Vi søkjer strategisk og samfunnsengasjert leiar til stillinga som visepolitimeister i Møre og Romsdal politidistrikt

Om stillinga

Det er ledig embete som visepolitimeister i Møre og Romsdal politidistrikt. Embetet er eit åremål for ein periode på seks (6) år.

Avløysar til politimeister har totalansvar for polititenesta i politidistriktet og skal betene og skape tillit blant eit mangfald av innbyggjarar. Visepolitimeisteren inngår i leiargruppa til politimeisteren og bidreg til utvikling og gjennomføring av nødvendige forbetringar og god ressursutnytting i politidistriktet vårt.

Som ein del av det viktige samfunnsoppdraget til politiet, skal vi førebyggje og nedkjempe kriminalitet, skape trygghet og vareta rettstryggheten. Vi trur at mangfald bidreg til betre oppgåveløysing, og søkjer derfor medarbeidarar med ulik bakgrunn, erfaring, perspektiv og kompetanse. Vi ønskjer å spegle befolkninga og er opptekne av mangfald og god kjønnsbalanse i leiarstillingane i etaten.

Dette ser vi etter hos ein ny medarbeidar

Vi søkjer deg som blir motivert av moglegheita til å vidareutvikle norsk politi i tråd med samfunnsutviklinga gjennom bruk av moderne verktøy og arbeidsmåtar. Som toppleiar i politiet skal du, saman med andre, oppnå resultat på alle område, i dagleg drift og ved kriser. Vi ser etter deg som set retning, skaper oppslutning om mål og gjennomfører nødvendige endringar.

Arbeidsoppgåver

Visepolitimeister har delegerte ansvarsområde og oppgåver frå politimeister. I rolla som avløysar til politimeisteren har visepolitimeister følgjande hovudoppgåver:

• leie og utvikle eit politidistrikt som jobbar saman for å nå mål og levere på oppdrag
• bidra til visjonen om eitt politi ved å sjå til at styringa er i tråd med strategiane og måla til politiet
• styrkje førebygging som hovudstrategien til politiet i samarbeid med andre aktørar
• sikre effektiv drift og ressursbruk ved å ta i bruk tilgjengelege digitale løysingar og beste praksis
• sørgje for god samhandling og kommunikasjon internt og eksternt; mellom politidistrikt/-einingar og overfor andre samfunnsaktørar
• styrkje organisatorisk læring, etisk medvit og risikobasert styring
• sørgje for aktivt medarbeidarskap, helsefremjande arbeidsmiljø, godt partsamarbeid og oppfølging av medråderetten i politidistriktet

Kvalifikasjonar

• relevant utdanning på minimum bachelornivå
• gode resultat i tidlegare stillingar
• brei leiarerfaring frå politi og/eller påtalemakt
• kunnskap om og erfaring med kriseleiing og politiet som beredskapsorganisasjon
• kunne vareta intern og ekstern kommunikasjon på ein tydeleg og profesjonell måte
• må kunne bli sikkerheitsklarert for STRENGT HEMMELEG, jamfør sikkerhetsloven

Det er også ønskjeleg med:

• relevant leiarutdanning
• erfaring frå utviklings- og endringsprosessar
• god kunnskap om totalforsvarskonseptet
• god forståing for grensesnittet mellom politikk og forvaltning
• god kunnskap om partssamarbeid/medråderett
• god kjennskap til systematisk HMS-arbeid

Du må ha plettfri vandel og vere skikka for teneste i politiet. Politiattest (uttømmande og utvida) må innhentast ved eventuell tilsetjing, jamfør politiloven § 18 og politiregisterlova § 41.

Personlege eigenskapar

• resultatorientert og har god gjennomføringskraft
• strategisk og heilskapsorientert
• god til å kommunisere og byggje relasjonar
• god rollemodell, lojal og med høg grad av etisk medvit
• samfunns- og innbyggjarorientert 
• tydeleg leiarskap med evne til å motivere og utvikle leiarar og medarbeidarar

Som medarbeidar i politiet blir du kjenneteikna av å vere modig og heilskapsorientert, du viser respekt og er tett på. Som leiar må du i tillegg kunne leie i samsvar med medarbeidarplattforma vår. Du kan lese meir om dei etiske retningslinjene våre og medarbeiderplattformen her (https://www.politiet.no/om-politiet/jobb-i-politiet/medarbeiderplattform/).

Dette kan vi tilby om du vel oss

• Ein utfordrande og spennande arbeidsplass for deg som vil vere med på å forme politi for fremtida
• Stillinga blir lønna som visepolitimeister (stillingskode 0295) med årslønn: kr. 1 300 000-1 420 000
• Medlemskap i Statens pensjonskasse, med mellom anna gode pensjons- og forsikringsordningar. Les mer her (https://www.spk.no). 

Slik søkjer du

Du søkjer ved å fylle ut CV i Jobbnorge sitt CV-skjema og skrive eit kort søknadsbrev. I tillegg må du leggje ved relevante vitnemål og attestar. Relevante kandidatar vil bli kalla inn til intervju. 

Opplysningar om deg kan bli offentleggjorde sjølv om du har bede om ikkje å bli ført opp på søkjarlista. Dersom oppmodinga ikkje blir teken tilfølgje, vil du bli varsla om dette.

Mellom hav, fjordar og fjell finn du Møre og Romsdal politidistrikt som er eitt av 12 politidistrikt i Noreg. Vi femnar om eit område på 15 099 kvadratkilometer med ei befolkning på om lag 272 500 menneske. Majestetiske fjellområde som Trollheimen, Romsdalsfjella, Sunnmørsalpane og Tafjordfjella set naturlege avgrensingar i fylket og politidistriktet. Ein stor del av befolkninga bur langs kysten og på øyar. Dei tre største byane, Ålesund, Molde og Kristiansund, er regionsenter for høvesvis Sunnmøre, Romsdal og Nordmøre. Politidistriktet har også kontinentalsokkelberedskap frå Stad til Helgeland.

Politidistriktet med om lag 650 tilsette, vert leia av politimeisteren som har hovudsete i Ålesund. Vi er organisert i to geografiske driftseiningar med til saman 18 politistasjonar og sommaråpen politistasjon i Geiranger. I tillegg har vi fire funksjonelle driftseiningar. Det er Felles eining for påtale, Felles eining for operativ teneste, Felles eining for etterretning, førebygging og etterforsking, og Felles eining for utlending, forvaltning og sivil rettspleie. I tillegg kjem PSTog tre leiarstøttestabar; kommunikasjon, verksemdstyring og HR/HMS.