdigheiter
  
• Kunne glede seg over å sjå resultat gjennom medarbeidarar
  
• Stor evne til å arbeide sjølvstendig og ta initiativ
  
• Serviceinnstilt, påliteleg og strukturert
  
• Personleg egnaheit vil bli vektlagt

Vi tilbyr

• Fast tilsetjing
  
• Lønn- og arbeidsvilkår etter gjeldande avtaleverk og pensjonsordning i KLP
  
• Varierte arbeidsdagar og fleksibel arbeidstid
  
• Kjøregodtgjering utbetalt etter gjeldande regelverk
  
• Arbeidsplass i ein vakker kommune med rikt friluftsliv og kulturliv, dessutan ein solid og god grunnskule og kulturskule, båe med gode lærar-ressursar, og barnehagar med full dekning.
  
• Hjelp med å finne bustad
  

For å skape grunnlag for godt og trygt miljø for alle, må det leggjast fram politiattest før tilsetting i samsvar med Trossamfunnslovens § 20 og Politiregisterloven § 39, første ledd.

Når søknadsfristen er ute, vil det bli utarbeidd offentleg søkjarliste. Ynskje om å bli unntatt frå denne lista må grunngjevast i søknadsportalen, og du vil uansett få ei tilbakemelding på dette. Dersom ynskjet ditt ikkje kan imøtekomast, vil det vera mogleg å trekkje søknaden.

Vestre Slidre kommune er ein landbruks- og reiselivskommune i Valdres, og som ligg vakkert til nær Jotunheimen, er 457 km2 stor og har omlag 2 100 innbyggjarar. Vi har ei solid og god skule med gode lærar-ressursar, full barnehagedekning og ei av dei beste kulturskulane i landet. Kommunen har også eit rikt kulturliv med song, musikk og idrett, og eit vidt spekter innanfor lag og foreiningar.

 
Her ligg det til rette for aktivt friluftsliv - både sommar og vinter. Største delen av fjellområda i kommunen er statsallmenning. For jakt- og fiskeinteresserte byr dette på mange gode - som for eksempel fiske med garn og oter i alle vatn i allmenningen, og tilgang til småviltjakt. Vestre Slidre kommune kan også by på eit alpinanlegg og 300 km oppkøyrte skiløyper i vårt vakre og varierte fjellområde, samt to lysløypeanlegg. Det er god kommunikasjon til Oslo og Vestlandet via E-16, som går gjennom kommunen.

 
Flytte til Valdres? Sjå http://www.velgvaldres.no