Rådgjevar/seniorrådgjevar

Vil du vere med å utvikle kollektivtilbodet i Vestland? I Skyss jobbar vi med å tilpasse kollektivtilbodet til reisebehovet, og å gjere tilbodet mest mogleg tilgjengeleg og effektivt. For å oppnå dette er det behov for riktig infrastruktur for både buss, bybane, ferje og båt. Vi samarbeider med plan- og vegmynde, grunneigarar og eigedomsforvaltarar for å oppfylle samfunnsoppdraget vårt: Å utvikle eit berekraftig mobilitetssystem for innbyggarar og samfunn i Vestland.

Vi treng fleire med på laget for å sikre infrastrukturen for kollektivtransporten i Vestland! Hos oss vil du bli del av eit mangfaldig fagmiljø. Oppgåvene inneber mellom anna å gi innspel til arealplanar, bidra til å utvikle gode knutepunkt for dei reisande og sikre effektive løysingar for framkomst og logistikk. Vi samarbeider med mange innanfor og utanfor Skyss og fylkeskommunen for å realisere berekraftige infrastrukturløysingar for mobilitetssystemet. Difor søker vi deg som evnar å tenke heilskapleg, har god prosessforståing og ønsker å bidra til gode kvardagsreiser for alle som bur og reiser i Vestland.

Arbeidsoppgåver

Som rådgjevar for infrastruktur hos oss vil du jobbe med kollektivinfrastruktur på land og på sjø. Sentrale oppgåver vil vere å:

• arbeide med forslag til infrastrukturtiltak som styrker kollektivtrafikken si konkurranseevne
  
• bidra med kompetanse innan arealbruk, logistikk og kollektivinfrastruktur i strategisk arbeid og inn i planprosessar
  
• bidra i utgreiing og planlegging av kollektivtilbodet
  
• arbeide konkret med utforming av knutepunkt, bussanlegg, kaiinfrastruktur og veginfrastruktur rundt omkring i fylket
  
• vere bindeledd for involvering av sjåførar og mannskap for gode, praktiske løysingar.
  

Du vil utføre oppgåvene dine i samarbeid med kollegaer og fleire fagmiljø i Skyss. Vi har også mange grensesnitt mot andre delar av Vestland fylkeskommune, kommunane, ulike leverandørar, innbyggarar med fleire. Noko reising kan vere naudsynt. Du vil ha ei koordinerande rolle både internt i Skyss og mot andre interessentar.

Kvalifikasjonar

Vi ser etter deg som har høgare utdanning på masternivå eller tilsvarande, frå relevant fagområde (til dømes areal- og samfunnsplanlegging, fysisk planlegging, logistikk eller transportinfrastruktur). For å meistre og trivast i jobben må du ha god skriftleg og munnleg formidlingsevne og god prosessforståing.

I tillegg er det fint om du har

• erfaring med relevante planprosessar og/eller infrastrukturplanlegging
• god forståing for interessenthandtering og dialogprosessar
• evne til å sette deg inn i den operative drifta av tenestene våre
• kjennskap til distrikta i vestlandsregionen og
• kjennskap til offentleg forvalting.

Personlege eigenskapar

Vi treng deg som

• vil bidra til berekraftig utvikling av bygd og by
• er nysgjerrig og arbeider faktabasert og systematisk
• har evne til strategisk planlegging, pågangsmot og er opptatt av å sjå resultat
• trivst med tverrfagleg samarbeid og deling av kunnskap, og
• bidrar til det gode arbeidsmiljøet.

Vi tilbyr

Hos oss i Skyss kjem du inn i eit sterkt fagmiljø og eit engasjert arbeidsmiljø med hyggelege kollegaer. Du vil få ei fagleg utfordrande og spennande stilling med stor samfunnspåverknad. I tillegg tilbyr vi

• moglegheit til å utvikle deg fagleg
• gode og stabile arbeidstilhøve gjennom Vestland fylkeskommune
• fleksibel arbeidstidsordning og løn etter avtale
• gode, offentlege pensjons- og forsikringsvilkår
• arbeidsstad i Bergen eller Leikanger

Andre opplysningar:

• Administrasjonsspråket i Vestland fylkeskommune er nynorsk
• Alle nye tilsettingar vert gjort med ei prøvetid på 6 månader
• Vi gjer merksam på at i høve til offentleglova § 25,2. ledd kan opplysningar om søkaren bli offentleggjort sjølv om søkaren har oppmoda om ikkje å bli ført opp på offentleg søkarliste. Søkarar som har bede om unntak, vil alltid bli varsla på førehand dersom søkarlista blir offentleggjort.

Om Skyss

Skyss har ansvaret for det offentlege tilbodet med buss, bybane, båt og ferje i Vestland fylke.

Vi er eit kompetanseorgan for mobilitet og kollektivtrafikk i fylket, og skal sikre at vi når dei politiske måla som fylkestinget set for kollektiv- og mobilitetstenester. Skyss sitt mål er å gjere det mogleg for kvar enkelt å reise berekraftig frå der du er til dit du skal.

Skyss skal bidra til å nå klimamåla i Parisavtalen. Vi skal gjennom ein forretningsmessig og digital transformasjon, slik at vi kan sikre samanheng i mobilitetstenester på nye måtar til det beste for innbyggarane i Vestland. For å få dette til, må vi styrke laget med nøkkelpersonar som har interesse for mobilitet og som ønsker å bygge bru mellom dagens løysingar og eit mobilitetstilbod for framtida. Skyss er ei eining i Vestland fylkeskommune, har om lag 100 tilsette og eit budsjett på vel 5,7 milliardar kroner.

Les meir om Skyss her: Jobb og karriere i Skyss