Vil du bli med og utvikle aktivitetane og organisasjonen vår?

Bondeungdomslaget i Oslo (BUL) har om lag 700 medlemmer som driv med idrett, teater, folkedans, kor og nynorskarbeid i sitt eige kulturhus midt i Oslo.

Er du allsidig, strukturert, ser nye måtar å gjere ting på, god til å administrere, lytte, og få ting til å skje? Har du interesse og engasjement for organisasjonsarbeid og medlemsutvikling? Då kan du vere den rette til å vere organisasjonsrådgjevar i BUL.

BUL er ein demokratisk styrt medlemsorganisasjon der det er tett dialog mellom tillitsvalde, medlemmer og administrasjon. Det er fem tilsette (4,5 årsverk) på kontoret, der to av desse er i Idrottslaget. Aktivitetane er organisert i fire særlag med kvar sitt styre, og du skal jobbe på tvers av desse særlaga. Laget har to hytter som vi leiger ut til medlemmene og andre.

Vi ønskjer ein person som, i samspel med hovudstyret, dei tilsette og særlaga, vil vere med på å utvikle og synleggjere laget og aktivitetane våre. Du bør trivast både med administrative og praktiske oppgåver.

Dette er dei viktigaste ansvarsområda:

1)    Organisasjonsarbeid

• utvikle og synleggjere laget og aktiviteten
• informere om aktivitetar både internt og eksternt
• hjelpe særlaga og dei tillitsvalde i drifta av aktivitetane
• utvikle og drive organisasjonsopplæring av medlemmer og tillitsvalde
• utvikle gode rutinar for å gjere det lettare å vere medlem og tillitsvald

2)    Administrative oppgåver

• drifte og vedlikehalde medlemssystemet
• organisere bruk og utleige av lagslokala og hytter
• følgje opp utviklingsbehov i lokala
• organisere og hjelpe til ved ulike møte og arrangement
• halde nettsider og sosiale medium oppdatert
• søkje på støtteordningar
• oppfølging av strategi- og handlingsplan for å sikre at planane blir gjennomført

Du vil samarbeide tett med dagleg leiar og assistere henne i oppgåver innan økonomi og styrearbeid. Ved feriar og fråvær skal du kunne fungere som dagleg leiar og får slik nyttig erfaring i organisasjonsleiing.

Vi ser etter deg som:

• har erfaring frå medlemsorganisasjonar som tilsett eller tillitsvald
• er ryddig og strukturert
• er sjølvstendig, tek initiativ og likar å ta i eit tak
• har tankar og idéar om utvikling av frivillige medlemsorganisasjonar
• er glad i folk og god til å organisere og koordinere
• har god IT-/systemforståing og gjerne erfaring med medlemssystem, nettsider og SoMe
• kan utrykke deg godt både munnleg og skriftleg og er glad i å skrive nynorsk
• har relevant utdanning

BUL har nynorsk som administrasjonsspråk, og du må kunne lese korrektur for andre tilsette og tillitsvalde.

Søknaden din må vere på nynorsk for å bli vurdert.

Hos oss ser vi det som ein styrke å ha medarbeidarar med ulik bakgrunn, livserfaring og perspektiv. Vi oppmodar difor alle som meiner dei har rett kompetanse til å søke.

Praktisk om stillinga:

• 100 % fast stilling med 37,5 timar normalarbeidstid, fleksitid
• noko kveldsarbeid må påreknast
• løn etter avtale (avhengig av kompetanse og utdanning)
• god pensjonsordning
• personalkantine og rabattordningar
• vi nyttar Office 365, økonomisystemet Xledger og medlemssystemet Styreweb

I hovudsak jobbar du på kontoret og lagslokala, då fleire av arbeidsoppgåvene krev fysisk oppmøte, medan noko heimekontor er mogleg.

Send søknad og CV snarast mogeleg, og seinast 3. mars.

Du treng ikkje skrive ein omfattande søknad, men vi vil gjerne vite litt om kven du er og kvifor du ønskjer å jobbe hos oss. Det er positivt om du kan skrive litt om korleis du kan hjelpe oss med å utvikle organisasjon og medlemmene.

Søknadar blir vurderte så snart dei kjem inn.